យន្ដហោះ របស់ក្រុមហ៊ុនអាកាសចរណ៍ «Transavia» បានបង្ខំចិត្តងាកចេញ ពីផ្លូវហោះហើរ និងបានចុះចតជាបន្ទាន់ នៅព្រលានយន្ដហោះ «Faro» ភាគខាងត្បូង នៃប្រទេសព័រទុយហ្គាល់។ មូលហេតុដែលធ្វើ ឲ្យយន្ដហោះត្រូវសម្រេចចិត្តដូច្នេះ ដោយបណ្ដាលមកពីក្លិនខ្លួន របស់អ្នកដំណើរម្នាក់ ដែលធ្វើអ្នកដំណើរផ្សេងទៀត បានធ្លាក់ខ្លួនក្អួតចង្អោរ ជាបន្តបន្ទាប់។ នេះ បើតាមសេចក្ដីរាយការណ៍ របស់សារព័ត៌មាន «Le Parisien» របស់បារាំង កាលពីល្ងាចម៉ិញ។

បន្ទាប់ពីបានងើបខ្លួន ចេញពីកោះ «Canaries (ក្នុងមហាសមុទ្រអាត្លង់ទិក ខាងលិចទ្វីបអាហ្វ្រិក)» ឆ្ពោះទៅកាន់រាជធានី អាមស្ទែដាម (ហូឡង់) បុរសជាអ្នកដំណើរ​ម្នាក់ បានបំភាយក្លិនខ្លួន ដ៏ខ្លាំងពិបាកទ្រាំ ដោយទំនងជាមិនបានងូតទឹក តាំងពីច្រើនខែមកហើយ។ អ្នកដំណើរម្នាក់ បានអះអាងថា បុរសរូបនោះ ត្រូវបានក្រុមបុគ្គលិកយន្ដហោះ កំណត់អត្តសញ្ញាណ និងស្នើសុំ ឲ្យនៅក្នុងបន្ទប់ទឹកមួយរយៈ។ 

យន្ដហោះប៊ូអីញ (Boeing 737) ដែលមានជើងហោះហើរ លេខ «HV5666» បានចុះចតជាបន្ទាន់ ដោយសុវត្ថិភាព​ និងបានធ្វើការដកក្លិន ព្រមទាំងបំបាត់មេរោគ ក្នុងរយៈពេលច្រើននាទី មុននឹងបានហោះងើបខ្លួន បន្តដំណើរទៅកាន់ប្រទេសហូឡង់។ អ្នកដំណើរម្នាក់ទៀត បានសរសេរ នៅលើបណ្ដាញសង្គមថា៖ «វាជាក្លិនមួយ ដ៏ស្អុយអាក្រក់ និងពិបាកទ្រាំ»។

ប៉ុន្តែដំណើរហោះហើរ ដែលនៅសល់ មិនបានប្រព្រឹត្តិទៅ ដូចធម្មតានោះទេ ព្រោះក្លិនបុរស ដែលបានភាយចេញ មកជាប់នឹងតួយន្ដហោះ នៅតែបន្តមាន និងធ្វើឲ្យអ្នកដំណើរទាំងអស់ នៅតែមានអារម្មណ៍មិនស្រួលដដែល។ ដោយសារហេតុនេះ ទើបក្រុមអ្នកបម្រើការ នៅក្នុងយន្ដហោះ បានសម្រេចមិនចែកអាហារ ទៅឲ្យអ្នកដំណើរ និងបានសុំឲ្យពួកគេ ទ្រាំរហូតដល់ពេលយន្ដហោះ ចុះចតនៅព្រលានយន្ដហោះអន្តរជាតិ អាមស្ទែដាម។

យន្ដហោះ បានមកដល់ទិសដៅរបស់ខ្លួន ដោយយឺតពេល រហូតដល់ទៅ៣ម៉ោង។ អ្នកនាំពាក្យរបស់ក្រុមហ៊ុន បានថ្លែងទទួលស្គាល់ ពីក្លិនអាក្រក់ ដែលកើតមានក្នុងយន្ដហោះ និងបានពន្យល់ ពីការចុះចតបន្ទាន់ របស់យន្ដហោះថា៖ «ក្រុមបុគ្គលិកនៅក្នុងយន្ដហោះ គិតថា វាជាការខ្វះការទទួលខុសត្រូវ ប្រសិនជាយន្ដហោះ ត្រូវបន្តដំណើរ រហូតដល់ទិសដៅ ជាមួយអ្នកដំណើរណាម្នាក់ ដែលធ្លាក់ខ្លួនឈឺនោះ»។៕