តំណាងប្រជាពលរដ្ឋជនជាតិដើមភាគតិច កួយ ពីខេត្តព្រះវិហារ បានឡើងមករាជធានីភ្នំពេញនៅថ្ងៃទី០៦ ខែមីនា​នេះ ដើម្បីដាក់ញ្ញត្តិ​ទៅក្រសួងមហាផ្ទៃ និងក្រសួងវប្បធម៌ ស្នើឲ្យមានការដោះស្រាយបញ្ហាដីធ្លី និងអន្តរាគមរឿង​គ្រឹះប្រាសាទបូរាណ និងវត្ថុបុរាណមួយចំនួន កប់ក្នុងដីដែលក្រុមហ៊ុនចិនបានឈូសឆាយប៉ះ និងមានបំណងប្រមូល​យកនូវវត្ថុបុរាណ​ទាំងនោះ។ នេះបើតាមការបញ្ជាក់របស់អ្នកស្រី ស៊ឹង ស៊ាំ តំណាងសហគមឃុំប្រមេ។

សកម្មភាពប្រចាំថ្ងៃរបស់ពលរដ្ឋជនជាតិដើម កួយ នៅខេត្តព្រះវិហារ។ (រូបថត វិទ្យុអាស៊ីសេរី)

បុរាណវត្ថុ - តំណាងសហគមនឃុំប្រមេអ្នកស្រី ស៊ឹង ស៊ាំ បានថ្លែងប្រាប់ទស្សនាវដ្ដីមនោរម្យ.អាំងហ្វូ ថា ក្រៅពី​ការ​ប្រឈមនឹងការបាត់បង់ដីជាលក្ខណៈប្រពៃណីពីដូនតានេះ ការឈូសឆាយរបស់ក្រុមហ៊ុនចិនឈ្មោះ ឡាន ហ្វេង បានធ្វើឲ្យប៉ះពាល់ និងខូចខាតនូវគ្រឹះប្រសាទបូរាណច្រើនដូចជាប្រាសាទអណ្តូង ប្រាសាទយក្សភ្លោះ​ជា​ដើម។ «មានប្រាសាទច្រើនណាស់ តែបាក់បែកអស់ហើយ ក្រុមហ៊ុនឈូសឆាយ ប៉ះពាល់កំណប់​ខាងក្រោម (វត្ថុបុរាណ​ក្រោមដី)។ ឯក្រុមហ៊ុននៅតែបន្តការឈូសឆាយទៀត មកដល់ពេលនេះ។ ខ្ញុំចង់ឲ្យក្រុមហ៊ុនដកខ្លួនចេញពីឃុំប្រមេ នេះតែម្តង។»

អ្នកស្រីបន្តរថាចាប់តាំងពីថ្ងៃឈូសឆាយ មកដល់ពេលនេះ អាជ្ញាធរមូលដ្ឋាន និងអាជ្ញាធរស្រុក​មិនបានចាត់វិធាន​ការថែរក្សានោះទេ។ អ្នកស្រីបញ្ជាក់ដូច្នេះថា «ប្រជាពលរដ្ឋយើងបាននាំគ្នាមកចាំ និងយាមទាំងយប់ទាំងថ្ងៃ ខ្លាច​មានការលួចយកវត្ថុបុរាណទាំងអស់នោះបាត់។ អាជ្ញាធរបានត្រឹមតែមកមើលទេ មិនបានចាត់កម្លាំងចាំឡើយ។ (វា) ងាយនឹងបាត់បង់ណាស់ បើមិនមានការយកចិត្តទុកដាក់ពីអាជ្ញាធរនោះទេ។ (...) ភស្តុតាងវត្ថុបុរាណ​រួមមានឥដ្ឋ​មានថ្មគាស់រាយប៉ាយពេញតែហ្នឹង។ ដល់ឈូសទៅប៉ះពាល់ដល់កំណប់អី ពួកខ្ញុំមិនទាន់បានឃើញផង ឬកម្មករ​អ្នកអារអុសឱ្យក្រុមហ៊ុនហ្នឹង គេថាក្រុមហ៊ុនកប់ទៅវិញ ហើយពួកខ្ញុំតាំងពីថ្ងៃទី២៦-២៧ ខែកុម្ភៈ នាំគ្នាដេកហែរ​ចាំ​មើលកន្លែងហ្នឹង។ លើកគ្នាដេកយាមកន្លែងហ្នឹង ក្រែងលោក្រុមហ៊ុនលួចយកអីទៀត បើពួកខ្ញុំមិនទុកចិត្ត។»

ទាក់ទងនឹងបញ្ហាប្រាសាទបុរាណ របស់ជនជាតិដើមភាគតិចកួយខាងលើនេះ មេឃុំប្រមេលោក ណែម ថាំង ក៏បាន​ទទួលស្គាល់ដែរថា មានការខូចខាតនូវគ្រឹះប្រាសាទបុរាណមួយចំនួនមែន នៅពេលដែលក្រុមហ៊ុនធ្វើការ​ឈូស​ឆាយនោះ។ លោកបន្តរថា បន្ទាប់ពីឃើញភ្លាម លោកបានផ្តល់ព័ត៌មាននេះទៅលោកអភិបាលស្រុកត្បែងមានជ័យ ដើម្បីចាត់កម្លាំងចុះមកមើល និងមានវិធានការថែរក្សា។ លោកបន្តរថា ក្រោយមកកម្លាំងបានចុះមកមើលដែរ តែ​មក​ទល់និងពេលនេះស្ងាត់ មិនមានការបញ្ជាក់ពីការថែរក្សា ឬត្រូវធ្វើយ៉ាងណាជា​បន្តរទេ។

លោកមេឃុំ ណែម ថាំង បានថ្លែងឲ្យដឹងថា «ស្នើឲ្យខាងសូរិយោដីស្រុក​ ឃ្វាលចំណុចប្រសាទនោះទុក មិនឲ្យបន្តរ​ការឈូសឆាយ។ (...) មានតែប្រជាជនទេដែលទៅដេកចាំ ខ្លាច​ក្រុមហ៊ុន​ជីកបន្តរទៀត ឯខាងសមត្ថកិច្ចមិនបាន​ទៅ​ចាំទេ តែក៏បានហាមមិនឲ្យប្រជាពលរដ្ឋធ្វើការជីកដែរ ព្រោះនេះ​ជា​វត្ថុបុរាណ។»

អគ្គនាយកក្រុមហ៊ុន ឡាន ហ្វេង ខេមបូឌា អ៊ីនធើណេសិនណល ខមភេនី លីមីធីតលោក XIE KANQING មិនអាច​ទំនាក់ទំនងសុំការបញ្ជាក់ពីរឿងប្រាសាទបុរាណនេះបានទេ។ តែអ្នកស្រី ហ៊ល តាក់ អ្នកបកប្រែឲ្យក្រុមហ៊ុននេះ មិន​បានបញ្ហាក់ពីវិធានការរបស់ក្រុមហ៊ុនទៅលើវត្ថុបុរាណ ដែលរកឃើញនោះទេ តែអ្នកស្រីបានត្រឹម​តែបញ្ជាក់ថា «បញ្ហា​នេះខាងមន្ទីជាអ្នកដោះស្រាយ ខ្ញុំក៏មិនបានដឹងដែរ។»

សម្រាប់លោកលោក ឡោ ចាន់ មន្ត្រីសម្របសម្រួលសមាគម អាដហុកប្រចាំខេត្តព្រះវិហារបានបញ្ជាក់ថា រឿងគ្រឹះ​ប្រាសាទ និងវត្ថុបុរាណ ដែលអាចមានក្នុងដីដែលក្រុមហ៊ុនចិនខាងលើឈូសឆាយប៉ះនេះ នៅមិនមាន​វិធាន​ការ​ណា​មួយឲ្យមានប្រសិទ្ធិភាពនៅឡើយមកទល់នឹងពេលនេះ។ លោកបន្តរថា «បច្ចុប្បន្ននេះប្រជាពលរដ្ឋជាច្រើន បាន​លើកគ្នាទៅគេងទាំងយប់ទាំងថ្ងៃ ក្នុងព្រៃនោះ ដោយបោះតង់ ដើម្បីថែរក្សានូវវត្ថុបុរាណទាំងនោះ ព្រោះខ្លាចមាន​ជនឱកាសនិយមលបលួចទៅបាត់អស់។»

ប្រធានការិយាល័យបេតិភណ្ឌមន្ទីវប្បធម៌ខេត្តព្រះវិហារលោក ម៉ៅ វី បានបញ្ជាក់ប្រាប់ទស្សនាវដ្តីមនោរម្យ.អាំងហ្វូ ថា ក្នុងអំឡុងពេលនេះមន្ទីវប្បធម៌ខេត្តមានការមមាញឹកច្រើន មិនទាន់មានពេលសម្រាប់ការចុះទៅពិនិត្យ និងធ្វើ​ការ​សម្រេចយ៉ាងណានោះនៅឡើយទេ។ លោកបន្តរថា រង់ចាំដល់ថ្ងៃទី១២ ខែមីនាខាងមុខនេះ ទើបប្រធានមន្ទីរ​នឹងចុះ​ទៅធ្វើការសម្រេច ថាតើត្រូវធ្វើយ៉ាងណានោះ។ ទោះយ៉ាងនេះក្តី លោកក៏បានបញ្ជាក់ថា ក្រុមការងាររបស់លោក ក៏​បានចុះទៅពិនិត្យគ្រឹះប្រាសាទបានចំនួនពីរហើយ ក្នុងចំណោមគ្រឹះប្រាសាទទាំងប្រាំនោះ។ ចំពោះឆ្មាំប្រាសាទ នៅ​មិនទាន់បានចាត់ទាំងនៅឡើយទេ ហើយក៏និងសម្រេចនាពេលក្រោយ បន្ទាប់ពីថ្ងៃសម្រេចខាង​មុខនេះ។

លោក ម៉ៅ រី បានបញ្ជាក់ថា «ឆ្នាំប្រាសាទនោះមានតែនៅខេត្ត តែក៏បានចុះទៅត្រួសត្រាយព្រៃដែរ។ (…) ដី​ប្រាសាទ​នេះស្ថិតក្នុងដីសម្បទានសេដ្ឋកិច្ច យើងបានរាយការណ៍ប្រាប់រដ្ឋាភិបាលហើយ។ (…) (ក្រុមហ៊ុន) ឈូសឆាយប៉ះ​គ្រឹះប្រាសាទអី យើងឲ្យរក្សាទុកឲ្យយើង។»

ពលរដ្ឋជនជាតិភាគតិចកួយ មកពីភូមិចំនួនបីភូមិក្នុងឃុំប្រមេរ ស្រុក ត្បែងមានជ័យ ខេត្ត ព្រះវិហារ បាន​បោះជម្រក​ស្នាក់នៅកណ្តាលព្រៃ ដើម្បីទប់ស្គាត់ទៅនឹងការឈូសបំផ្លាញគ្រឹះប្រាសាទ និងវត្ថុបុរាណ ដោយ​ក្រុមហ៊ុនចិន​ចំនួន​ប្រាំ ដែលទទួលបានសិទ្ធិឈូសឆាយដីសម្បទានសេដ្ឋកិច្ចពីរាជរដ្ឋាភិបាល ដើម្បីដាំអំពៅ។ ប្រាសាទទាំងប្រាំដែល​ឈូសប៉ះនោះរួមមាន ប្រាសាទក្រូចព្រោះ ប្រាសាទយក្សព្លូក ប្រាសាទព្រះពុទ្ធបាក់ករ ប្រាសាទយក្សអង្គុយ និង​ប្រាសាទត្រពាំងស្វាយ។ ការឈូសឆាយឃើញប្រាសាទទាំងប្រាំនេះ បន្ទាប់ពី​មាន​ទំនាស់​ដីធ្លីយ៉ាងរ៉ាំរ៉ៃ​រវាង​ប្រជា​ពលរដ្ឋ ក្នុងឃុំប្រមេ ប្រមាណជិតប្រាំរយគ្រួសារ ជាមួយនិងក្រុមហ៊ុន​តាំងពីឆ្នាំ២០១២​មក។ នេះបើតាមការបញ្ចាក់​របស់ ប្រធានការិយាល័យបេតិភណ្ឌមន្ទីវប្បធម៌ខេត្តព្រះវិហារលោក ម៉ៅ វី៕

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី៦ មីនា ២០១៤