អ្នកនាំពាក្យរបស់គណបក្សប្រជាជនកម្ពុជា លោក សុខ ឥសាន ទំនងជាមិនបានត្រៀមខ្លួន ក្នុងការឆ្លើយតប​ទៅ​នឹងសំនួររន្ថាន់ ឥតព្រាងទុក​របស់អ្នកសារព័ត៌មាននោះទេ។ ប៉ុន្តែប្រសិនជាអ្នកសារព័ត៌មាន បង្កើន​ការ​សាកសួរ​ដេញ​ដោល ទៅកាន់វាគ្មិនណាមួយនោះ ដោយព្រោះចង់ឲ្យវាគ្មិននោះ និយាយចេញមកឲ្យអស់ ពី​ក្នុង​ខ្លួន ជាជាងប្រើតែភាសា«ការទូត» ដែលល្អមើលតែខាងក្រៅ និងមិនឆ្ងាញ់ពិសារនៅផ្នែកខាងក្នុង (ឬខ្មែរហៅ ភាសាស្គរប្រហោងក្នុង)។

សម្រាប់លោក សុខ ឥសាន បានហៅការសាកសួរ​ដេញដោល ពីសំណាក់លោក ជុន ច័ន្ទបុត្រ អ្នក​សារព័ត៌មាន​របស់វិទ្យុអាស៊ីសេរី កាលពីពេលកន្លងមក ថាជា«ការពូកែបន្លប់»លោក។ តើសំនួរ​របស់​លោក ជុន ច័ន្ទបុត្រ ពិត​ជា​មាន​ឥទ្ធិពល«បន្លប់» រហូតដល់ធ្វើឲ្យអ្នកនាំពាក្យ របស់គណបក្សកាន់អំណាច ច្រឡំហៅ​ប្រទេស​មីយ៉ាន់ម៉ា (ភូមា) ទៅជាប្រទេស«ម៉ាយ៉ាមី»ដូច្នេះឬ?

តែមិនដូចជាអញ្ចឹងទេ ព្រោះបើសូម្បីលោក ជុន ច័ន្ទបុត្រ មិនបានសម្រុកសួរខ្លាំងៗក៏ដោយ ក៏លោក សុខ ឥសាន បាន​ភ្លាត់​មាត់​បញ្ចេញពាក្យសំដី ដ៏កម្រប៉ុន្មានឃ្លា យ៉ាងដូច្នេះថា៖ «កម្លាំងប្រជាជន ត្រូវប្រើប្រាស់ ដើម្បី​​បង្ក្រាប ព្រោះកម្លាំងប្រជាជនណ្នឹង ជាឧបករណ៍ដាច់ថ្លៃ ពីរាជរដ្ឋាភិបាលស្របច្បាប់។ មិនអាច​ឲ្យ​ជន​ណា ឬក្រុមណា ធ្វើផ្ដេសផ្ដាសបានទេ។»។

លោក សុខ ឥសាន ចង់និយាយពី«កម្លាំងប្រដាប់អាវុធ»?

តាមពិតទៅ ការភ្លាត់សម្ដីរបស់លោក សុខ ឥសាន ជាការឆ្លើយតប ទៅនឹងសំនួររបស់លោក សុន ឆៃ តំណាង​រាស្ត្រ និងជាមន្ត្រីជាន់ខ្ពស់ មកពីគណបក្សសង្គ្រោះជាតិ ដែលបានអង្គុយរួមតុពិភាក្សាជាមួយលោក នៅក្នុង​បន្ទប់​ផ្សាយ​​របស់​វិទ្យុអាស៊ីសេរី នារាជធានីភ្នំពេញ ក្នុងយប់ថ្ងៃទី២១ ខែមិថុនា ឆ្នាំ២០១៦នេះ។ បន្ទាប់ពីបាន​រៀប​រាប់ ពីសុច្ឆ័ន្ទៈរបស់គណបក្ស​សង្គ្រោះ​ជាតិ ក្នុង​បំណង​ចង់​ជួប​ចរចា ដែលតែង​ត្រូវបាន​គណបក្ស​ប្រជាជន​កម្ពុជា​​បដិសេធ ម្ដងជាពីរដងនោះ លោក សុន ឆៃ លើក​ជា​សំនួរ​ថា៖ «វាចេះតែសរសេរនេះ ខុស​នោះ... ឥឡូវ​ខ្ញុំ​មិន​ដឹង​រក​វិធីណា ក៏ប៉ុន្តែចង់សួរផ្ទាល់ (ទៅ​លោក សុខ ឥសាន) ថា​គួរ​យើង​ខ្ញុំ​ធ្វើ​ម៉េចទៅវិញ»?

ជាចម្លើយសង្ខេប អ្នកនាំពាក្យរបស់គណបក្សប្រជាជនកម្ពុជា បានថ្លែងឡើងថា៖ «យើងដែលជា​គណបក្ស​កាន់​អំណាច គឺយើងមានអំណាចនៅក្នុងដៃ មិនអាចឲ្យបុគ្គលណាមួយ បង្កើតអស្ថិរភាព នៅក្នុងសង្គមបាន​នោះ​ទេ ព្រោះ​សន្តិភាព​នេះ ពិបាករកណាស់។ (...) នៅក្នុងពេលដែលគ្រប់គ្រងនេះ បើសិនណាជាបាតុភាពអសកម្ម (បាតុកម្ម?) កើត​ឡើង ដែលប៉ុនប៉ងផ្ដួលរំលំ​រដ្ឋាភិបាល​ស្របច្បាប់នេះ មិនអាចអនុញ្ញាតបានទេ។ កម្លាំង​ប្រជាជន ត្រូវ​ប្រើប្រាស់​ដើម្បី​បង្ក្រាប។»

បើស្ដាប់តាមន័យនេះ បានសេចក្ដីថា លោក សុខ ឥសាន លើកយកមកនិយាយ ពីកង«កម្លាំងប្រដាប់អាវុធ» និងមិនមែនជា«កម្លាំងប្រជាជន»នោះទេ។ ណាមួយទៀត គណបក្សប្រជាជនកម្ពុជា មិនចូលចិត្តនរណាម្នាក់ ដែលប្រើពាក្យ«កម្លាំងប្រជាជន» ឬ«កម្លាំងមហាជន»នេះឡើយ។ តែចំណុចមួយ ដែលគួរឲ្យចាប់​អារម្មណ៍​​នោះ គឺ​នៅត្រង់ពាក្យ «ឧបករណ៍ដាច់ថ្លៃ» ទៅវិញទេ។ តើគណបក្សប្រជាជនកម្ពុជា ឬរដ្ឋាភិបាលកាន់អំណាច ចង់​និយាយ​ថា «កង​កម្លាំង​ប្រដាប់​អាវុធ ជា​ឧបករណ៍ដាច់ថ្លៃ» របស់ខ្លួនឬ?