ខណៈកញ្ញា ស៊ិន ចាន់ពៅរ៉ូហ្សេត ចៅសង្កាត់ក្រមុំ នៅសង្កាត់អូរចា ក្រុងបាត់ដំបង អះអាងថា វត្តមានរបស់លោក វីល្លៀម ហេត (William A. Heidt) និងភរិយា ដែលបានចូលជួបជជែក និងទទួលទានអាហារ​ជាមួយនាង កាលពីថ្ងៃទី២៩ ខែសីហា ឆ្នាំ២០១៧នេះ ថាជាការផ្ដល់«កម្លាំងចិត្ត» ដល់រូបនាងនោះ តែសម្រាប់លោក ឈាង វុន តំណាងរាស្ត្រ មកពីគណបក្សប្រជាជនកម្ពុជាវិញ បានគិតថា វត្តមានរបស់មន្ត្រីការទូតអាមេរិក នៅទីនោះ ដោយសាររូបលោក ជាអ្នក«បុកធ្លាយ​ដល់ស្ថានទូតអាមេរិក»។

សមាជិកសភា និងជាអ្នកនាំពាក្យ មកពីគណបក្សកាន់អំណាច បានសរសេរ នៅលើទំព័រហ្វេសប៊ុករបស់លោក កាលពីម្សិលម៉ិញថា៖ «អូរចារត្រូវខ្ញុំបុកធ្លាយ ដល់ស្ថានទូតអាមេរិកហើយ។​ ទូតអាមេរិកភ័យឆោឡោ មកលើកទឹកចិត្ត (លេស) ចៅសង្កាត់ក្រមុំ​ Rozeth ដល់ផ្ទះ។»។

លោក ឈាង វុន បានសរសេរសួរ បែប«ដៀមដាម»ថា៖ «មកលើកទឹកចិត្ត​ ឫមកពន្យល់ណែនាំ​ ឫមកផ្តល់ហិរញ្ញវត្ថុ​?»។ ហើយលោកបានឆ្លើយ ដោយខ្លួនឯងថា៖ «សំនួរគ្មានចម្លើយ [នៅ]​ថ្ងៃនេះ តែ​ ..... នៅថ្ងៃក្រោយ»។

តែការលើកឡើង របស់អ្នកតំណាងរាស្ត្រ មកពីគណបក្សសម្លេងភាគច្រើន មានលក្ខណៈផ្ទុយពីសារ ដែលចៅសង្កាត់អូរចា បានបង្ហោះសារនៅក្រោយជំនួប ជាមួយលោក វីល្លៀម ហេត។ កញ្ញា ស៊ិន ចៅពៅរ៉ូហ្សេត បានសរសេរដោយក្ដីរំភើបថា នាងបានចូលបម្រើការងារ ត្រឹមតែ៤៥ថ្ងៃ តែនាងទទួលបានការផ្តល់កិត្តិយស ដ៍ខ្ពង់ខ្ពស់ ពីឯកអគ្គរដ្ឋទូត របស់ប្រទេសមហាអំណាចរួចជាស្រេច។

កញ្ញាជឿថា៖ «[នោះ] ក៏ព្រោះដោយសារតែគុណតម្លៃ នៃការបំរើប្រជាពលរដ្ឋរបស់ខ្ញុំ ដោយតំកល់ទុកជីវិតមនុស្ស សេចក្តីថ្លៃថ្នូរ​របស់មនុស្ស និងសេរីភាពរបស់មនុស្ស ស្របទៅតាមគោលការណ៍​ប្រជាធិបតេយ្យពិតប្រាកដ»។

ជាមួយរូបថតពែងទឹកមួយ ដែលជាអំណោយរបស់លោក វីល្លៀម ហេត ចៅសង្កាត់ក្រមុំ បានសរសេរផ្ញើរសារ ដោយប្រយោលថា៖ «ដូច្នេះរង្វាន់ (កាដូ) ដែលឯកអគ្គរដ្ឋទូតសហរដ្ឋអាមេរិក បានផ្តល់ឲ្យខ្ញុំថ្ងៃនេះ មិនមែនស្ថិតនៅលើតម្លៃ នៃកាដូមួយនេះទេ គឺវាស្ថិតនៅលើគុណតម្លៃ នៃការផ្តល់នូវ "កម្លាំងចិត្ត" ដ៏ថ្លៃថ្លា ចំពោះរូបខ្ញុំ ស្ថិតក្នុងន័យបញ្ជាក់ យ៉ាងច្បាស់ថា "ខ្ញុំមិននៅឯកោទេ"»៕