វាពិតជាមានន័យ ប្រសិនបើគេតាមដាន ការឆ្លើយឆ្លងគ្នា រវាងគណបក្សសង្គ្រោះជាតិ និងគណបក្សសម្ព័ន្ធ ដើម្បីប្រជាធិបតេយ្យ នៅក្នុងរយៈពេលចុងក្រោយ ហើយកំពុងបន្តភាគ​ទៅមុខ យ៉ាងសម្បើមដៃ។

ថ្លែងទៅកាន់​សមាជិក និងថ្នាក់ដឹកនាំ​គណបក្សប្រចាំខេត្ត ព្រះសីហនុ កាលពី ព្រឹកថ្ងៃទី០៨ ខែធ្នូ ឆ្នាំ២០១៥ លោក យ៉ែម បុញ្ញឬទ្ធិ ដែលអ្នកនាំពាក្យ គណបក្ស​សង្គ្រោះជាតិ បានបរិហារអ្នកនយោបាយ មកពីគណបក្ស​មួយ ដោយមិនបញ្ចេញឈ្មោះ ថាចូលចិត្តប្រើពាក្យអសុរោះ ដូចជាពាក្យ អាឈាមថោក អាឈាមឆ្កែ អាចម៌ មក​លើថ្នាក់ដឹកនាំ គណបក្សសង្គ្រោះជាតិ និងថែមទាំងជេរសាសនា ដែលជាសាសនា​របស់រដ្ឋថែមទៀត។

ពាក្យសម្ដីអសុរោះ ទាំងប៉ុន្មានខាងលើនេះ បើគេមិនច្រឡំទេ លោក យ៉ែម បុញ្ញឬទ្ធិ ទំនងជាចង់និយាយ​ដល់​លោក ខឹម វាសនា ប្រធានគណបក្សសម្ព័ន្ធ ដើម្បីប្រជាធិបតេយ្យ ដែលគណបក្សនេះ ហៅខ្លួនឯងថា គណបក្ស​«ជួង»។ ប៉ុន្តែអ្នកនាំពាក្យ របស់គណបក្សប្រឆាំងក្នុងរដ្ឋសភា ដែលសម្បូរដោយវោហាស័ព្ទរូបនេះ បាន​និយាយ​ចំអក ដោយចំៗតែម្ដងថា អ្នកខ្លះថា លោកមិនស្គាល់ជួង មិនស្គាល់កណ្តឹង មុននឹងបកស្រាយ​ឡើងថា៖ «ជួង គឺយ៉ាន់ឡាន គេប្រើសំរាប់ វ៉ៃជួងចេញលេង សំរាប់ក្មេងរៀន នៅសាលាបឋម រីឯកណ្តឹង គេ​ប្រើ​សំរាប់ លក់ការ៉េមកី»។

តបទៅនឹងការលើកឡើង របស់លោក យ៉ែម បុញ្ញឬទ្ធិ ខាងលើ លោក ខឹម វាសនា ប្រធានគណបក្ស«ជួង» បាន​សរសេរតប នៅគណនីហ្វេសប៊ុករបស់លោក ទំនងជាទទួលស្គាល់ថា ជួងមានតម្លៃថោកមែន តែ​បើ​មាន​ជួងកាន់តែច្រើន នោះវាយចេញស្នូរកាលណា នឹងតម្លើងសម្លេងខ្លាំង បានកាលនោះ។ លោក បានសរសេរ​ថា៖ «លុយមួយរៀល ផ្គំុគ្នាច្រើន អាចបង្កើតបានលុយរាប់លាន រាប់កោដិ ដែលមានតំលៃមហាសាលបាន»

បន្ទាប់​មកលោក ខឹម វាសនា បានបន្តបរិហា តបទៅវិញថា៖ «តែមនុស្សមួយរៀល ផ្គំគ្នាច្រើនប៉ុណ្ណា ច្រើនដល់​រាប់លាននាក់ក៏ដោយ ក៏នៅតែមនុស្សមួយរៀលៗ ជាដដែលហ្នឹងឯង។ វានៅតែជាក្រុមមនុស្ស ដែលគ្មាន​តំលៃ លើលពីមួយរៀលហ្នឹងឯង។»

សំណេររបស់លោក ខឹម វាសនា ត្រូវបានអ្នកប្រើប្រាស់បណ្ដាញសង្គម ធ្វើការចែករំលែកភ្លាមៗ និងជាច្រើន​ដង។ ម្នាក់ពីក្នុងនោះ បានចោទសួរ ទៅលោកប្រធានគណបក្សជួងវិញថា តើក្រុមមន្ត្រី របស់គណបក្ស​សង្គ្រោះ​ជាតិ និងអ្នកគាំទ្រ ឬបូកថែមទាំងពលរដ្ឋកម្ពុជា រាប់លាននាក់ (ជិតកន្លះប្រទេស) ដែលបោះឆ្នោត​ឲ្យ​គណបក្ស​មួយនេះ ក្នុងពេលកន្លងមក សុទ្ធតែជាមនុស្ស«មួយរៀល» ដូចការលើកឡើងរបស់លោកមែនឬ?