ហ៊ុន សែន បញ្ជាឲ្យតាមឃ្លាំ គឹម សុខ ក្រែង«រត់»ទៅបរទេស
- ដោយ: ដារា រិទ្ធ ([email protected]) - ភ្នំពេញ ថ្ងៃទី១៣ កុម្ភៈ ២០១៧
- កែប្រែចុងក្រោយ: February 13, 2017
- ប្រធានបទ: នយោបាយខ្មែរ
- អត្ថបទ: មានបញ្ហា?
- មតិ-យោបល់
-
«កុំអាងក្បាលមេក្រូ កុំអាងវិទ្យុ រួចវិភាគវាយប្រហារគេ។ អត់ទេ! ៗ! ពង្រឹកនិតិរដ្ឋ !» ពាក្យប៉ុន្មានម៉ាត់នេះ ត្រូវបានលោកនាយករដ្ឋមន្ត្រី ហ៊ុន សែន ថ្លែងឡើងជាសាធារណៈ នៅព្រឹកថ្ងៃចន្ទនេះ ស្របពេលនឹងពាក្យបណ្ដឹងមួយ ត្រូវបានមេធាវីរបស់លោក ដាក់ទៅកាន់តុលាការសាលាដំបូងរាជធានី ប្ដឹងអ្នកវិភាគមួយរូប ដែលគេស្គាល់ថា គឺលោក គឹម សុខ។
ក្នុងពិធីសម្ពោធ បើកឲ្យប្រើប្រាស់ស្ពានបេតុងមិត្តភាព កម្ពុជា-ចិន កោះធំ ជាមួយនឹងពលរដ្ឋរាប់រយនាក់ នាយករដ្ឋមន្ត្រីបីទសវត្សន៍ជាង របស់កម្ពុជា បានថ្លែងឡើងថា៖ «ថ្ងៃនេះ លេងមួយទៀត។ ប្រហែលពេលនេះ មេធាវីទៅដល់តុលាការហើយ។ ស្អីអ្នកឯងបញ្ចេញមតិ ហ្អែស? មកចោទប្រកាន់គណបក្សប្រជាជន [ថាជាអ្នក] សម្លាប់មនុស្ស។ អត់ទេ! ទារកន្លះលានដុល្លារ។ ហើយបើអ្នកឯងមិនចង់ ឲ្យរឹបអូសទ្រព្យ ដើម្បីលក់ឡៃឡុងទេ អ្នកឯងយកលុយមកសងមក។»។
ប៉ុន្តែទន្ទឹមនឹងការដាក់ពាក្យបណ្ដឹងនេះ លោក ហ៊ុន សែន ក៏ថែមទាំងបានបញ្ជា ទៅកងកម្លាំងនគរបាល ឲ្យធ្វើការឃ្លាំមើលអ្នកវិភាគរូបនេះដែរ ព្រោះខ្លាចលោក គឹម សុខ រត់គេចខ្លួនទៅបរទេស។ បញ្ជារបស់នាយករដ្ឋមន្ត្រីកម្ពុជា ឲ្យតាមដានលោក គឹម សុខ ដូច្នេះ ខណៈអ្នកវិភាគរូបនេះ នៅមិនទាន់ត្រូវបានតុលាការរកឃើញ ថាមានទោសនៅឡើយ។
បុរសខ្លាំង បានព្រមានលោក គឹម សុខ ដូច្នេះថា៖ «ហើយនគរបាលតាមឲ្យជាប់ ក្រែងលោវារត់។ (...) អ្នកនេះ ខ្ញុំបញ្ជានគរបាលឲ្យតាម ពីម្សិលហើយ។ កុំរត់ណា ព្រោះខ្លួនឯងថាជើងខ្លាំង។ ទៅ ជាប់គុកត្រឹមពីរឆ្នាំអីតើ ហើយអស់លុយប៉ុន្មាន កុំថាអត់លុយសងវ៉ើយ។»។
រឿងរ៉ាវដែលធ្វើឲ្យលោក ហ៊ុន សែន និងគណបក្សប្រជាជនកម្ពុជារបស់លោក បានកើតទុក្ខមិនសុខចិត្ត រហូតដាក់ពាក្យបណ្ដឹងដូច្នេះ ដោយហេតុការធ្វើអត្ថាធិប្បាយមួយ របស់លោក គឹម សុខ តាមរយៈកម្មវិធីមួយ របស់វិទ្យុអាស៊ីសេរី បានលើកឡើងថា គណបក្សប្រជាជនកម្ពុជា ទំនងជាអ្នកនៅពីក្រោយឃាតកម្ម សម្លាប់លោក កែម ឡី ដែលបានកើតឡើង យ៉ាងសាហាវ នៅកណ្ដាលរាជធានី ភ្នំពេញ កាលពីខែកក្កដាកន្លងទៅ។
នៅចំពោះពាក្យបណ្ដឹងនេះ លោក គឹម សុខ ទើបនឹងបានសរសេរ នៅមុននេះបន្តិច នៅលើបណ្ដាញសង្គមថា៖ «អ្វីដែលខ្ញុំធ្វើ គឺដើម្បីចូលរួមបំភ្លឺចម្ងល់ប្រជារាស្ត្រ អំពីស្ថានការណ៍នយោបាយ និងស្ថានភាពអយុត្តិធម៌សង្គមកម្ពុជាបច្ចុប្បន្ន និងជាពិសេស លើកទឹកចិត្តពួកគាត់ ឲ្យចូលរួមតស៊ូមតិបែបប្រជាធិបតេយ្យ។ ខ្ញុំនឹងទទួលខុសត្រូវ នូវអ្វីដែលខ្ញុំបាននិយាយ ប្រសិនបើការអត្ថាធិប្បាយរបស់ខ្ញុំ ពិតជាមានចំណុចជាប់ទោស តាមច្បាប់យុត្តិធម៌មិនបំភ្លៃមែន។»។
អ្នកធ្វើអត្ថាធិប្បាយនយោបាយរូបនេះ បានបន្តសរសេរ ស្នើទៅរដ្ឋាភិបាល លោក ហ៊ុន សែន វិញ ឲ្យចេះទទួលខុសត្រូវ ក្នុងការជម្រះមន្ទិលសង្ស័យ ទាក់ទងនឹងឃាតកម្ម លើលោក កែម ឡី។ លោកសរសេរថា៖ «ខ្ញុំស្នើរដ្ឋាភិបាល មេត្តាចេះទទួលខុសត្រូវវិញដែរ នូវអ្វីដែលជាភារកិច្ចនិងកាតព្វកិច្ចរបស់ខ្លួនចំពោះរាស្ត្រ គឺការជម្រះមន្ទិលសង្ស័យថា អ្នកណាជាឃាតករសម្លាប់លោកបណ្ឌិត កែម ឡី ដោយចាប់ផ្តើម ពីការបង្ហាញអង្គចងចាំ។ បើបានប៉ុណ្ណឹង ខ្ញុំអស់ចិត្តហើយ ទោះត្រូវមានទោសប៉ុណ្ណា [ក៏ដោយ]។»៕