ស្តេចប្រដាល់ថៃ ដែលល្បីល្បាញពេញពិភពលោក ដែលមានឈាមជ័រជាខ្មែរសុរិន្ទ បួខាវ បានចាម៉េក (Buakaw Banchamek) ទទួលបានជ័យជំនះយ៉ាងងាយស្រួល ទៅលើអ្នកប្រដាល់អូស្រ្តាលី ហាលី អាវីសិន (Harlee Avison) ក្នុង​ការប្រកួតប្រដាល់មិត្តភាពអន្តរជាតិ ដែលរៀបចំឡើង ដោយស្ថានីយទូរទស្សន៏ប៉ុស្តិ៏បាយ័ន និងប៉ុស្តិ៏ទ្រូស្តត២ (True Sport 2) របស់ថៃ ក្នុងកម្មវិធី ខ្មែរហ្វៃធឺ (Khmer Fighter) នាសង្វៀន ប៊ីឡាញ អារ៉េណា (Beeline Arena) កាលពីយប់​ថ្ងៃទី២៧ខែមិនា។

កីឡាករ ឯម វុត្ថា ផ្ដួលដៃគូរប្រកួតមកពីប្រេស៊ីល នៅដើមទឹកទី១។ MONOROOM.info photo/ V.chivann

បួខាវ ពិតជាមិនធ្វើឲ្យអ្នកគាំទ្រកីឡាប្រដាល់ និងអ្នកគាំទ្ររបស់ខ្លួន ដែលកំពុងតែទស្សនា ការផ្សាយផ្ទាល់នៅប្រទេសថៃ មានការខកចិត្តឡើយ។ ចាប់ផ្តើមពីទឹកទី១ កីឡាករទាំង២ ធ្វើការវាយសម្រុកគ្នាទៅវិញទៅមកយ៉ាងខ្លាំងក្លា និងធ្វើឲ្យ​សង្វៀនកក្រើក ហើយទស្សនិកជនក៏បន្លឺសម្លេងឡើង។

ការប្រកួតចូលដល់ទឹកទី៣ អ្នកប្រដាល់វ័យ ៣០ឆ្នាំ បួខាវ បានប្រើជង្គង់បុកទៅលើចុងដង្ហើម និងប្រើកណ្តាប់ដៃ​វាយចំ​ផ្ទួនៗ ទៅលើផ្ទៃមុខរបស់ កីឡាករអូស្ត្រាលី អាវីសិន ហើយបានធ្វើឲ្យកីឡាករអូស្ត្រាលីរូបនោះ សន្លប់ស្តូកស្តឹង នៅក្នុង​ទឹកនោះតែម្តង។

រីឯគូរអន្តរជាតិផ្សេងទៀត អ្នកប្រដាល់កម្ពុជា ឯម វុត្ថា មកពីក្លឹបប្រដាល់គ្រុឌមានជ័យ ក៏បានយកឈ្នះកីឡាករ រ៉ាណាន់ (Ranan) របស់ប្រេស៊ីល យ៉ាងងាយស្រួលដែរ។ អ្នកប្រដាល់លេងជង្គង់ ឯម វុត្ថា បានប្រើស្នៀតពិសេសរបស់ខ្លួន យក​ជង្គង់អុកចំឆ្អឹងជំនី របស់កីឡាករ រ៉ាណាន់ ហើយក៏ធ្វើឲ្យកីឡាករប្រេស៊ីលរូបនោះ សន្លប់នៅដើមទឹកទី១។

កីឡាករអ៊ុង វីរៈ មកពីក្លឹបប្រដាល់កងទ័ពឆត្រយោង៩១១ ដែលត្រូវប្រកួតជាមួយនឹងកីឡាករ លីអូណាដូ (Leonardo) នោះ ត្រូវប្រកួតជាមួយនឹងកីឡាករ ប៉ូឡូ (Paolo) សញ្ជាតិប្រេស៊ីលវិញ ដោយសារតែកីឡាករ លីអូណាដូ សញ្ជាតិ​ប្រេស៊ីល​ដែរនោះ មានបញ្ហារបួស មិនអាចប្រកួតបាន។ គូរនេះប្រកួតគ្នាយ៉ាងស្វិតស្វាញ រហូតដល់ចប់ទឹកទី៥ ខណៈដែល​កីឡាករ​អ៊ុង វីរៈ របស់ខ្មែរ ទទួលបានជ័យជំនះដោយពិន្ទុ។

ក្នុងការប្រកួតគូរទី៤ ដែលជាគូរចុងក្រោយគេដែរនោះ កីឡាករជើងចាស់របស់កម្ពុជា ប៊ឺត ខាំ មកពីក្លឹបប្រដាល់​សាលវ័ន្ត​កីឡា មានកម្ពស់ ១,៦៨ម៉ែត្រ ភ្លាត់ស្នៀត ត្រូវកីឡាករ ជេកសិន អាវែស ដេសូសា (Jackson Alves De Souza) សញ្ជាតិ​ប្រេស៊ីល ដែលមានកម្ពស់រហូតដល់ ១,៨៧ម៉ែត្រ ទាត់ចំគន្លាក់ជង្គង់ជើងស្តាំ ហើយរងរបួសយ៉ាងធ្ងន់ធ្ងរ មិនអាច​ក្រោក​ឈរបាន ក៏បានបោះបង់ការប្រកួតត្រឹមទឹកទី២៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២៨ ខែមិនា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ