«កុំទទួលទានបាយហើយ បោកឆ្នាំងចោល»។ នេះជាសុភាសិកចាស់បូរាណមួយឃ្លា ដែលព្រះអង្គម្ចាស់ នរោត្ដម រណឫទ្ធិ ប្រធានគណបក្សហ៊្វុនស៊ិនប៉ិច លើកយកមកមានបន្ទូល ប្រាប់ក្រុមអ្នកកាសែត នា​ព្រឹក​ថ្ងៃ​ទី​៣០ ខែមករានេះ បន្ទាប់ពីចប់កម្មវិធី ជួបប្រជុំពិភាក្សា ការងារ ជាមួយថ្នាក់ដឹកនាំ​គណបក្ស ប្រចាំរាជធានី ភ្នំពេញ និងសកម្មជនមូលដ្ឋាន នាភោជនីយដ្ឋានទន្លេបាសាក់២ ខណ្ឌចំការមន។

ព្រះអង្គម្ចាស់ បានថ្លែងព្រមាន ជន«ស៊ីបាយរួចបោកឆ្នាំងចោល» នោះទៀតថា បើអ្នកណាហ៊ានធ្វើអ្វីខុស ពី​គោលការណ៍របស់គណបក្ស នោះព្រះអង្គដែលជាប្រធានគណបក្ស នឹងចាត់វិធានការតាមផ្លូវច្បាប់។ ព្រះ​រាជ​បុត្រ របស់អតីតព្រះមហាវីរក្សត្រ នរោត្ដម សីហនុ អង្គនេះ បានមានបន្ទូលថា៖ «ប្រាប់អោយច្បាស់។ លក្ខន្តិកៈ​របស់គណបក្ស បើខ្ញុំនៅតែធ្វើជាប្រធានបក្ស ខ្ញុំនឹងចាត់វិធានការ លើមន្រ្តីណាដែលអនុវត្តន៍ ផ្ទុយពីច្បាប់បក្ស។ បើអ្នកណាធ្វើ សូមឲ្យទទួលខុសត្រូវ លើបក្សរាជានិយមជៀសវាង កុំបោកឆ្នាំងបាយ កុំកកូរ រើទៅណារើទៅ។»

បើទោះជាព្រះអង្គម្ចាស់ មិនបានលើកយកមន្ត្រី ដែល«ស៊ីបាយរួចបោកឆ្នាំងចោល»នោះ មកនិយាយ​ឲ្យចំ​ឈ្មោះ​ក៏ដោយ ក៏បន្ទូលនេះរបស់ទ្រង់ បានធ្វើឡើង នៅស្របពេលដែលព្រះអង្គ មានជំលោះ ពាក្យសំដី ជា​មួយ​លោកញឹក ប៊ុនឆៃ ដែលជាអគ្គលេខាធិការ របស់គណបក្ស ក្នុងពេលថ្មីៗនេះទៀត។ សម្រាប់ក្រុមអ្នក​តាម​ដាន​នយោបាយ បាន​ចាត់​ទុក​ថា បន្ទូលនេះទំនងជាទ្រង់ចង់បញ្ឆិតបញ្ឆៀង ឲ្យលោក ញឹក ប៊ុនឆៃ ផ្ទាល់តែម្ដង។

បង្កើតឡើងនៅឆ្នាំ១៩៩១ ចេញពីចលនាតស៊ូសីហនុនិយម គណបក្សហ្វ៊ុនស៊ីនប៉ិច បានរងការរង្គោះរង្គើ ជា​ច្រើន​លើក​ច្រើនសារ ហើយបានរងនូវការធ្លាក់សម្លេងគាំទ្រ យ៉ាងធ្ងន់ធ្ងរ ពី៥៨កៅអីក្នុងរដ្ឋសភានីតិកាលទី១ មក​សូន្យ​កៅអី​ នៅនីតិកាលទី៥នាពេលនេះ។ បន្ទាប់ពីព្រះអង្គបានចាកចេញ ទៅបង្កើតគណបក្សផ្សេង អស់​ជា​ច្រើនឆ្នាំ ព្រះអង្គម្ចាស់ រណឫទ្ធិ បានត្រឡប់​ចូល​មកធ្វើ ជា​ប្រធានគណបក្សនេះវិញ កាលពីដើមឆ្នាំ២០១៥​កន្លង​ទៅ។

យ៉ាងណាក៏ដោយ ក៏នៅក្នុងរយៈពេល១ឆ្នាំ នៃការត្រឡប់មកដឹកនាំគណបក្សនេះឡើងវិញ  គេនៅតែ​លេច​ឮ​ព័ត៌មានមិនឈប់ឈរ ពីជម្លោះផ្ទៃក្នុងរបស់គណបក្ស ជាពិសេស​រវាង​ព្រះអង្គ (នរោត្ដម រណឫទ្ធិ) និង​លោក ញឹក ប៊ុនឆៃ ខណៈពេលដែលព្រះអង្គម្ចាស់ អង្គឯងបានបញ្ជាក់​អះអាង​ ពី​សកម្មភាព​កន្លងមក ថាជា​«កំណែ​ទម្រង់»​​មួយ។

មានបន្ទូលបន្ត ទៅកាន់អ្នកសារព័ត៌មាន នាព្រឹកថ្ងៃទី៣០ ខែមករាដដែលនេះ ព្រះអង្គបានឲ្យដឹងថា គោលដៅ​របស់​ព្រះអង្គ គឺទីមួយ រៀបចំរចនាសម្ព័ន្ឋគណបក្សឡើងវិញ និងទី២ ការដាក់ស្លាក ព្រមទាំងប្រមែប្រមូល​អ្នក​រាជា​និយមនោះផង។ ព្រះអង្គបានមានបន្ទូលព្រមានទៀតថា៖ «យើងបានធ្វើ២នេះហើយ។ (...) ខ្ញុំមិនដេញ​អ្នកណា​ចេញទេ តែបើគេចង់ចេញទៅ ជាមួយបក្សណាក៏ចេញទៅ»។

មិនទាន់មានប្រតិកម្មពីលោក ញឹក ប៊ុនឆៃ នៅឡើយ ហើយទស្សនាវដ្ដីមនោរម្យ.អាំងហ្វូ ក៏មិនអាចទាក់ទង​លោក​បានដែរ ដោយហៅទូរសព្ទ័ តែគ្មានការទទួលនិយាយ៕