ផៃ ស៊ីផាន៖ តុលាការកាត់ទោស កឹម សុខា មានភាពរលូន
- ដោយ: ដារា រិទ្ធ អត្ថបទ និងយកការណ៍៖ ដារា រិទ្ធ ([email protected]) - ភ្នំពេញ ថ្ងៃទី១០ កញ្ញា ២០១៦
- កែប្រែចុងក្រោយ: September 10, 2016
- ប្រធានបទ: នយោបាយ-កម្ពុជា
- អត្ថបទ: មានបញ្ហា?
- មតិ-យោបល់
-
«ការអនុវត្តនីតិវិធីរបស់តុលាការ ទទួលបានជោគជ័យ ជាមួយនឹងភាពរលូន ប្រសិទ្ធិភាព ចំពោះការវិនិច្ឆ័យលើករណីរបស់ ឯកឧត្តម កឹម សុខា ដែលលោកបានបោះបង់សិទ្ធិ ដោយស័្មគ្រចិត្ត និងបំពានចំពោះច្បាប់ ដែលជាកាតព្វកិច្ចរាល់ជនគ្រប់រូប» នេះជាឃ្លាមួយ ពីក្នុងចំណោមសំណេរ ដ៏វែងអន្លាយមួយ របស់លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រី ដើម្បីអបអរសាទរទៅដល់សាលក្រម របស់សាលាដំបូងរាជធានី ដែលបានសម្រេចផ្ដន្ទាទោសលោក កឹម សុខា អនុប្រធាន (សព្វថ្ងៃជាប្រធាន) គណបក្សសង្គ្រោះជាតិ កាលពីរសៀលថ្ងៃទី៩ ខែកញ្ញានេះ ឲ្យជាប់ពន្ធនាគារ ៥ខែ និងពិន័យជាប្រាក់ ៨សែនរៀល។
ចៅក្រមជំនុំជម្រះក្ដី លោក កែវ មុនី បានចេញសាលក្រម ផ្ដន្ទាទោសលោក កឹម សុខា ដូច្នេះ តាមមាត្រា៥៣៨ នៃក្រមព្រហ្មទណ្ ពីបទ«បដិសេធការចូលខ្លួន» ទៅតាមការកោះហៅ របស់ចៅក្រមស៊ើបសួរ តាមរយៈដីកាម្ដងជាពីរដង កាលពីខែឧសភា។ សវនាការកាលពីពេលព្រឹក ដែលធ្វើការជំនុំជម្រះ ទៅលើករណីនេះ មិនមានការចូលរួម ពីសំណាក់លោក កឹម សុខា និងមេធាវីទាំងបួនរូប របស់លោកឡើយ។ មេធាវីទាំងនោះ បានសំអាងមូលហេតុថា ការជំនុំជម្រះនេះ ធ្វើឡើងដោយខុសនីតិវិធីច្បាប់ ខណៈលោក កឹម សុខា នៅមានអភ័យឯកសិទ្ធិសភា។
ក្រៅពីសេចក្ដីអបអរសាទរខាងលើ លោក ផៃ ស៊ីផាន នៅបានរៀបរាប់ ប្រាប់ទៅប្រព័ន្ធផ្សព្វផ្សាយ ពីការសោកស្ដាយរបស់លោក ដែលរឿងរ៉ាវ«ឯកជន»របស់លោក កឹម សុខា ត្រូវបាន«បំភ្លៃ» ឲ្យទៅជារឿង«នយោបាយ»។ អ្នកនាំពាក្យរូបនេះ បានសរសេរថា៖ «អំពើឯកជនផ្ទាល់សុទ្ធសាធ របស់ឯកឧត្តម កឹម សុខា ដែលលោកប្រឆាំង និងស្ថាប័នតុលាការ ក៏ដូចជាច្បាប់ជាតិ ហើយបាននឹងកំពុងបំភ្លៃ ករណីផ្ទាល់ខ្លួន ឲ្យក្លាយទៅជារឿងនយោបាយ និងយកគណបក្សសង្រ្គោះជាតិ ព្រមជាមួយនឹងអ្នកគាំទ្រស្លូតត្រង់ ជាចំណាប់ខ្មាំង និងក្លាយទៅជាឈ្នាន់ ដើម្បីការពាររឿងអាស្រូវ របស់ខ្លួនផ្ទាល់ ដោយប្រឌិត និងបំភ្លៃ អំពាវនាវប្រជាពលរដ្ឋទាំងនោះ ក្នុងរូបភាពជាសាក្សី ប៉ុន្តែការពិតនោះ គឺយកជារនាំងការពារ ផលប្រយោជន៍បុគ្គលខ្លួនផ្ទាល់ ជាមួយ និងការប្រឆាំង នៃដំណើរការកាត់ក្តី របស់តុលាការនេះ»។
ព្រមានទៅ... ព្រមានមក!
ចំពោះសាលក្រម ដ៏ចម្រូងចម្រាស់ខាងលើនេះ មិនត្រូវបានគណបក្សសង្គ្រោះជាតិ ទទួលយកឡើយ។ នៅក្នុងសេចក្ដីថ្លែងការណ៍មួយ ដែលចេញផ្សាយនៅល្ងាចថ្ងៃដដែល បានឲ្យដឹងថា គណបក្សប្រឆាំងបានចាត់ទុកសាលក្រមនេះ ថាធ្វើឡើងក្រោមសម្ពាធនយោបាយ នៃគណបក្សកាន់អំណាច ហើយគណបក្សនៅតែបន្ត ការតស៊ូដោយសន្តិវិធី ដើម្បីទាមទារឲ្យទម្លាក់ចោល នូវការចោទប្រកាន់ មកលើ «លោក កឹម សុខា សកម្មជន និងថ្នាក់ដឹកនាំ គណបក្សសង្គ្រោះជាតិដទៃទៀត ព្រមទាំងមន្ត្រីអង្គការសង្គមស៊ីវិល និងមន្ត្រីគណៈកម្មាធិការជាតិ រៀបចំការបោះឆ្នោត»។
គណបក្សប្រឆាំងថែមទាំងបានព្រមាន នៅក្នុងសេចក្ដីថ្លែងការណ៍របស់ខ្លួនថា ប្រសិនណាជាការទាមទារខាងលើ មិនទទួលបានលទ្ធផលទេនោះ គណបក្សនឹងប្រើប្រាស់សិទ្ធ «ធ្វើមហាបាតុកម្មដោយអហិង្សា» ហើយបានអំពាវនាវទៅប្រជាពលរដ្ឋ ឲ្យចូលរួមជាមួយខ្លួន។
ប៉ុន្តែហេតុការណ៍នេះ ត្រូវបាន លោក ផៃ ស៊ីផាន ព្រមានតបទៅវិញរួចជាស្រេច។ មន្ត្រីជាន់ខ្ពស់រូបនេះ ដែលមានថានៈជារដ្ឋលេខាធិការ ទីស្ដីការគណៈរដ្ឋមន្ត្រី បានហៅ«ការកៀងគរបង្កើតចលនាមហាជន ប្រឆាំងនឹងច្បាប់ ប្រឆាំងតុលាការ គឺមិនមែនស្ថិតនៅក្នុង សង្គមប្រជាធិបតេយ្យ និងនីតិរដ្ឋនោះទេ (តែ)នេះគឺជាចលនាឧទ្ទាមកម្មសុទ្ធសាធ (ដែល)ប្រឆាំងនិងបំផ្លាញ ឬជាឧបសគ្គ ក្នុងការអភិវឌ្ឍ និងដំណើរការប្រជាធិបតេយ្យកម្ពុជា»៕