ផ្ទុយពីការអះអាង របស់ស្ត្រីទាំងពីរនាក់ ដែលបញ្ជាក់ប្រាប់អ្នកស៊ើបអង្កេត ថាពួកខ្លួនគ្រាន់តែបានចូលរួម នៅ​ក្នុង​ឈុតឆាក​លួចថត​មួយ សម្រាប់​កម្មវិធីទូរទស្សន៍ប៉ុណ្ណោះនោះ តែនគរបាលស៊ើបអង្កេត របស់ប្រទេស​ម៉ាឡេស៊ី បាន​យល់​ឃើញផ្សេងទៅវិញ។ ក្រុម​អ្នក​ស៊ើប​អង្កេត បាន​ដាក់​បន្ទុក និងការសង្ស័យ ទៅលើស្ត្រីទាំងពីរនាក់ ថា​ពិត​ជាបានដឹង ពីការវាយប្រហារ ដោយថ្នាំបំពុល កាលពីថ្ងៃ​ទី១៣ ខែកុម្ភៈ សប្ដាហ៍មុន នៅ​ព្រលាន​​យន្ដហោះ​អន្តរជាតិ កូឡាឡំពួរ ទៅលើលោក គឹម ជុង-ណាម (Kim Jong-nam) បងប្រុស​ម្ដាយ​ទីទៃ របស់លោក គឺម ជុង-អ៊ុន (Kim Jong-Un) មេដឹកនាំកូរ៉េខាងជើងសព្វថ្ងៃ។

នាយនគរបាលជាតិម៉ាឡេស៊ី លោក «Khalid Abu Bakar» បានប្រកាសពីការសង្ស័យនេះ ប្រាប់ក្រុមអ្នក​សារព័ត៌មាន ដោយចាប់​ផ្ដើម​សួរ​ឡើងថា៖ «ខ្ញុំគិតថា អ្នករាល់គ្នា ប្រាកដជាបានទស្សនាវីដេអូ (នៃកាម៉េរ៉ា​សុវត្ថិភាព របស់​ព្រលាន​យន្ដហោះ) ហើយ មែនឬទេ?»។ លោកបាន​រៀបរាប់​ថា៖ «ស្ត្រីម្នាក់នេះ បានគេចខ្លួន​យ៉ាង​ប្រញាប់​ប្រញាល ចូលទៅក្នុងបន្ទប់ទឹក ជាមួយនឹងដៃទាំងគូ ដាក់ទៅខាង​មុខ។ ដូច្នេះ នាងពិត​ជា​បាន​ដឹង យ៉ាង​ច្បាស់​ថា នៅនឹងដៃរបស់ពួកនាង មានជាតិពុល ហើយនាងចាំបាច់ ត្រូវលាងដៃជាបន្ទាន់។»។

លោក «Khalid Abu Bakar» បានបន្ថែមទៀតថា ស្ត្រីទាំងពីរនាក់ ទទួលបានការហ្វឹកហាត់ ដើម្បី​ការ​វាយ​ប្រហារ​នេះ។ ស្ត្រីទាំងពីរនាក់​នោះ មាន​ម្នាក់​កាន់​លិខិត​ឆ្លងដែនវៀតណាម ឈ្មោះ «Doan Thi Huong» អាយុ​២៨ឆ្នាំ និង​ម្នាក់​ទៀត ​កាន់​លិខិត​ឆ្លង​​ដែន​​​ឥណ្ឌូនេស៊ី ឈ្មោះ «Siti Aishah» អាយុ២៥ឆ្នាំ។

មន្ត្រីការទូតកូរ៉េខាងជើង រងការសង្ស័យ...

ក្រុមអ្នកស៊ើបអង្កេតម៉ាឡេស៊ី បានបញ្ជាក់ទៀតថាខ្លួនចង់សាកសួរ ទៅលើមន្ត្រីការទូតមួយរូប របស់ប្រទេស​កូរ៉េ​ខាង​ជើង ដែលកំពុង​បំពេញ​ភារកិច្ច​ការទូត នៅរាជធានី កូឡាឡំពួរ ប្រទេសម៉ាឡេស៊ី។ អាជ្ញាធរបានសង្ស័យ ទៅ​លើ​ជនជាតិ​កូរ៉េ​ខាង​ជើងចំនួន៥នាក់ ថា​បាន​ជាប់ពាក់ព័ន្ធ នឹងទង្វើមនុស្សឃាតដ៏សាហាវនេះ ហើយ​មាន​បំណង​ ចង់​បើក​ការ​សាកសួរ ទៅលើជនជាតិកូរ៉េខាងជើង ចំនួន​បីនាក់​ផ្សេង​ទៀត។

លោក «Khalid Abu Bakar» បានអះអាងថា ពីក្នុងចំណោមជនទាំងបីនាក់នេះ មានម្នាក់ជាមន្ត្រីការទូត របស់​ស្ថានទូត​កូរ៉េ​ខាង​ជើង ប្រចាំ​នៅ​រាជធានី កូឡាឡំពួរ និងម្នាក់ទៀត ជាបុគ្គលិក​របស់ក្រុមហ៊ុនអាកាសចរណ៍​ជាតិ កូរ៉េ​ខាង​ជើង។ នាយនគរបាលជាតិរូបនេះ បានថ្លែងបន្ត​ទៀតថា៖ «យើងបានសរសេរជាផ្លូវការ ទៅកាន់​ស្ថានទូត​កូរ៉េ​ខាង​ជើង ដើម្បីទទួលបានការអនុញ្ញាត ឲ្យបើកការសាកសួរ ទៅលើជនជាតិកូរ៉េខាង​ជើង ទាំងពីរ​នាក់។ យើង​សង្ឃឹម​ថា ស្ថានទូតកូរ៉េខាងជើង នឹងចូលរួមសហការជាមួយយើង ហើយអនុញ្ញាត​ឲ្យយើង បានធ្វើកិច្ចការនេះ ក្នុង​ពេល​ឆាប់ៗ​ខាង​​មុខ។ បើមិនអញ្ចឹងទេ យើងនឹងចេញលិខិត បង្ខំពួកគេ​ឲ្យ​មក​បង្ហាញខ្លួន នៅ​នឹង​​ការិយាល័យ​​របស់​​យើង។»៕