នៅពេលដែលជនរងគ្រោះ ដល់ថ្នាក់បោកក្បាលនឹងថ្នល់ បាក់ក  គ្រាំជើង និងចង្កេះ រហូតដល់ថ្នាក់សន្លប់ ត្រូវចេញទៅព្យាបាល ដល់ប្រទេសថៃ បែរជាត្រូវបានឃើញ ដើរយ៉ាងសង្ហា និងស្វាហាប់ ជាមួយស្ត្រី​កំណាន់ នៅក្នុងផ្ទះសំណាក់មួយទៅវិញ...

ប្រសិនជាគេជឿជាក់ ទៅលើវីដេអូចំនួនបី ដែលត្រូវបានថតចេញ ពីវីដេអូសុវត្ថិភាព របស់ផ្ទះ​សំណាក់​មួយ នៅក្នុងប្រទេសថៃ ហើយត្រូវបាន​យក​មកបង្ហោះ នៅលើបណ្ដាញសង្គម កាលពីម្សិលម៉ិញនេះ គេនឹង​យល់​ច្បាស់​ថា ជនរងគ្រោះម្នាក់នេះ មិនមានគ្រោះថ្នាក់ ឬឈឺថ្កាត់អ្វីទេ។ ជនម្នាក់ នៅក្នុងវីដេអូទាំងនោះ ត្រូវ​បាន​ក្រុមអ្នកប្រើប្រាស់​បណ្ដាញសង្គម ស្គាល់ថា គឺជាលោក ឈាន ពិសិដ្ឋ មន្ត្រីនគរបាល​ច្រកប៉ោយប៉ែត ដែល​អាជ្ញាធរ និងតុលាការកម្ពុជា និយាយថាបានដួលបោកក្បាល«ធ្ងន់ធ្ងរ ក្នុងការប៉ះទង្គិចមួយ ជាមួយរថយន្ដ​របស់​លោក ឌិន ពុទ្ធី ប្រធានសមាគមសេដ្ឋកិច្ចក្រៅប្រព័ន្ធ។

វីដេអូទាំងបី ដែលមានការចែករំលែក ជាច្រើនពាន់ដង (មានវីដេអូមួយនោះ ទទួលបានការចែករំលែក រហូត​ដល់​ជាង១ម៉ឺនដង) ត្រូវបានថតចេញ ពីវីដេអូសុវត្ថិភាព ដែលដាក់ថ្ងៃខែ ថ្ងៃទី២៧ ខែធ្នូ ឆ្នាំ២០១៦។ វីដេអូទី​មួយ គេឃើញបុរសម្នាក់ អបដំណើរ ដោយស្ត្រីវ័យក្មេងម្នាក់ទៀត ចេញពីបន្ទប់ផ្ទះសំណាក់ យ៉ាង​ប្រយ័ត្ន​ប្រយ៉ែង ដោយងាកមើលឆ្វេងស្ដាំ។ រីឯវីដេអូទីពីរ បានបង្ហាញពីអ្នកទាំងពីរដដែល ដើរនៅក្នុង​សាល​ទទួល​ភ្ញៀវ របស់ផ្ទះសំណាក់។ ខណៈវីដេអូទីបី គេឃើញបុរសស្ត្រីទាំងគូ ដើរចុះតាមជណ្ដើរ។ ប៉ុន្តែវីដេអូទីបីនេះ បាន​បង្ហាញ​ពី​ភិនភាគមុខមាត់ របស់បុរសម្នាក់នេះច្បាស់ជាងគេ ដែលដូចទៅ​នឹងភិនភាគ មុខមាត់រាងរៅ របស់​លោក ឈាន ពិសិដ្ឋ ដ៏ល្បីឈ្មោះ តាំងពីមួយសប្ដាហ៍មកហើយ។

នៅក្រោយពេលកើតហេតុ នៅថ្ងៃទី២២ ខែធ្នូ ឆ្នាំ២០១៦ លោក​ឈាន ពិសិដ្ឋ ត្រូវបានដឹកទៅសង្គ្រោះ នៅ​គ្លីនិក សុខ វិសាល នៅ​ក្រុង​ប៉ោយ​ប៉ែត។ តែដោយសភាពធ្ងន់ធ្ងរ ទើបដឹកទៅ​សង្គ្រោះ​បន្ត នៅ​មន្ទីរពេទ្យ ក្នុង​​ខេត្ត​​ស្រះកែវ ប្រទេស​ថៃ។ នេះ បើតាមសេចក្ដីប្រកាសព័ត៌មាន របស់​ក្រសួង​មហាផ្ទៃ បំភ្លឺលើករណីនេះ ចុះថ្ងៃ​ទី២៩ ខែធ្នូ ឆ្នាំ២០១៦។ បន្ថែមពីលើនេះ គ្លីនិក សុខ វិសាល (ក្នុងក្រុងប៉ោយប៉ែត) ក៏បាន​ចេញ​​លិខិត​បញ្ជាក់​មួយ​ដែរ អះអាង​ពី​ស្ថានភាព​របួស របស់​មន្ត្រីនគរបាល ថា​មាន​អា​ការៈធ្ងន់ធ្ងរ ចាំបាច់មាន​ជំនួយការ​ដក​ដង្ហើម ដោយខ្យល់អុកស៊ីសែន ក្នុង​កម្រិត​១០​លីត្រ​/​នាទី​។

បើពិនិត្យតាមវីដេអូទាំងបីខាងលើ ក្រុមអ្នកប្រើប្រាស់បណ្ដាញសង្គម បានសំដែងចំងល់របស់ពួកគេថា តើ​ស្ថានភាព​​របួសដ៏ធ្ងន់ធ្ង រ​​របស់​លោក​ ឈាន ពិសិដ្ឋ អាចនឹងជាសះស្បើយ ក្នុងរយៈពេល៥ថ្ងៃ (ពីថ្ងៃកើតហេតុ មកដល់ថ្ងៃ​ដែល​វីដេអូសុ​វត្ថិភាព ថតរូបភាព) ហើយចេញមកដើរ យ៉ាងសង្ហាស្វាហាប់ ជាមួយស្ត្រីកំណាន់​ដូច្នេះ​ឬ? ឬវិជ្ជាពេទ្យ​​នៅក្នុង​ប្រទេសថៃ ពូកែដល់ថ្នាក់​ព្យាបាល​មនុស្ស«បាក់ក» ឲ្យជាវិញ តែក្នុងរយៈពេលដ៏ខ្លី​យ៉ាង​​អញ្ចឹង...