រដ្ឋាភិបាលកម្ពុជា បានសារភាពពីកង្វល់របស់ខ្លួន នៅថ្ងៃអង្គារទី២៦កុម្ភះ នៅចំពោះកំណើនឡើងវិញ នៃជម្ងឺផ្ដាសាយ​បក្សី​នៅក្នុងប្រទេស។ ជម្ងឺដ៏ប្រល័យបានសម្លាប់ ជនរងគ្រោះកម្ពុជា ចំនួន៨នាក់រួចហើយ រាប់ពីដើមឆ្នាំ២០១៣នេះមក  ហើយ​បានបង្ហាញនូវកំរិតដ៏ខ្ពស់មួយ។

សត្វស្លាប នៅជនបទកម្ពុជា។

បញ្ហានេះ ត្រូវបានសារព័ត៌មានក្នុងស្រុកជាទូទៅ លែងយកចិត្តទុកដាក់ទៅហើយ តែផ្ទុយទៅវិញ ជម្ងឺផ្ដាសាយបក្សីនេះ ជាសត្រូវលាក់មុខ ដ៏ស្រួចស្រាវមួយ ដែលរស់នៅ«ជិតនឹងរូបអ្នក»គ្រប់ៗគ្នា អាចនឹងបង្កអោយរូបអ្នក «មានគ្រោះថ្នាក់»​គ្រប់វិនាទីទាំងអស់។

បុរសអាយុ៣៥ឆ្នាំ បានស្លាប់ម្នាក់ទៀត នៅថ្ងៃអង្គារដដែលនេះ បន្ទាប់ពីបានឆ្លងជម្ងឺនេះ នៅក្នុងខេត្តប៉ែកពាយ័ព្យ​នៃ​ប្រទេស ដែលធ្វើអោយតួរលេខជាផ្លូវការ បានឡើងដល់៩នាក់ ហើយ៨នាក់បានស្លាប់។ ប្រទេសកម្ពុជាដែលមានចំនួន​អ្នកជម្ងឺបានឆ្លងជម្ងឺ ចំនួន៣០ករណី ហើយមានមនុស្សតែបីនាក់ប៉ុណ្ណោះ ដែលបានរួចរស់មានជីវិត រាប់ពីឆ្នាំ២០០៣ ឆ្នាំ​ដែលជម្ងឺនេះបានកម្រើកខ្លាំងជាងគេ ក្នុងពិភពលោក។

លី សុវណ្ណ នាយករងការិយាល័យ ត្រួតពិនិត្យជម្ងឺឆ្លង នៃក្រសួងសុខាភិបាលកម្ពុជា បានថ្លែងប្រាប់ទីភ្នាក់ងារ​សារព័ត៌មាន​បារាំង អាអេហ្វប៉េ (AFP) ថា «យើង ពិតជាមានការព្រួយបារម្ភខ្លាំងណាស់ ពីស្ថានភាពនេះ»។ «មានសត្វស្លាបជាច្រើន ដែលបានស្លាប់ តែបណ្ដាជនមិនបានដឹងពីគ្រោះថ្នាក់ ដែលកើតចេញពីសត្វស្លាប់ទាំងនេះទេ» ជាការពន្យល់របស់លោក ដោយបានបន្ថែម ព័ត៌មានខ្លះ មានរយះពេល«មួយខែ» ទើបបានទៅដល់ដៃអ្នកទទួលខុសត្រូវ និងមានសមត្ថភាព​នៅ​ប្រចាំតំបន់។

«នៅក្នុងភូមឃុំដែលខ្ញុំបានធ្វើដំណើរទៅដល់ សត្វស្លាបទាំងនោះ បានស្លាប់ទាំងអស់» លោកលី សុវណ្ណបានបន្ថែម។

អង្គការសុខភាពពិភពលោក (OMS) នៅតែមានសុទិដ្ឋិនិយមថា ស្ថានភាព នៅអាចគ្រប់គ្រងបាននៅឡើយ។ អ្នកនាំ​ពាក្យ​របស់ការិយាល័យរបស់អង្គការនេះ ប្រចាំនៅទីក្រុងភ្នំពេញ លោក សូនី គ្រីស្នា (Sonny Krishna) បាននិយាយថា «នៅ​មិនទាន់រកឃើញថា មានការចម្លងពីមនុស្សទៅមនុស្សនៅឡើយ» តែចាំបាច់ ត្រូវមានភាពប្រុងប្រយ័ត្ន នៅក្នុងខេត្ត​ដែល​ករណីជម្ងឺនេះ បានកើតមានឡើង។

«មេរោគ H5N1 ជាការគម្រាមមួយ យ៉ាងខ្លាំង សម្រាប់សុខភាពរបស់ប្រជាជនកម្ពុជា ជាពិសេសទៅលើកុមារ» នេះជាការ​អោយដឹង របស់រដ្ឋមន្ត្រីក្រសួងសុខាភិបាល លោកម៉ម ប៊ុនហេង នៅក្នុងសេចក្ដីប្រកាសព័ត៌មានមួយ ចេញផ្សាយ​ពី​ប៉ុន្មាន​ថ្ងៃមុន។

ជម្ងឺបានសម្លាប់មនុស្សប្រមាណជា ៣៦០នាក់ តាំងពីឆ្នាំ២០០៣។ សូមបញ្ជាក់ថា នៅប្រទេសចិន ក្នុងខែកុម្ភះនេះដដែល បុរសម្នាក់អាយុ៣១ឆ្នាំ ក៏បានស្លាប់នឹងជម្ងឺនេះដែរ។ អាជ្ញាធរសុខភាព ប្រចាំខេត្តជឺហ្សាង (Guizhou) របស់ចិន បានរាយ​ការណ៍ ពីករណីស្លាប់នេះ  នៅក្នុងមន្ទីរពេទ្យជឺយ៉ាង (Guiyang) ៩ថ្ងៃក្រោយបន្ទាប់ ពីករណីមួយមុន បានសម្លាប់ស្ត្រី​ម្នាក់​អាយុ ២១ឆ្នាំរួចមកហើយ។

នៅក្នុងពេលបច្ចុប្បន្ន ជម្ងឺនេះ ត្រូវបានគេរកឃើញថា បានចម្លងពីសត្វស្លាប មកមនុស្សតែប៉ុណ្ណោះ។ តែអ្នកវិទ្យាសាស្ត្រ និងអ្នកស្រាវជ្រាវ បង្ហាញការព្រួយបារម្ភថា បើវាអាចចម្លងពីមនុស្សទៅមនុស្ស នៅពេលនោះ នឹងបើកយុគ​សម័យ​នៃ​«ជម្ងឺឆ្លងយ៉ាងសាហាវមួយ»៕

--------------------------------------------------------
ដោយ ៖ កេសរកូល - ភ្នំពេញ ថ្ងៃទី ២៧ ខែកុម្ភះ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ