កីឡាករវាយកូនបាល់លេខ១ របស់ពិភពលោក ណូវ៉ាក់ ឌីចូកូវីក (Novak Djokovic) បានយកឈ្នះកីឡាករ គ្រីករ ឌីមីត្រូវ (Grigor Dimitrov) ដោយលទ្ធផល ៧-៦ (៧/៤) និង ៦-១ ហើយអាចបន្តដំណើរទៅជុំទី៤ ជាបន្តទៀត នៃការប្រកួតក្នុងកម្មវិធី អ៊ិនដៀន វ៊ែល អេធីភី ម៉ាស្ទើរ (Indian Wells ATP Masters)។

កាលពីថ្ងៃអង្គារ៏ ឌីចូកូវីក បានធ្វើការសាកល្បងមុនប្រកួត ដោយគាត់ធ្វើបានយ៉ាងល្អ ដែលបញ្ចប់លទ្ធផល ៤-១ និង ៥-៣ ក្នុងការចាប់ផ្តើមវគ្គដំបូង។ ប៉ុន្តែកីឡាករ ឌីមីត្រូវ កីឡាករវ័យក្មេងបំផុត ដែលមានអាយុត្រឹមតែ ២១ឆ្នាំរូបនេះ ធ្វើមិនបាន​ល្អទាល់តែសោះ។

ការប្រកួត៩វគ្គ កីឡាករវ័យក្មេងសញ្ជាតិប៊ុលការី រូបធ្វើឲ្យមានកំហុសឆ្គងដល់ទៅ ៤លើក ហើយក៏បាត់បង់ឱកាស។

នោះជាការចាប់ផ្តើម ដែលកីឡាករ ឌីចូកូវីក ត្រូវការ ហើយកីឡាករឆ្នើមសញ្ជាតិស៊ឺប៊ីរូបនេះ បានវាយបកយកឈ្នះ នៅ​នាទី៦៧។​ ឌីចូកូវីកបាននិយាយថា «ខ្ញុំបានព្យាយាម ដើម្បីមកកាន់ទីនេះ។ ខ្ញុំបានចាប់ផ្តើមដោយខ្សោយបំផុត ហើយ​គាត់ធ្វើបានយ៉ាងល្អ ប៉ុន្តែគាត់ធ្វើឲ្យមានកំហុស៤លើក ដែលធ្វើឲ្យខ្ញុំយកឈ្នះបានសម្រេច។»

គាត់បានបន្ថែមថា «គាត់មានកំហុសជាច្រើន ហើយខ្ញុំគ្រាន់តែធ្វើយ៉ាងណា យកគ្រាប់បាល់មកទីលាន និងធ្វើឲ្យបានល្អ​តែប៉ុណ្ណោះ។»

កីឡាករ ឌីចូកូវីក ធ្វើបានយ៉ាងល្អ ដែលទទួលបានលទ្ធផល ១៥-០ ក្នុងឆ្នាំ ២០១៣ ហើយ ២០-0 គិតចាប់ពីថ្ងៃទី៣១ ខែ​តុលា ឆ្នាំ២០១២ នៅពេលដែលគាត់ប្រកួតចាញ់កីឡាករអាមេរិក សាម ឃ្វើរី (Sam Querrey) ក្នុងកម្មវិធី ប៉ារីសម៉ាស្ទើរ (Paris Masters)។

ក្នុងជុំទី៤ កីឡាករ ឌីចូកូវីក មានឱកាសដើម្បីធ្វើការសងសឹកជាមួយនឹងកីឡាករ ឃ្វើរី ដែលនឹងត្រូវជួបគ្នាក្នុងជុំនោះ។ កីឡាករ ឃ្វើរី បានបំបាក់កីឡាករអូស្រ្តាលី ម៉ារីនកូ ម៉ាតូសេវីក (Marinko Matosevic) ដោយលទ្ធផល ៧- ៦ (៧/៥), ៦-៧ (៧/៩) និង៧-៥ ក្នុងជុំទី៣៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១៣ ខែមិនា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ