ប្រសិនបើសេចក្ដីព្រាងច្បាប់ ស្តីពី«សមាគម និងអង្គការក្រៅរដ្ឋាភិបាល» កំពុងត្រូវបានរដ្ឋសភាកម្ពុជា ទទួល​យកមកពិនិត្យ បន្ទាប់រងនូវភាពចម្រូងចម្រាស រវាងរដ្ឋាភិបាល និងក្រុមអង្គការសង្គមស៊ីវិលនោះ ស្រាប់តែ​ពេលនេះ គេបានឮប្រតិកម្មជាលើកដំបូង រស់ព្រះអង្គម្ចាស់ នរោត្ដម រណឫទ្ធិ ប្រធានគណបក្សហ្វុនស៊ីនប៉ិច ដោយព្រះអង្គបានគាំទ្រ ឲ្យមានច្បាប់នេះ នៅក្នុងប្រទេសកម្ពុជា។ ប៉ុន្តែប្រធានគណបក្សហ្វុនស៊ីនប៉ិចអង្គ​នេះ បានមានបន្ទូលថា ក្រុមអង្គការសង្គមស៊ីវិល ក៏គួរជាអ្នកសម្រេច ទៅលើច្បាប់នេះដែរ។

ការលើកឡើងរបស់ព្រះអង្គ ត្រូវបានធ្វើឡើង នៅចំពោះមុខ ក្រុមអ្នកសារព័ត៌មាន នាស្នាក់ការគណបក្ស​ហ្វុនស៊ីនប៉ិច កាលបីព្រឹកថ្ងៃទី១៨ ខេមិថុនា ឆ្នាំ២០១៥។ ព្រះរាជបុត្រ នៃអតីតព្រះមហារវក្សត្រ នរោត្ដម សីហនុ បានបង្ហាញ ពីការយល់ឃើញរបស់ទ្រង់ថា អង្គការក្រៅរដ្ឋាភិបាល មានតួនាទីធំធេង ក្នុងសង្គម​កម្ពុជា។ ព្រះអង្គបាន​លើក​ឡើង​ថា ដើម្បី ថែរក្សានូវអ្វី ដែលជាតម្រូវការ របស់មនុស្សទាំងអស់គ្នា ដូចជា​លិទ្ធិ​ប្រជាធិបតេយ្យ សេរីពហុបក្ស ដែលស្របតាមរដ្ឋធម្មនុញ្ញ នៃព្រះរាជាណាចក្រកម្ពុជា និងដើម្បីធានា នូវ​អព្យាក្រិត្យភាព​នយោបាយ (របស់អង្គការសង្គមស៊ីវិល) ជាដើម ជូនដល់ប្រទេសជាតិទាំងមូលនោះ  អង្គការ​ក្រៅរដ្ឋាភិបាលទាំងនោះ ត្រូវតែមានតួនាទីច្បាស់លាស់ អាចធានាដោយច្បាប់ ជាធរមាននៅកម្ពុជា។

ព្រះអង្គបានបង្ហាញនូវការសោកស្តាយ ដែលគណបក្សរបស់ព្រះអង្គ មិនមានវត្តមាននៅក្នុងរដ្ឋសភា ដើម្បី​ចូលរួម ធ្វើការជជែកដេញដោល ឬវិភាគលើច្បាប់មួយនេះ។ យ៉ាងណាក៏ដោយ ព្រះអង្គនៅតែបញ្ជាក់ ពី​ជំហរ​ផ្ទាល់របស់ទ្រង់ថា ច្បាប់គ្រប់គ្រងអង្គការក្រៅរដ្ឋាភិបាលនេះ សម្រាប់កម្ពុជាដាច់ខាតត្រូវតែមាន។ ប៉ុន្តែ​ច្បាប់​នេះទៀតសោត ដាច់ខាតក៏ត្រូវស្ថិត ក្រោមការត្រួតពិនិត្យ វាយតម្លៃ វែកញែក ពិភាក្សា និងសម្រេច ពីក្រុម​អង្គការសង្គមស៊ីវិលដែរ។ តាមនយោបាយរបស់គណបក្សហ្វុនស៊ីនប៉ិច ព្រះអង្គបញ្ជាក់ថា៖ «ប្រគល់​តួនាទី​ដ៏​ធំបំផុត ដល់អង្គការក្រៅរដ្ឋាភិបាល (ដើម្បីពិនិត្យ ពិភាក្សា ផ្តល់យោបល់ និងសម្រេចលើច្បាប់​មួយ​នេះ)»៕