អ្នកទោសហែកគុក ដើម្បីជួយសង្គ្រោះអ្នកយាមខ្លួន
- ដោយ: សុបិន្ដ អត្ថបទ៖ សុបិន្ត ([email protected]) - ម៉ុងរ៉េអាល់ ថ្ងៃទី១២ កក្កដា ២០១៦
- កែប្រែចុងក្រោយ: July 12, 2016
- ប្រធានបទ: វីរៈភាព
- អត្ថបទ: មានបញ្ហា?
- មតិ-យោបល់
-
ទោះខ្លួនជាជនល្មើស ក៏អាចក្លាយជាវីរៈជនបានដែរ នៅថ្ងៃណាមួយ។ ដូចជាក្រុមអ្នកជាប់ឃុំនេះជាដើម ដែលខ្លួនសុទ្ធតែជាប់ខ្នោះដៃ ជាប់ច្រវាក់ជើង តែបានបង្ខំហែកគុកដែលដាក់ពួកគេ ដើម្បីចេញទៅជួយសង្គ្រោះ អ្នកយាមគុកម្នាក់ ដែលរងគ្រោះនឹងអាការៈគាំងបេះដូង។ ហេតុការណ៍បានកើតឡើង នៅក្នុងតុលាការក្រុង «Parker» នៃរដ្ឋតិចសាស់ ភាគខាត្បូងសហរដ្ឋអាមេរិក កាលពីថ្ងៃទី២៣ ខែមិថុនាកន្លងទៅ ហើយត្រូវបានទូរទស្សន៍ «ABC» របស់អាមេរិក យកមករាយការណ៍នៅចុងសប្ដាហ៍មុន។
អ្នកយាមគុកម្នាក់នេះ បានរងនូវអាការៈដែលអាចអស់ជីវិត និងបានដួលពីលើកៅអី ដូចដែលបានបង្ហាញនៅក្នុងរូបភាពនៃវីដេអូសុវត្ថិភាព របស់បន្ទប់ក្នុងតុលាការ។ នៅចំពោះហេតុការណ៍នេះ អ្នកជាប់ឃុំទាំង៨នាក់ ដែលមានដៃជាប់ខ្នោះ និងជើងជាប់ច្រវាក់ បានស្ទុះងើបឡើង ហើយស្រែករកជំនួយ។ តែដោយមិនឃើញកិច្ចអន្តរាគមន៍ភ្លាមៗពីសំណាក់មន្ត្រីអាជ្ញាធរផ្សេងទៀតនោះ ពួកគេទាំងនេះបានរុញទ្វាចំរឹង នៃបន្ទប់ឃុំឃាំង (ជាបន្ទប់ឃុំឃាំងបណ្ដោះអាសន្ន នៅក្នុងតុលាការ) រហូតទ្វានេះរបើកឡើង។
អ្នកយាមគុករូបនោះ មានកាំភ្លើង និងសោរគុក (រួមទាំងសោរខ្នោះ) នៅជាប់នឹងខ្លួន...
ក្រុមអ្នកជាប់ឃុំ បានបន្តដាល់តប់ខ្លាំងៗ ទៅលើទ្វាមួយទៀត ដើម្បីបង្ខំឲ្យអ្នកដែលនៅខាងក្រៅ អាចឮការស្រែករកការសង្គ្រោះរបស់ពួកខ្លួន។ អ្នកជាប់ឃុំម្នាក់ បានពន្យល់ប្រាប់ស្ថានីយទូរទស្សន៍ថា ពួកគេបានដឹងពីទំហំគ្រោះថ្នាក់ ដែលអាចកើតមាន ទៅលើអ្នកយាមគុកម្នាក់នោះ និងមានការភ័យភិតយ៉ាងខ្លាំង នៅពេលដែលឃើញកងកម្លាំងយាមគុកផ្សេងទៀត បានចូលមកក្នុងបន្ទប់នោះ ដោយតម្រង់ចុងកាំភ្លើង ដាក់ពួកគេ។
ចំណែកភ្នាក់ងារម្នាក់ ពីក្នុងចំណោមភ្នាក់ងារយាមគុកផ្សេងទៀត ដែលបានចូលទៅដល់ក្នុងបន្ទប់នោះ ក៏បានថ្លែងដែរ ពីការភ្ញាក់ផ្អើលដ៏ខ្លាំងរបស់ខ្លួន បន្ទាប់ពីបានចូលទៅក្នុងបន្ទប់ ហើយឃើញអ្នកជាប់ឃុំទាំងអស់នេះ នៅក្រៅចម្រឹងដែក និងអ្នកយាមម្នាក់ នៅដេកដួលផ្ទាល់ដី។ ជាពិសេសទៅទៀតនោះ គឺអ្នកយាមគុកដែលរងគ្រោះនោះ មានកាំភ្លើង និងសោរគុក (រួមទាំងសោរខ្នោះ) នៅជាប់នឹងខ្លួនផង។ ផ្ទុយទៅវិញ ពីក្នុងចំណោមអ្នកជាប់ឃុំទាំងនេះ មិនមាននរណាម្នាក់ មានគម្រោង ឬបំណងដើម្បីរត់គេចខ្លួនឡើយ តែបានត្រឡប់ចូលទៅក្នុងបន្ទប់ចំរឹងដែកវិញ យ៉ាងស្ងៀមស្ងាត់។
» រឿងរ៉ាវលំអិត សូមទស្សនាវីដេអូខាងក្រោម (ជាភាសាអង់គ្លេស)៖