នាព្រឹកថ្ងៃអង្គារនេះ ជនពីរនាក់ ដែលមានកាំបិននៅនឹងដៃ បានចូលទៅចាប់មនុស្សជាច្រើននាក់ នៅក្នុង​ព្រះ​វិហារ​សាសនាកាតូលីកមួយ នៃក្រុង «Saint-Etienne-du-Rouvray» ដែលស្ថិតនៅមិនឆ្ងាយប៉ុន្មាន ពីក្រុង រូអង់ (Rouen) ភាគខាងជើង នៃប្រទេសបារាំង។ កងកម្លាំងពិសេស របស់អាជ្ញាធរបានសម្រេច បើកការ​វាយ​សម្រុករំដោះ​ចំណាប់ខ្មាំង ហើយ​​បាន​សម្លាប់​ជនទាំងពីរនេះ ឲ្យស្លាប់នៅនឹងកន្លែង។

នគរបាលបាននិយាយថា លោកអាចារ្យ ដែលជាចំណាប់ខ្មាំងម្នាក់ ពីក្នុងចំណោមចំណាប់ខ្មាំងជាច្រើននោះ បាន​ស្លាប់។ សារព័ត៌មានបារាំង ឈ្មោះ «Figaro» បានរាយការណ៍ថា លោកអាចារ្យរូបនេះ ត្រូវបានអាក សម្លាប់។

សារព័ត៌មានបារាំងផ្សេងទៀត បានអះអាងថា ជនទាំងពីរ​ដែលមានកាំបិតក្នុងដៃ បានចាប់​ចំណាប់ខ្មាំង ចំនួន​ប្រាំនាក់ ឲ្យស្ថិតនៅក្រោម​ការគម្រាមកំហែងរបស់ពួកគេ។ ចំណាប់ខ្មាំង មានលោកអាចារ្យម្នាក់ និង​មនុស្ស​ដទៃ​ទៀត សុទ្ធតែជាគ្រីស្តិ៍សាសនិកទាំងអស់។

នៅមុនថ្ងៃត្រង់នេះ ប្រធានាធិបតីបារាំង លោក ហ្វ្រង់ស៊័រ ហូឡង់ (François Hollande) បានចាកចេញពី​វិមាន​ប្រធានាធិបតី «អេលីហ្សេរ» ដើម្បីធ្វើដំណើរ ទៅកាន់ទីកន្លែងកើតហេតុដោយផ្ទាល់។ រដ្ឋមន្ត្រីមហាផ្ទៃ លោក ប៊ែរណា កាស្នើវ (Bernard Cazeneuve) មន្ត្រីថ្នាក់​ដឹកនាំ​មូលដ្ឋាន និង​ស្នងការ​នគរបាល​តំបន់ នឹងអមដំណើរលោកប្រធានាធិបតី ទៅកាន់ទីនោះ៕