គណកម្មការចម្រុះមានឯករាជ្យភាព ដែលស្មើឲ្យបង្កើតដោយគណបក្សសង្គ្រោះជាតិ ដើម្បីស៊ើបអង្កេតពីភាពមិនប្រក្រតី ក្នុងដំណើរការបោះឆ្នោតបង្កើតបានឬអត់ គឺអាស្រ័យលើគណបក្សប្រជាជនកម្ពុជា និងគណៈកម្មាធិការជាតិរៀបចំការ​បោះឆ្នោត គ.ជ.ប។

ការបោះឆ្នោតរបស់ពលរដ្ឋកម្ពុជា នៅមណ្ឌលវត្តវង្គត្តបូរី​ ថ្ងៃទី២៨ខែកក្កដា។ (រូបថត MONOROOM.info/ O.Vary)

លោក យឹម សុវណ្ណ អ្នកនាំពាក្យគណបក្សសង្រ្គោះជាតិបានថ្លែងប្រាប់មនោរម្យព័ងអាំងហ្វូ នៅថ្ងៃទី២ ខែ​សីហា នេះថា៖ «គណបក្សសង្រ្គោះជាតិ ជាអ្នកស្មើឲ្យបង្កើតគណកម្មការចម្រុះ ហើយការបង្កើតអាចទៅរួចឬអត់ គឺអាស្រ័យ​លើ​គណបក្សកាន់អំណាចនិង គ.ជ.ប»។

មន្រ្តីអ្នកនាំពាក្យរូបនេះ បានបន្តថាអង្គការសហប្រជាតិ និងអង្គការសង្គមស៊ីវិលមិនបានជំទាស់ ចំពោះការស្មើសុំនេះទេ ខណៈដែលមានប្រជាពលរដ្ឋជាងមួយលាននាក់ បានបាត់ឈ្មោះមិនបានចូលរួមការបោះឆ្នោត ហើយពួកគេត្រូវការ​យុត្តិធម៌។

គណកៈម្មាធិការជាតិរៀបចំការបោះឆ្នោត កន្លងមកបានបដិសេធ ចំពោះការបង្កើតគណកម្មការចម្រុះ ដោយលើក​ហេតុផលថាវាមិនមែនជាសមត្ថកិច្ចរបស់ គ.ជ.ប។

ឯអនុប្រធានគណបក្សប្រជាជនកម្ពុជា ដែលជាគណបក្សកាន់អំណាចលោក ហ៊ុន សែន កាលពីថ្ងៃទី៣១ ខែកក្កដា​ឆ្នាំ២០១៣ បានបង្ហាញការគាំទ្រ ចំពោះការបង្កើតគណកម្មការចម្រុះ សម្រាប់ធ្វើការស៊ើបអង្កេតប្រកបដោយតម្លាភាព ដែលអាចទទួលយកបានទាំងអស់គ្នា។

តែលោកបានបញ្ជាក់ថាមន្រ្តីជាន់ខ្ពស់បីរូប របស់គណបក្សប្រជាជនកម្ពុជារួមមាន លោក ស ខេង លោក សុខ អាន និងលោក សាយ ឈុំ នឹងធ្វើជាតំណាងទៅធ្វើការចរចារ ជាមួយគណបក្សសង្រ្គោះជាតិ។ ទន្ទឹមនឹងនេះដែរលោក ហ៊ុន សែន សង្កត់ធ្ងន់ថា រូបលោកអាចនឹងជួបចរចារផ្ទាល់ ជាមួយប្រធានគណបក្សសង្រ្គោះជាតិ លោក សម រង្ស៊ី ក្នុងករណី​ចាំបាច់។

ថ្មីៗនេះលោក កឹម សុខា អនុប្រធានគណបក្សសង្រ្គោះជាតិបានថ្លែងប្រាប់ កាសែតភ្នំពេញប៉ុស្តិ៍ថា៖ «យើងនឹងមិនចរចារ​ជាមួយគណបក្សប្រជាជនទេ ប្រសិនបើមិនបានបង្កើតគណកម្មការចម្រុះ ដែលមានការចូលរួមពីគណបក្សនយោបាយ អង្គការជាតិនិងអន្តរជាតិទេនោះ»។

លោក ព្រាប កុល ប្រធានអង្គការតម្លាភាពកម្ពុជា បានពន្យល់ថាប្រសិនបើរដ្ឋាភិបាល និងគ.ជ.ប ចង់ឲ្យពលរដ្ឋខ្មែរជា​ម្ចាស់ឆ្នោត និងពិភពលោកទាំងមូល មានការជឿជាក់លើភាពស្មោះត្រង់ សុចរិទ្ធភាព។ ពួកគេគួតែបើកច្រកឲ្យមានការ​ស៊ើបអង្កេតដោយឯករាជ្យនិងពហុភាគី។ ផ្ទុយមកវិញបើពួកគេចង់ទុកឲ្យប្រជាពលរដ្ឋ មានមន្ទិលសង្ស័យ មានការ​ចោទ​ប្រកាន់ និងមិនមានការជឿជាក់លើ​ដំណើរការបោះឆ្នោត ពួកគេមិនបាច់បើកឲ្យមានការស៊ើបអង្កេតនោះទេ។

នៅថ្ងៃទី២ ខែសីហា ឆ្នាំ២០១៣ ក្នុងឱកាសជួបសំណេះសំណាលជាមួយ ប្រជាពលរដ្ឋនៅខេត្តកណ្តាលលោក ហ៊ុន សែន ថ្លែងថា៖ «ការដោះស្រាយបញ្ហា គឺមានតែការចរចាគ្នា រវាងគណបក្សដែលមានអាសនៈនៅក្នុងរដ្ឋសភា តាមរយៈ​ការ​បែងចែកមុខតំណែង»។

លោក ហ៊ុន សែន បានអះអាងថាគណបក្សប្រជាជនកម្ពុជាបាន ឈ្នះសំឡេងច្រើនលើសលប់ សម្រាប់ការបោះឆ្នោត​នេះ។ តែលោកមិនបាន បញ្ជាក់ពីចំនួនអាសនៈថាមានចំនួនប៉ុន្មាននោះទេ ដោយទុកជូនគណៈកម្មាធិការជាតិរៀបចំ​ការ​បោះឆ្នោត ជាអ្នកប្រកាស ។

--------------------------------------------------------
ដោយៈ អ៊ុំ បូរី - ភ្នំពេញថ្ងៃទី២ ខែសីហា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ