«អង្គការសម្ព័ន្ឋមិត្តខ្មែរ-អាមេរិកាំង នឹងរៀបចំធ្វើបាតុកម្ម នៅមុខអាគារសភាសហរដ្ឋអាមេរិក នៅថ្ងៃសុក្រ ទី​១០ ខែមិថុនា ឆ្នាំ២០១៦» នេះជាអ្វី ដែលគេអាចអានបាន នៅក្នុងសេចក្ដីប្រកាសព័ត៌មាន របស់​អង្គការ​សម្ព័ន្ធ​មិត្ត​ខ្មែរ-អាមេរិកាំង ដែលហៅជាភាសាអង់គ្លេស «Cambodia-America Alliance» ចេញផ្សាយ​នៅ​លើ​ទំព័រ​ហ្វេសប៊ុក​ផ្លូវការរបស់ខ្លួន កាលពីថ្ងៃអង្គារម្សិលម៉ិញ។

សេចក្ដីប្រកាសព័ត៌មាននោះ បានសរសេរទៀតថា៖ «យើងធ្វើបាតុកម្ម ដើម្បីជម្រុញឲ្យសភាសហរដ្ឋអាមេរិក អនុម័តច្បាប់ដើម្បីទាមទារ ឲ្យក្រសួងការបរទេសសហរដ្ឋអាមេរិក ដាក់ទណ្ឌកម្មផ្នែកសេដ្ឋកិច្ច និងការទូត ទៅ​លើ​រដ្ឋាភិបាល ហ៊ុន សែន រហូតទាល់តែមានការដោះលែង អ្នកទោសនយោបាយ សកម្មជន​ការពារ​សិទ្ធិ​មនុស្ស និង​សកម្មជនដ៏ទៃទៀត ឲ្យមានសេរីភាព។»

អង្គការដដែលនេះ ក៏នឹងទាមទារទៅសភាអាមេរិក ឲ្យមានការអនុម័ត្តច្បាប់ ស្តីពីការបង្កើតនូវ​ក្រុម​ទាក់ទង​កម្ពុជា ដើម្បីធានាការបោះឆ្នោតដោយសេរី និងយុត្តិធម៌ និងធានាការផ្ទេរអំណាច ដោយសន្តិវិធីនៅកម្ពុជា។ អង្គការ​សម្ព័ន្ធមិត្តខ្មែរ-អាមេរិកបានធ្វើការអំពាវនាវ ទៅកាន់សហគមន៍ខ្មែរនៅជុំវិញពិភពលោក ឲ្យ​ចូលរួម​ដឹកនាំ​ធ្វើ​បាតុកម្ម​ដោយ​សន្តិវិធី នៅតាមសាលាក្រុង សភាជាតិ និងស្ថានទូតខ្មែរនានា នៅតាមបណ្ដា​ប្រទេស​​រៀងៗ​​ខ្លួន នៅថ្ងៃទី១០ ខែមិថុនា ខាងមុខនេះ ដើម្បីរំលឹកប្រាប់ពិភពលោកថា «ប្រទេសកម្ពុជា ពុំមាន​សេរីភាព​ឡើយ»។

ក្នុងសេចក្ដីប្រកាសព័ត៌មាន មានសរសេរបញ្ជាក់ទៀតថា៖ «របបផ្តាច់ការ ហ៊ុន សែន គឺជាការគំរាមកំហែង ដល់​សន្តិភាព និងស្ថិរភាព នៅកម្ពុជា ក៏ដូចជាលិទ្ធិប្រជាធិបតេយ្យ សេរីភាព និងយុត្តិធម៌»។

លោក ទូច វិបុល ប្រធានអង្គការសម្ព័ន្ធមិត្តខ្មែរ-អាមេរិកកាំង មានថ្លែងប្រាប់វិទ្យុសម្លេងប្រជាធិបតេយ្យថា បាតុកម្ម​ដែលអង្គការលោក គ្រោងរៀបចំឡើងនេះ អាចមានច្បាប់ពីអាជ្ញាធរអាមេរិក ឲ្យទទួលមនុស្សចូលរួម បាន​៣០០នាក់។ លោកបានពន្យល់ ពីវិធីសាស្ត្រក្នុងការទាមទារទៅសភាអាមេរិក ដើម្បីប្រាប់​ទៅរដ្ឋាភិបាល​អាមេរិក ឲ្យដាក់ទណ្ឌកម្មផ្នែកសេដ្ឋកិច្ច និងការទូត ទៅលើរដ្ឋាភិបាលលោក ហ៊ុន សែន ថាជា​ជម្រើស​មួយ​ដ៏​ប្រពៃ។

ប្រធានអង្គការសម្ព័ន្ធមិត្តខ្មែរ-អាមេរិកាំង បានអះអាងថា៖ «នេះជាជម្រើសមួយ ដ៏ប្រពៃ ដែលសហរដ្ឋ​អាមេរិក​អាច​ធ្វើ ឲ្យមានប្រសិទ្ធភាព នៅក្នុងការរកដំណោះស្រាយ (ដើម្បី) ដោះលែងអ្នកប្រជាធិបតេយ្យនានា ជា​ពិសេសស​កម្មជន​ការពារ​សិទ្ធិមនុស្ស ក៏ដូចជាអ្នកទោសនយោបាយនានា ហើយយន្តការ នៃការដាក់​គំនាប​ផ្នែក​សេដ្ឋកិច្ច និង​ការទូត​នេះ គឺជាដំណាក់កាលមួយ ដែលមានការចាំបាច់»។

ប៉ុន្តែការដាក់ទណ្ឌកម្មណាមួយ ពីសំណាក់អន្តរជាតិនោះ ត្រូវបានលោក ហ៊ុន សែន នាយករដ្ឋមន្ត្រី​-ប្រធាន​គណបក្ស​ប្រជាជនកម្ពុជា ធ្វើការព្រមានទុកជាមុនហើយ ជុំវិញសំនុំរឿងចាប់ចង ដែលបានធ្វើឡើង កាល​ពី​ពេល​ថ្មីៗ​នេះ ប្រឆាំង​​នឹង​ក្រុម​អ្នកការពារសិទ្ធិមនុស្ស និងក្រុមអ្នកនយោបាយប្រឆាំង។ ថ្លែងនៅ​ព្រឹក​ថ្ងៃ​​អាទិត្យ​​ទី​១​ ខែ​​ឧសភា កន្លង​​មក​​ថ្មីៗ​​​នេះ ​លោក​នាយករដ្ឋមន្ត្រីបានព្រមានបរទេសណាក៏ដោយ ​មិនឲ្យ​​លូក​ដៃ​ ចូល​​​កិច្ច​ការ​​​ផ្ទៃ​​​ក្នុង​​​របស់​​​កម្ពុជា​​​ឡើយ ដោយ​លោក​បញ្ជាក់ថា កម្ពុជាមាន​ឯករាជ្យភាព អធិបតេយ្យភាព និង​បូរណភាព​​ទឹក​ដី។ កាល​​​ពី​​​ពេល​​​​កន្លង​​​មក លោក ហ៊ុន សែន ក៏ធ្លាប់បានថ្លែងជាសាធារណៈដែរ ថារាល់ទណ្ឌកម្មណាក៏ដោយ មិន​​បាន​​ប៉ះ​ពាល់​​ដល់​​រូប​​លោក​​នោះ​​ទេ តែ​គឺ​ប្រជាជន​កម្ពុជា​ទៅ​វិញ​ទេ ដែលជាអ្នករងគ្រោះ៕