ការបះទង្គិចសារជាថ្មីទៀត បានកើតឡើងរវាងសហរដ្ឋអាមេរិក និងប្រទេសរ៉ូស្ស៊ី នៅថ្ងៃព្រហស្បត្តិ៍កន្លងមក។ នេះ ជាការអះអាងកាលពីថ្ងៃសៅរ៍ របស់អ្នកស្រី ឡ័រ៉ា សៀល (Laura Seal) អ្នកនាំពាក្យមន្ទីរ​ប៉ង់តាហ្គោន (Pentagone = ក្រសួងការពារជាតិអាមេរិក)។ យន្ដហោះយោធាឈ្លបការណ៍មួយគ្រឿង របស់កងទ័ព​អាមេរិក ត្រូវបានស្ទាក់ចាប់ ដោយយន្ដហោះប្រដេញ របស់កងទ័ពរ៉ូស្ស៊ី។ សកម្មភាពនេះ ត្រូវបាន​ធ្វើ​ឡើង ដោយ​មិន​បាន​គិត​ពី​សុវត្ថិភាព និងដោយគ្មានសីលធម៌វិជ្ជាជីវៈ។

អ្នកស្រី ឡ័រ៉ា សៀល បានថ្លែងឲ្យដឹងថា៖ «យន្ដហោះយោធាអាមេរិក បានហោះហើរ នៅក្នុង​លំហ​អាកាស​អន្តជាតិ និងមិនបានចូលទៅក្នុងទឹកដីរ៉ូស្ស៊ី សូម្បីបន្តិចឡើយ»។

យន្ដហោះឈ្លបការណ៍អាមេរិកនោះ ជាប្រភេទ «Boeing RC-135» ខណៈយន្ដហោះប្រដេញរ៉ូស្ស៊ី ជាប្រភេទ «Soukhoï Su-27»។

ការប៉ះទង្គិចនេះ បានកើតឡើងជាលើកទីពីរ នៅក្នុងអំឡុងពេលតែមួយសប្ដាហ៍ប៉ុណ្ណោះ រវាងប្រទេស​មហា​អំណាចទាំងពីរ។ យន្ដហោះប្រដេញ ធុន «Su-24» របស់ប្រទេសរ៉ូស្ស៊ី រំលងពីលើនាវាល្បាត សម្រាប់​សង្គ្រាម​លើទឹក ធុន «USS Donald Cook» របស់ប្រទេស​អាមេរិក បានកើតឡើងជាច្រើនដង នៅថ្ងៃចន្ទ និងថ្ងៃអង្គារ។ បញ្ជាការដ្ឋាន​កងទ័ព​អាមេរិក ប្រចាំទ្វីបអ៊ឺរ៉ុប បានថ្លែងឲ្យដឹងថា ជាពិសេសនៅថ្ងៃពុធ យន្ដហោះ​ប្រដេញ​រ៉ូស្ស៊ី ធុន «Su-24» បាន​ហោះ​ត្រឹម​តែ​កំពស់ ​ប្រមាណ ជា៩ម៉ែត្រ ពីលើនាវាចម្បាំងអាមេរិកប៉ុណ្ណោះ។ ទង្វើ​ខាង​លើ ត្រូវ​បាន​ក្រសួងការពារជាតិអាមេរិក ចាត់ទុកថាមាន​សណ្ឋាន ហាក់​ដូចជាការ​វាយ​ប្រហារ​មួយ និង​ជា​កាយវិការ ដ៏«ព្រហើន»។

ចំពោះប្រទេសរ៉ូស្ស៊ីវិញ បានច្រានចោល ការចោទប្រកាន់ដែលថា ខ្លួនបង្ករឿង និងខ្វះភាពហ្មឺងម៉ាត់​នៅ​ក្នុង​សកម្មភាព​ទាំងនេះ។

អ្នកស្រី ឡ័រ៉ា សៀល បានរំពឹងទៀតថា ការស្ទាក់ចាប់ដែលប្រកបដោយគ្រោះថ្នាក់នេះ អាចបង្ករបួស​ស្នាម​ធ្ងន់ធ្ងរ ទៅដល់អ្នកបើកបរយន្ដហោះទាំងអស់។ អ្នកស្រីអ្នកនាំពាក្យ បានថ្លែងបន្ថែមថា៖ «ជាងនេះទៅទៀត ទង្វើ​ដែល​ជា​ស្នាដៃរបស់អ្នកបើកបរយន្ដហោះម្នាក់ អាចបង្កឲ្យមានភាពតានតឺង រវាងប្រទេស​យើង​ទាំងពីរ»៕