កែវ រ៉េមី ថាការថ្លែងវាយក្បាលនឹង«គល់ឫស្សី» ជាការអប់រំ
- ដោយ: មនោរម្យ.អាំងហ្វូ ([email protected]) - ភ្នំពេញ ថ្ងៃទី០៨ សីហា ២០១៧
- កែប្រែចុងក្រោយ: August 08, 2017
- ប្រធានបទ: នយោបាយខ្មែរ
- អត្ថបទ: មានបញ្ហា?
- មតិ-យោបល់
-
លោក កែវ រ៉េមី ប្រធានគណៈកម្មកាធិការសិទ្ធិមនុស្សកម្ពុជា បានចេញមុខនៅថ្ងៃទី០៨ ខែសីហា ឆ្នាំ២០១៧នេះ ការពារលោក វង សូត រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា ចំពោះការលើកឡើងរបស់រដ្ឋមន្ត្រីរូបនេះ កាលពីសប្តាហ៍មុន ដែលថានឹងវាយក្បាលបាតុករ ដែលតវ៉ាចំពោះ លទ្ធផលនៃការបោះឆ្នោត ឆ្នាំ២០១៨ ដោយ«គល់ឫស្សី»។ លោក កែវ រ៉េមី បានអះអាងថា ការថ្លែងរបស់លោក វង សូត មិនមែនជាការគំរាមនោះទេ ប៉ុន្តែជាការអប់រំតាមច្បាប់ប៉ុណ្ណោះ។
ការថ្លែងការពាររបស់អតីតមន្ត្រីចុះចូល ដែលទទួលតំណែង ជាប្រធានគណៈកម្មាធិការសិទ្ធិមុំនុស្សរូបនេះ បានធ្វើឡើងទៅកាន់ក្រុមអ្នកសារព័ត៌មាន ក្នុងអាគាររបស់គណៈកម្មាធិការសិទ្ធិមនុស្សកម្ពុជា នៅព្រឹកថ្ងៃទី០៨ ខែសីហា ឆ្នាំ២០១៧នេះ បន្ទាប់ពីលោកទទួលជួបអ្នកស្រី រ៉ូណា ស្មីត (Rhona Smith) អ្នករាយការណ៍ពិសេស របស់អង្គការសហប្រជាជាតិ ទទួលបន្ទុកផ្នែកសិទ្ធិមនុស្ស ដែលបាន និងកំពុងបំពេញទស្សនកិច្ច នៅកម្ពុជាជាថ្មី សម្រាប់រយៈពេល១០ថ្ងៃ។
នៅក្នុងជំនួបនោះ អ្នកស្រី រ៉ូណា ស្មីត បានសម្តែង ពីការព្រួយបារម្ភ របស់អង្គការសហប្រជាជាតិ និងពីការប៉ះពាល់ ដល់សិទ្ធិមនុស្សនៅកម្ពុជា នៅចំពោះការថ្លែង របស់លោក វង សូត ដែលថានឹងយក «គល់ឬស្សីវាយក្បាល» បាតុករ ប្រសិនជាមានការតវ៉ា ទៅនឹងលទ្ធផលឆ្នោតឆ្នាំ២០១៨ខាងមុខ។
លោក កែវ រ៉េមី បានច្រានចោល ការព្រួយបារម្ភខាងលើ និងរាល់ការប៉ះពាល់ ដល់បញ្ហាសិទ្ធិមនុស្ស នៅកម្ពុជា ដោយបញ្ជាក់ថា ការលើកឡើងរបស់ លោក វង សូត គឺជា«ការអប់រំ»ជាមុន ទៅដល់អ្នកមិនទទួលស្គាល់ លទ្ធផលបោះឆ្នោត និងមិនមែន ជាការគំរាមកំហែងអ្វីទេ។ អតីតមន្ត្រីបក្សប្រឆាំងរូបនេះ បានហៅការលើកឡើង របស់លោក វង សូត នោះថា គ្រាន់ជាទង្វើ«គួរឲ្យភ័យខ្លាច» សម្រាប់តែ«វិស័យសិទ្ធិមនុស្ស»មួយប៉ុណ្ណោះ។
លោកនិយាយឡើងថា៖ «គ្រាន់តែថា ពាក្យសំដីរបស់គាត់ វាធ្វើឲ្យមានប្រតិកម្មមួយ ក្នុងវិស័យសិទ្ធិមនុស្ស ក៏ប៉ុន្តែលក្ខណៈរបស់រដ្ឋមន្ត្រី ដែលលើកឡើងនោះ គាត់ជាមនុស្សស្លូតបូត។ ក៏ប៉ុន្តែគាត់ទទួលស្គាល់ថា គាត់ជាមនុស្សស្លូតបូតមែន តែការលើកឡើងនោះ មិនគួរឲ្យមានប្រតិកម្មភ័យខ្លាច អញ្ចឹងទេ។ តែខ្ញុំបាននិយាយថា ក្នុងលទ្ធភាព នៃការភ័យខ្លាចក្នុងវិស័យសិទ្ធិមនុស្ស ខ្ញុំទទួលស្គាល់ក្នុងតួនាទីរបស់លោកជំទាវ រ៉ូណា ស្មីត ដែលធ្វើកិច្ចការនៅក្នុងវិស័យសិទ្ធិមនុស្ស វាជារឿងធម្មតា។»។
ក្នុងកិច្ចប្រជុំផ្ទៃក្នុងមួយ របស់ក្រសួងសង្គមកិច្ច កាលពីចុងខែកក្កដាកន្លងទៅ លោករដ្ឋមន្ត្រី វង សូត បានថ្លែងថា នឹងសំពងក្បាលអ្នកតវ៉ា ទៅនឹងលទ្ធផលនៃការបោះឆ្នោត នាឆ្នាំខាងមុខ ដោយប្រើ «គល់ឬស្សី»។ លោករដ្ឋមន្ត្រី ត្រូវបានស្រង់សំដី យកមកចុះផ្សាយដូច្នេះថា៖ «គណបក្សប្រឆាំងនិយាយថា គណបក្សប្រជាជនកម្ពុជា ជាពិសេសសម្ដេច ហ៊ុន សែន ធ្វើអីតាមអំពើចិត្ត... អេ តាមអំពើចិត្ត ប៉ុន្តែមានច្បាប់ធ្វើតាមច្បាប់ ច្បាប់ប្រគល់ឱ្យគាត់ នូវអំណាច អ្នកធ្វើខុសច្បាប់ ចាប់ដាក់គុក។ បោះឆ្នោតលើកនេះ បើមានបញ្ហាតវ៉ាទៀត ត្រូវក្បាលម៉ាគល់ឫស្សីហើយ ច្បាស់អ៊ីចឹងហ្មង អត់មាន បើកសិទ្ធិឲ្យតវ៉ាអីទេ។»។
ក្រោយការលើកឡើងនោះ ប្រតិកម្មបានផ្ទុះឡើងព្រោងព្រាត និងជាបន្តបន្ទាប់ ពីមជ្ឍដ្ឋានជាតិ និងអន្តរជាតិ។ ក្រសួងសង្គមកិច្ច ក៏បានចេញមុខ មកបញ្ជាក់ដែរ តាមរយៈសេចក្ដីថ្លែងការណ៍មួយរបស់ខ្លួនថា នោះមិនមែនជាការគំរាមកំហែងទេ តែជាការដាស់តឿន ក្រើនរំលឹក និងជាការជម្រុញ ដល់ការធានាសន្តិសុខ ដល់ការបោះឆ្នោត នៅកម្ពុជានាពេលខាងមុខ។
ចំពោះការលើកឡើង របស់លោក កែវ រ៉េមី ប្រធានគណៈកម្មាធិការសិទ្ធិមនុស្សវិញ ត្រូវបានលោក មុត ចន្ថា មន្ត្រីជាន់ខ្ពស់ របស់គណបក្សសង្គ្រោះជាតិ សំដែងការសោកស្ដាយ និងពន្យល់ថា ពាក្យទាំងនេះ ទំនងមានតែនៅក្នុងវចនានុក្រម នៃរបបខ្មែរក្រហមប៉ុណ្ណោះ។ មន្ត្រីស្និតនឹងប្រធានគណបក្សសង្គ្រោះជាតិរូបនេះ បានសរសេរនៅមុននេះបន្តិច នៅលើបណ្ដាញសង្កមថា៖ «តើមានចែងទេ នៅក្នុងច្បាប់ ច្បាប់ក្រមងុយ ឬព្រះពុទ្ធសាសនា ដែល[ថា] ការគំរាមវាយក្បាលនឹងគល់ឬស្សី ជាការអប់រំ ឬដាស់តឿននោះ? តាមដឹងពាក្យគំរាមនេះ ទំនងជាមាន តែនៅក្នុងវចនានុក្រម នៃរបបកម្ពុជាប្រជាធិបតេយ្យ ឬខ្មែរក្រហម ប៉ុល ពត ប៉ុណ្ណោះ។»។
លោក មុត ចន្ថា បានបន្តទៀតថា៖ «ការគំរាមប្រើ គល់ឬស្សីវាយក្បាល ជាពាក្យសំដីមិនសមរម្យ ដែលទាំងផ្លូវអាណាចក្រ និងពុទ្ធចក្រ ហាមឃាត់»៕