បន្ទាប់ពីត្រូវក្រុម ម៉ិចសិក ពញ៉ាក់ដោយគ្រាប់បាល់ ១-០ មុននឹងយកឈ្នះ ទាំងប្រផិតប្រផើយ ទល់នឹងក្រុម ស៊ុយអែដ ដោយគ្រាប់បាល់ ១-២ នោះ ក្រុមបាល់ទាត់ម្ចាស់ពាន ឆ្នាំ២០១៤ ត្រូវបានក្រុមជម្រើសជាតិមួយ មកពីប្រទេសអាស៊ីខាងកើត ចាក់ក្រឡេកឲ្យដួលបះជើង ក្នុងគ្រាប់បាល់ ០-២។ ក្រុមបាល់ទាត់ អាល្លឺម៉ង់ បានប្រកួតចាញ់ក្រុម កូរ៉េខាងត្បូង និងត្រូវបានផាត់ចេញ ពីព្រឹត្តិការណ៍ពិភពលោក ឆ្នាំនេះ តាំងពីក្នុងវគ្គជម្រុះតាមពូល។ ជាព្រឹត្តិការណ៍ដំបូង នៃប្រវត្តិ​បាល់ទាត់​អាល្លឺម៉ង់ រាប់ចាប់តាំងពីឆ្នាំ ១៩៣៨។

នៅចំពោះជញ្ជាំងការពារ ដ៏ក្រាសឃ្មឹក និងអ្នកចាំទីដៃស្អិត របស់ក្រុមបាល់ទាត់ មកពីអាស៊ីខាងកើត ក្រុមម្ចាស់ពានពិភពលោក រកមិនឃើញចន្លោះ ដើម្បីរកគ្រាប់បាល់សោះឡើយ សឹងតែនៅពេញ ការប្រកួតទាំងមូល។ នេះ បើទោះជាគ្រូដឹកនាំក្រុម អាល្លឺម៉ង់ បានដាក់ក្រឡាទាត់ ដោយឲ្យទម្ងន់យ៉ាងខ្លាំង ទៅលើខ្សែប្រយុទ្ធនោះក៏ដោយ។

អាជ្ញាកណ្ដាលវីដេអូ ជាមូលហេតុមួយ...

បើទោះជាមេឃ នៅប្រទេសរ៉ូស្ស៊ី មិនទាន់យប់ខ្លាំងក៏ដោយ តែស្បៃអន្ធកាល​ដ៏ងងឹតចាក់ភ្នែក បានគ្របដណ្ដប់រួចហើយ ទៅលើក្រុមអាល្លឺម៉ង់ បន្ទាប់ពីគ្រាប់បាល់ទាំងពីរ របស់ក្រុមកូរ៉េ ត្រូវរកបាន​រវាងគ្នា តែបីនាទី នៅក្នុងម៉ោងបន្ថែមចុងក្រោយ នៃការប្រកួត។ គ្រាប់បាល់​ដំបូង រកបានដោយកីឡាករ «Young-Kwon Kim» នៅនាទីទី ៩០+២។ ក្នុងពេលភ្លាមៗ អាជ្ញាកណ្ដាលបានបដិសេធគ្រាប់បាល់នេះ ដោយគិតថា ជាគ្រាប់បាល់ «ចងមុង» របស់កីឡាករកូរ៉េ។ ប៉ុន្តែបន្ទាប់ពីបានទស្សនារូបភាព នៃអាជ្ញាកណ្ដាលវីដេអូរួច អាជ្ញាកណ្ដាលនៃការប្រកួត បានសម្រេច​ប្រគល់គ្រាប់បាល់នេះ ឲ្យទៅក្រុម កូរ៉េខាងត្បូង (១-០) នៅនាទីទី ៩០+៣។

រីឯគ្រាប់បាល់ទីពីរ របស់ក្រុម កូរ៉េខាងត្បូង រកបាននៅនាទីទី ៩០+៦ ដោយកីឡាករ «Heung-Min Son» ដែលបានទាត់បាល់មួយគ្រាប់នេះ បញ្ចូលទីដែលគ្មានអ្នកចាំ ដោយហេតុថា កីឡាករ «Manuel Neuer» អ្នកចាំទីអាល្លឺម៉ង់ ដែលទំនង​ជា​ចង់​ជួយ​​រកគ្រាប់បាល់ ឲ្យបានស្មើក្រុម កូរ៉េ វិញ បានឡើងទៅលើ ដើម្បីពង្រឹកខ្សែប្រយុទ្ធរបស់ខ្លួន នៅនាទីចុងក្រោយ។ តែកីឡាករចាំទីអាល្លឺម៉ង់​ដ៏ល្បី បានដណ្ដើមបាល់ ចាញ់ខ្សែបម្រើកូរ៉េ បណ្ដាលឲ្យខ្សែបម្រើរូបនោះ បញ្ជូនបាល់​មកឲ្យ​ខ្សែប្រយុទ្ធ របស់ខ្លួនយ៉ាងងាយ។ កីឡាករ «Heung-Min Son» ដែលជាខ្សែប្រយុទ្ធកូរ៉េ គ្រាន់តែរត់តាមបាល់ ហើយឆ្កឹះបង្ហើយ ដាក់បញ្ចូលទី ដែលគ្មានអ្នកចាំ ជាការស្រេច សម្រាប់គ្រាប់បាល់ ២-០។

» វីដេអូសង្ខេប នៃការប្រកួតរវាងក្រុម កូរ៉េខាងត្បូង និងក្រុម អាល្លឺម៉ង់៖

តាមពិតទៅម្ចាស់ពានរង្វាន់ជំនាន់មុន ដែលបានហាលអាវ តាំងពីក្នុងវគ្គជម្រុះតាមពូលដូចនេះ មិនមែនមានតែក្រុមអាល្លឺម៉ង់លើកនេះទេ។ ក្រុមបាល់ទាត់បារាំង (ជម្រុះចេញ នៅឆ្នាំ២០០២) អ៊ីតាលី (ជម្រុះចេញ នៅឆ្នាំ២០១០) និងអេស្ប៉ាញ (ជម្រុះចេញ នៅឆ្នាំ២០១៤) ដែលសុទ្ធសឹងជាម្ចាស់ពាន​បាល់ទាត់ពិភពលោក (មួយជំនាន់មុន) ក៏ធ្លាប់ទទួលបានរសជាតិ នូវការផាត់​ចេញតាមទ្វាតូច ដែលមិននឹកស្មានដល់​ដូច្នេះដែរ។

នៅក្នុងការប្រកួតមួយទៀត នៃពូល F នេះដដែល ក្រុម ស៊ុយអែដ បានលត់ក្រុម ម៉ិចសិក ដោយគ្រាប់បាល់ ៣-០ ហើយទទួលបានបីពិន្ទុ (៦ពិន្ទុសរុប) ឡើងមកកាន់កាប់​ចំណាត់ថ្នាក់​ទីមួយ នាំមុខក្រុម ម៉ិចសិក វិញ ដែលមាន៦ពិន្ទុដែរ តែចាញ់ចំនួនគ្រាប់បាល់។ យ៉ាងណា ក្រុម​ដែលបាន​ឡើងវគ្គ គឺក្រុម ស៊ុយអែដ និង ម៉ិចសិក ដែលទទួលបាន ៦ពិន្ទុដូចគ្នា ដោយសារតែក្រុម កូរ៉េខាងត្បូង និងក្រុម អាល្លឺម៉ង់ រកបាន​ត្រឹមតែ ៣ពិន្ទុ ដូចគ្នាប៉ុណ្ណោះ។

» វីដេអូសង្ខេប នៃការប្រកួតរវាងក្រុម ម៉ិចសិក និងក្រុម ស៊ុយអែដ៖

សូមបញ្ជាក់ថា ដោយសារភាពខុសគ្នា នៃគ្រាប់បាល់ និងពិន្ទុដ៏ប្រកិតគ្នា រវាងក្រុមទាំងបួន នៅក្នុងពូល F នេះ សំបុត្រឆ្លងវគ្គអាចត្រូវធ្លាក់ ទៅឲ្យក្រុមបាល់ទាត់​ពីរ ទៅតាមភាពខុសគ្នានៃជ័យជំនះ​ ដែលចេញពីការប្រកួតទាំងពីរ ហើយដែលអាចបង្ក ឲ្យមានការភ្ញាក់ផ្អើល។

ជាផ្លូវការ គឺក្រុម ស៊ុយអែដ និងម៉ិចសិក ជាអ្នកបានឡើងវគ្គ។ តែក្នុងករណី កូរ៉េខាងត្បូង យកឈ្នះលើ អាល្លឺម៉ង់ ជាមួយគ្រាប់បាល់ ២-០ ហើយ ម៉ិចសិក យកឈ្នះលើ ស៊ុយអែដ ត្រឹមតែ ១-០ នោះ គឺក្រុម ម៉ិចសិក និង កូរ៉េខាងត្បូង ដែលត្រូវទទួលសំបុត្រឆ្លងវគ្គ។ ផ្ទុយទៅវិញ ក្នុងករណី ស៊ុយអែដ យកឈ្នះលើ ម៉ិចសិក ត្រឹមតែ ២-០ ហើយ អាល្លឺម៉ង់ យកឈ្នះលើ កូរ៉េខាងត្បូង ត្រឹមតែ ១-០ នោះ គឺក្រុម ស៊ុយអែដ និង អាល្លឺម៉ង់ ជាអ្នកត្រូវឡើង ទៅទាត់នៅវគ្គខាងលើ ជាបន្ត។ នេះហើយ ជាបាល់ទាត់៕