ពីកម្ពុជា មហាសេដ្ឋីរ៉ូស្សីម្នាក់ «ប្រកាសអាសន្ន» រកជំនួយ
កាលពីប៉ុន្មានខែមុនហេតុការណ៍កើតឡើង បុរសអ្នកជំនួញដែលមានលុយយ៉ាងសន្ធឹកសន្ធាប់ និងចូលចិត្តលេងខ្លួន បែបផ្លេប៊យ (play-boy) ផងនេះ ធ្លាប់បានគេស្គាល់លោកយ៉ាងច្រើន ជាពិសេស បន្ទាប់ពីលោក បានទទួលមួយដៃចំកណ្ដាលមុខ នៅលើកញ្ចក់ទូរទស្សន៍មួយ ក្នុងប្រទេសដើមកំណើតរបស់ខ្លួន។ ប៉ុន្តែនៅប៉ុន្មានថ្ងៃ ក្រោយពេលចូលឆ្នាំថ្មី ឆ្នាំសកលនេះ លោកត្រូវបានអាជ្ញាធរខ្មែរ ចាប់ដាក់ឃុំ នៅក្រោយពីហេតុការណ៍សប្បាយ«ជ្រុល»មួយ បានកើតឡើង។
សូមអានអត្ថបទមុនរបស់មនោរម្យ.អាំងហ្វូ ដែលបានផ្សាយពីការឃាត់ខ្លួន របស់លោក ស៊ែរហ្គៃ ប៉ូឡូស្គី កាលពីខែមករាកន្លងមក។
ពីក្នុងពន្ធនាគារ ដែលក្ដៅដូចឡនេះហើយ ដែលបុរសសក់ពណ៌មាស ជំនាញខាងអចលនវត្ថុ និងមានឈ្មោះល្បី ខាងស្ថាបត្យកម្មដ៏កំពូលៗផងនោះ បានធ្វើសេចក្ដីអំពាវនាវ បែប«ប្រកាសអាសន្ន»មួយ ទៅរដ្ឋាភិបាលរ៉ូស្សី ដោយបានចោទរបប«ការិយាធិបតេយ្យ» នៃប្រទេសរបស់លោក ថាមិនបាន«ធ្វើអ្វីទាល់តែសោះ» ដើម្បីរំដោះជនរួមជាតិម្នាក់ អោយមានសេរីភាព។ លោកបានតម្អូញ ដោយលើកយកតួលេខបង់ពន្ធមកបញ្ជាក់ថា លោកបានបង់ពន្ធចូលរដ្ឋរូស្សី បើគិតមកដល់ថ្ងៃនេះ ប្រមាណជា ១,៥ពាន់លានដុល្លា រួចមកហើយ។
«ដោយហេតុដូច្នេះ ខ្ញុំរងចាំយ៉ាងអន្ទះសារ នូវសេវាដ៏ខ្ពង់ខ្ពស់មួយ សម្រាប់ជួយគាំពារ នូវសេរីភាព សុខភាព សុវត្ថិភាព និងការបណ្ដាក់ទុន របស់ខ្ញុំ» លោក ស៊ែរហ្គៃ ប៉ូឡូស្គី បានសរសេរយ៉ាងដូច្នេះ នៅក្នុងកំណត់ហេតុប្រចាំថ្ងៃរបស់លោក។ អត្ថបទសរសេរដោយដៃផ្ទាល់នេះ ត្រូវបានចុះក្នុងគេហទំព័រផ្ទាល់ខ្លួនលោក ហើយមានអត្ថន័យ ចង់សំដៅដោយផ្ទាល់ ទៅលោក ស៊ែរហ្គៃ ឡារ៉ូវ (Sergueï Lavrov) ប្រមុខការទូតរ៉ូស្សី។ ជាពិសេសជាងនេះទៅទៀត នៅពីក្រោមអត្ថបទ គេឃើញមាន ហត្ថលេខាចុះដោយស្នាមមេដៃ ប្រលាក់ដាមដោយ«ឈាម»នោះថែមទៀត។
បោះអ្នកធ្វើការលើកាណូត ៦នាក់ ទៅក្នុងសមុទ្រ
រឿងហេតុការណ៍នេះ អាចនឹងធ្វើអោយទប់សំណើច មិនសើចមិនបាន។
ក្នុងឱកាសចូលឆ្នាំសកលកន្លងមកនេះ លោក ស៊ែរហ្គៃ ប៉ូឡូស្គី និងមិត្តភ័ក្រលោក បីនាក់ទៀត បានជួលកាណូតមួយ ពីស្ថានីយ៍ទេសចរណ៍ខេត្តព្រះសីហនុ ដើម្បីចេញទៅលេងក្នុងសមុទ្រខ្មែរ។ ដោយមានជំនួយពីគ្រឿងស្រវឹងផង ពួកលោកបានបាញ់កាំជ្រួចលេងកំសាន្ដ ពីទូកកាណូតនោះ ហើយបានឃុំឃាំង ក្រុមអ្នកធ្វើការនៅលើនោះ នៅក្នុងបន្ទប់មួយបិតជិត មុននឹងបោះអ្នកទាំង៦នាក់នេះ ក្នុងពេលបន្ទាប់មក ចេញពីលើកាណូត ទៅក្នុងទឹកសមុទ្រ។
ក្រោយពីលោកត្រូវបានចាប់ខ្លួន ការចរចារសម្រុះសម្រួលមួយ ត្រូវបានព្រមព្រៀងគ្នា ដោយលោកបានសុខចិត្តសងជម្ងឺចិត្ត ទៅអោយជនរងគ្រោះ ជាប្រាក់សុទ្ធ ក្នុងម្នាក់ៗ១០០០ដុល្លា។ សម្រាប់មិត្តភ័ក្ររបស់លោក សំណងនេះ អាចធ្វើអោយពួកគាត់រួចខ្លួន តែសម្រាប់ខ្លួនលោក សុបិន្តអាក្រក់ នៅតែតាមលងរហូត មកដល់សព្វថ្ងៃនេះ។ ហើយសំនុំរឿង មិនមែនមាននៅតែកម្ពុជាទេ តែទាក់ទងយ៉ាងជ្រៅផង ពីទីក្រុងម៉ូស្គូប្រទេសរ៉ូស្សីឯណោះ។ លោក ស៊ែរហ្គៃ ប៉ូឡូស្គី បានចោទអ្នកចូលហ៊ុន រកទទួលទានជាមួយលោក ថាបានប្រាប់ទៅអាជ្ញាធរខ្មែរ អោយបង្ខាំងខ្លួនលោកក្នុងពន្ធនាគារកម្ពុជា ដោយហេតុមានគោលបំណងចង់ឆ្លៀតឱកាស ពីអវត្តមានរបស់លោក ដើម្បីយកក្រុមហ៊ុនមកកាន់កាប់។
តម្រូវការគ្រូពេទ្យម្នាក់
មូលហេតុនៃការឃុំខ្លួន ប្រហែលជារឿងមួយ មានភាពមិនច្បាស់លាស់។ តែភាពស្ងាត់ស្ងៀមនៃអាជ្ញាធរប្រទេសរ៉ូស្សី ចំពោះសំនុំរឿងនេះ ត្រូវបានគេចោទជាសំនួរឡើង ព្រោះទំនងជាខុសប្លែកឆ្ងាយ ពីសំនុំរឿងរបស់ វិចទ័រ ប៊ូរ (Viktor Bout) ជនរត់ពន្ធអាវុធដ៏ល្បីឈ្មោះ ដែលក្នុងអំឡុងពេលជាប់ឃុំនៅសហរដ្ឋអាមេរិក ត្រូវបានប្រទេសរ៉ូស្សីធ្វើយុទ្ធនាការ ទាមទារអោយដោះលែងជននេះ យ៉ាងខ្លាំងក្លា។
រដ្ឋមន្ត្រីការបរទេសរបស់រ៉ូស្សី លោក ស៊ែរហ្គៃ ឡារ៉ូវ បានការពារខ្លួនថា «ភារកិច្ចរបស់យើង គឺដើម្បីការពារសិទ្ធិ ទៅគ្រប់ជនរួមជាតិរ៉ូស្សីទាំងអស់។ (...) យើងយល់ហើយ ថាគាត់ត្រូវការគ្រូពេទ្យម្នាក់។»
បញ្ហាដែលចោទ សម្រាប់ជនជាតិរ៉ូស្សីជាទូទៅ អាចប្រហែលមកពី អត្តចរិករបស់លោក ស៊ែរហ្គៃ ប៉ូឡូស្គី ខ្លួនឯង ដែលធ្វើអោយគេមិនចូលចិត្ត។ កាលពីឆ្នាំ២០០៨ លោក ស៊ែរហ្គៃ ប៉ូឡូស្គី ធ្លាប់បានទម្លាយពាក្យមួយឃ្លាយ៉ាងចាស់ដៃ ទៅអោយអ្នកដែល«មិនមែនជាមហាសេដ្ឋី» ហើយតាំងពីពេលនោះមក កេរ្តិ៍ឈ្មោះរបស់លោក ត្រូវបានកប់ចោល សឹងតែជាស្ថាពររួចស្រេច៕
-----------------------------------------------
ដោយ ៖ កេសរកូល - ភ្នំពេញ ថ្ងៃទី១៦ ខែមិនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ