ដំណឹងចេញពីប្រទេសកូរ៉េខាងជើង កាន់តែធ្វើឲ្យ​ពិភពលោក «ញ៉ាក់សាច់» ខ្លាំងឡើង។ ទីក្រុងព្យុងយ៉ាង ទំនង​ជាកំពុងរៀបចំការបាញ់សាកល្បង នូវកាំជ្រួចរយៈឆ្ងាយមួយទៀត។ នេះបើតាមសេចក្ដី​រាយការណ៍​នានា របស់​សារព័ត៌មានជប៉ុន ចេញផ្សាយក្នុងចុងសប្ដាហ៍នេះ។ ប្រសិនជាគម្រោងសាកល្បង ពិតជា​មាន​មែន​នោះ បាន​ន័យ​ថា នេះសកម្មភាពថ្មីមួយទៀត នៅក្នុងរយៈពេល តែ៣សប្ដាហ៍ក្រោយ ការ​សាក​ល្បង​គ្រាប់​បែក​នុយក្លេអ៊ែរ ជាលើកទី៤ កាលពីដើមខែមករាកន្លងមក របស់ប្រទេសកុម្មុយនីស។

ប្រព័ន្ធផ្សព្វផ្សាយជប៉ុន ដូចយ៉ាងទីភ្នាក់ងារព័ត៌មាន «Kyodo» ជាដើម បានយោងប្រភពពីរដ្ឋាភិបាល​ជប៉ុន ទាក់ទងនឹងការវិភាគ ទៅលើរូបភាព ដែលចាប់បានដោយប្រព័ន្ធផ្កាយរណប បង្ហាញពីការរៀបចំ នូវ​ការ​បាញ់​កាំជ្រួចមួយ ពីមជ្ឈមណ្ឌល «Dongchang-ri» ភាគខាងលិច​នៃប្រទេសកូរ៉េខាងជើង។ ការរៀបចំ​ការ​បាញ់​នេះ អាចនឹងរួចរាល់ នៅក្នុងអំឡុងមួយសប្ដាហ៍ខាងមុខ។ ទូរទស្សន៍ «NHK» របស់ជប៉ុន ក៏បាន​ស្រង់​ប្រភព​នោះ មកអះអាងទៀតថា ចលនាផ្លាស់ប្ដូរ របស់មនុស្ស និងយានយន្ដជាច្រើន ត្រូវបានមើលឃើញ នៅក្នុង និង​ជុំវិញ​មជ្ឈមណ្ឌល​នោះ។ យានយន្ដទាំងនោះ ត្រូវបានបិតគ្រប ដោយក្រណាត់។

រូបភាពនោះ មិនត្រូវបានបញ្ចេញដោយដឹងទេ...

ទីភ្នាក់ងារព័ត៌មាន «Kyodo» មិនបានអះអាងឲ្យច្បាស់ ពីប្រភពនៃការវិភាគ ទៅលើរូបភាពទាំងនោះទេ។ ប៉ុន្តែ​តាំងពីឆ្នាំ២០០៣មក ប្រទេសជប៉ុនបានបង្កើត នូវប្រព័ន្ធ«ឃ្លាំមើល»មួយ ពីលើអាកាស ទៅលើ​ប្រទេស​កូរ៉េខាងជើង។ សហរដ្ឋអាមេរិក ដែលជាសម្ព័ន្ធមិត្តដ៏សំខាន់ រប​ស់ប្រទេសជប៉ុនវិញ ក៏បានធ្វើការ​ដូច​គ្នា​នេះ ជា​រឿយៗ ពីលើអាកាសដូចគ្នាដែរ។

ប្រទេសកូរ៉េខាងជើង បានធ្វើការសាកល្បង បាញ់កាំជ្រួចជាច្រើនលើកច្រើនគ្រាហើយ នៅក្នុង​ពេល​កន្លង​មក។ កាលពីខែធ្នូ ឆ្នាំ២០១២ ប្រទេសនេះបានអះអាងថា បានបាញ់កាំជ្រួចផ្កាយរណប ធុន «Unha-3» មួយ ឡើងទៅលើអាកាស។ ប៉ុន្តែសម្រាប់សហរដ្ឋអាមេរិកវិញ បានរកឃើញថា សកម្មភាពនាពេលនោះ គឺ​ជា​ការ​បាញ់​សាកល្បង កាំជ្រួចរយៈឆ្ងាយមួយ របស់របបកុម្មុយនីស៕

» សកម្មភាពត្រៀមបាញ់កាំជ្រួចផ្កាយរណប ធុន «Unha» របស់ប្រទេសកូរ៉េខាងជើង៖