ក្នុងការប្រកាសរបស់គណះកម្មាធិការអន្តជាតិអូឡាំពិក ឬហៅថាអាយអូស៊ី (IOC) ដ៏គួរឲ្យ ភ្ងាក់ផ្អើល កាលពីថ្ងៃអង្គារ៏ កន្លង ទៅបានឲ្យដឹងថា កីឡាចំបាប់ត្រូវបានដកចេញពីកម្មវិធី កីឡាអូឡាំពិកនាឆ្នាំ២០២០។

ល្បែងអូឡាំពិក ដែលជួបប្រកួតនៅទីក្រុងឡុងដ៍ ប្រទេសអង់គ្លេសកាលពីឆ្នាំ ២០១២។

ចំបាប់ជាកីឡាមួយប្រភេទ ដែលសម្តែងជាការប្រកួត ចាប់ពីការដាក់បញ្ចូលជាផ្លូវការ ក្នុងព្រឹត្តិការណ៏កីឡាអូឡាំពិក​​សម័យ​ទំនើប នៅឆ្នាំ១៨៩៦។ ប៉ុន្តែឥឡូវកីឡានេះ កំពុងតែប្រជែង ជាមួយកីឡាផ្សេងៗ ចំនួន៧ទៀត ដើម្បីទៅបង្ហាញ​ខ្លួន​នៅ​អូឡាំពិក។ ប្រភេទកីឡាទាំង ៧ វិញ្ញាសារ គឺនឹងត្រូវបានគេជ្រើសរើសយកតែមួយប៉ុណ្ណោះ។

អ្នកនាំពាក្យរបស់អាយអូស៊ី លោកម៉ាក អាដាម (Mark Adams) បាននិយាយថា «អ្នកប្រតិបត្តិ បានថ្លែងថា កីឡាចំបាប់ ដែលគ្រប់គ្រងដោយសមាគមអន្តរជាតិរួមបញ្ចូលគ្នា ឬហៅកាត់ថា អេហ្វអាយអិលអេ (FILA) មិនបានដាក់បញ្ចូលក្នុង បញ្ជីកីឡាសំខាន់ៗទេ។ កីឡានេះ នឹងត្រូវ ចូលរួមប្រជែងជាមួយប្រភេទកីឡាចំនួន៧ ទៀត ដែលកំពុងតែស្ថិតក្នុង​ការ​ពិចារណា ដើម្បី ជ្រើសរើសយកមួយ ទៅបន្ថែមនៅក្នុងកម្មវិធី នៃព្រឹត្តិការណ៏អូឡាំពិកឆ្នាំ២០២០។»

ប្រភេទកីឡាដទៃទៀត ដែលស្ថិតក្នុងការពិចារណាមានដូចជា កីឡាវាយកូនបាល់, កីឡារួម, កីឡាការ៉ាតេ និងវូស៊ូ, កីឡា​ប្រណាំងស្គី, កីឡាក្តាលើទឹក និងកីឡាវាយសី។

ទោះបីជាយ៉ាងណាក៏ដោយ កីឡាចំបាប់ប្រហែលជាមិនអាចត្រឡប់មកវិញទេ។ គណះកម្មាធិការអន្តរជាតិអូឡាំពិក នឹង​ធ្វើការសំរេចជាផ្លូវការនៅខែកញ្ញាខាងមុខ នៅក្នុង ទីក្រុងប៊ូណូស អ៊ែរេស (Buenos Aires) នៃប្រទេសអាស្សង់ទីន៕

---------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១៣ ខែកុម្ភះ ឆ្នាំ២០១៣
ប្រភព៖ រ៉យទ័រ
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ