ប្រធានអង្គជំនុំជម្រះនៃសាលាឧទ្ធរណ៏ លោក ឃុន លាងម៉េង បានអានសាលដីកាជាសាធារណៈ ប្រកាសម្រេចចោទ​ប្រកាន់លោក ម៉ម សូណង់ដូ ពាក់ពន្ធ័នឹងរឿងព្រៃឈើ និងត្រូវទទួលទោស«ប្រាំឆ្នាំ» ជាផ្លូវការនាព្រឹកថ្ងៃទី១៤ មីនា ឆ្នាំ​២០១៣នេះ ពី«បទញុះញង់ឲ្យមានការកាប់បំផ្លាញព្រៃឈើ»ដោយខុសច្បាប់។ តែទោសនេះ សាលាឧទ្ធណ៍បានកំណត់ ឲ្យលោកប្រធានវិទ្យុសម្បុកឃ្មុំរូបនេះ អនុវត្តទោសក្នុងពន្ធនាគារចំនួន៨ខែ ទោសក្រៅពីនេះព្យួរសាកល្បងចំនួន៣ឆ្នាំ។

លោកម៉ម សូណង់ដូ ពេលត្រូវបញ្ជូនត្រឡប់ទៅ ពន្ធនាគារព្រៃសរវិញ នៅថ្ងៃទី១៤ខែមិនានេះ។ MONOROOM.info Photo/ O. Vary។

ទោះជាមានការលើកលែងទោសយ៉ាងដូច្នេះក៏ដោយ មន្ត្រីអង្គការសង្គមស៊ីវិល ជាតិ និងអន្តរជាតិ មេធាវី រួមទាំងពី​របស់​ជនជាប់ចោទផង បានសម្តែងនូវការមិនសប្បាយចិត្ត ចំពោះការលើក«បទចោទថ្មី»នោះដដែល។ ព្រោះថាលោក ម៉ម សូណង់ដូ នៅតែជា«ជនល្មើស» ជាជនដែល«មានទោស» និងក៏ជាជនដែលត្រូវតុលាការ តាមឃ្លាំមើលដែរ។

លោក ស សូវាន មេធាវីការពារក្តីលោក ម៉ម សូណង់ដូ បានបង្ហាញតាមអង្គហេតុ និងអង្គច្បាប់ថា សាលាឧទ្ធរណ៍ត្រូវ​«ទម្លាក់ចោលបទចោទលើកូនក្តីលោកទាំងស្រុង» ដោយមិនត្រូវបន្ថែមបទចោទលើសាលក្រមរបស់សាលាដំបូងទេ។ លោកបន្តថា លោកនឹងពិភាក្សាជាមួយជនជាប់ចោទ (កូនក្តី) នឹងអាចមាន «បណ្តឹងសាទុក្ខទៅតុលាការកំពូល» មួយ ចំពោះបទចោទថ្មីនេះ ដើម្បីរកយុត្តិធម៌។

សម្រាប់លោក អំ សំអាត មន្ត្រីស៊ើបអង្កេតជាន់ខ្ពស់អង្គការលីកាដូ ដែលបានតាមដានសវនាការនេះ បានបង្ហាញភាព​ខកចិត្ត ចំពោះកាលើកនូវ«បទចោទថ្មី»។ លោកបន្តថា លោកបានធ្វើការកត់សម្គាល់ លើសាលដីកាសាលាឧទ្ធរណ៍​នាថ្ងៃនេះថាជាលទ្ធផល«វិជ្ជមាន»មួយ សម្រាប់ប្រព័ន្ធយុត្តិធម៌នៅកម្ពុជា «តែទោះជាយ៉ាងនេះក្កី លោកម៉ម សូណង់ដូ នៅតែត្រូវទទួលទោស និងការចោទប្រកាន់ដដែល នេះជាការសោកស្តាយដែល មនុស្សមិនបានប្រព្រឹត្តបទល្មើស ហើយត្រូវបានគេចោទប្រកាន់នោះ»។

ចំពោះភរិយាលោក ម៉ម សូណង់ដូ វិញ លោកស្រី ឌិន សុផាន់ណារា ក៏មិនអត្ថាធិប្បាយពីបទចោទប្រកាន់ថ្មីនេះទេ តែ​លោកស្រីបានបង្ហាញនូវភាពរីករាយ លើសាលដីការបស់សាលាឧទ្ធរណ៍ដែលបានកាត់តម្រឹមទោសនេះ។ លោកស្រី​ថ្លែង​ទាំងញញឹមមកកាន់អ្នកសារព័តមានថា «ខ្ញុំដែលជាភរិយាលោក ម៉ម សូណង់ដូ ខ្ញុំមានសេចក្តីរីករាយ ពីព្រោះបានគាត់​ចេញមកក្រៅ។ ហើយកិច្ចការបន្ត តទៅទៀតយ៉ាងណានោះ ជារឿងរបស់មេធាវី។»

ក្នុងដំណើរ ទ្រេតទ្រោត ដោយការគ្រាទប់របស់សន្តិសុខពន្ធនាគារ សំដៅឆ្ពោះទៅរថយន្តដឹកអ្នកទោស ជាមួយនឹង​ការ​ប្រជ្រៀត របស់អ្នកសារព័ត៌មានក្នុងសុំបទសម្ភាសន៍ លោក ម៉ម សូណង់ដូ បានថ្លែងប្រាប់ដោយខ្លីថា នៅថ្ងៃស្អែកនេះ លោកនឹងត្រូវបានដោះលែង ហើយនៅថ្ងៃនោះ លោកនឹងជួបជុំប្រជាពលរដ្ឋដែលគាំទ្រលោក និងអ្នកសារព័ត៌មាន​នៅឯ​ស្រុកកៀនស្វាយ ខេត្តកណ្ដាល (នៅគេហដ្ឋានរបស់លោក)។

រាប់ពីថ្ងៃទី១៥ ខែកក្កដា ឆ្នាំ២០១២ ដែលជាថ្ងៃចាប់ខ្លួន មកទល់នឹងថ្ងៃទី១៤ ខែមីនា ឆ្នាំ២០១៣ ជាថ្ងៃប្រកាសសាលដីកា មានរយៈពេលប្រាំបីខែគត់។ ដូច្នេះបុរសចំណាស់វ័យ៧១ ឆ្នាំរូបនេះ នឹងត្រូវដោះលែងពីពន្ធនាគារនៅថ្ងៃទី១៥ ខែមីនា ស្អែកវេលាម៉ោង ៨ព្រឹក។ មានន័យស្មើនឹងលោកត្រូវដោះលែងឲ្យមាន«សេរីភាព»ឡើងវិញ តែត្រូវស្ថិតនៅក្នុងការតាម​ដានរបស់តុលាការក្នុងរយៈពេលបីឆ្នាំ ដូចជា ត្រូវមានវត្តមានគ្រប់ពេលនៅពេលតុលាការត្រូវការ, ការផ្លាស់ប្តូរលំនៅដ្ឋាន ឬមុខរបរត្រូវជូនដំណឹងដល់តុលាការ និងការធ្វើណើរទៅក្រៅប្រទេសត្រូវមានការអនុញ្ញាតពីតុលាការជាដើម។

បន្ទាប់ពីមានប្រតិកម្មពីមជ្ឈដ្ឋានជាតិ និងអន្តរជាតិ ដូចជាប្រធានាធិបតីសហរដ្ឋអាមេរិក សហភាពអ៊ឺរុប និងនាយករដ្ឋមន្ត្រី​បារាំង សាលាឧទ្ធរណ៏បានប្តូរបទចោទ លើអ្នករិះគន់រដ្ឋាភិបាល មិនសំចៃមាត់រូបនេះពី «បទបង្កើតតំបន់អបគមន៍» នៅ​ខេត្តក្រចេះ ក្នុងរឿងជម្លោះដីធ្លី ទៅជាបទល្មើស«ព្រៃឈើ»វិញ ។ សូមរំលឹកថា លោក ម៉ម សូណង់ដូ ត្រូវបានសាលាដំបូង​រាជធានីភ្នំពេញ បានចេញសាលក្រមផ្តន្ទាទោសលោក ម៉ម សូណង់ដូ ឲ្យជាប់ពន្ធនាគារម្ភៃឆ្នាំ និងពិន័យជាប្រាក់​ដប់លាន​រៀល កាលពីខែតុលាឆ្នាំ២០១២ កន្លងទៅ។

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី១៤ មីនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ