នយោបាយកម្ពុជា - ក្នុងពិធីមួយនៅក្រសួងព័ត៌មាន ថ្ងៃទី២៦ ខែកុម្ភៈ លោក ខៀវ កាញារីទ្ធ រដ្ឋមន្រ្តីក្រសួងព័ត៌មាន និងជាអ្នកនាំពាក្យរដ្ឋាភិបាលកម្ពុជា បានអត្ថាធិប្បាយថា រដ្ឋាភិបាល និងរដ្ឋសភា បច្ចុប្បន្ននេះ គឺបង្កើតឡើង​ស្រប​តាមរដ្ឋធម្មនុញ្ញ តាមរយៈការបោះឆ្នោតជាតិ ខែកក្កដា ឆ្នាំ២០១៣ ហើយកំពុងបំពេញភារៈកិច្ចជាប្រក្រតី និងមាន​ការទទួលខុសត្រូវខ្ពស់ ចំពោះប្រជាពលរដ្ឋម្ចាស់ឆ្នោត។

អ្នកនាំពាក្យរដ្ឋាភិបាលកម្ពុជា ដដែលនេះ បានបន្ថែមថា ការញុះញង់ អុជអាល បញ្ឆេះកំហឹង បង្កភាពអនាធិបតេយ្យ បិទផ្លូវសាធារណៈ វាយកំទេចទ្រព្យសម្បត្តិសាធារណៈ និងទ្រព្យសម្បត្តិតាមរោងចក្រនានា ជាដើមនោះ គឺបានឆ្លុះ​បញ្ចាំង ថាការទាមទាររបស់គណបក្សជំទាស់ មិនមែត្រឹមតែការស្វែងរកយុត្តិធម៌ ចំពោះលទ្ធផលបោះឆ្នោតនោះទេ តែជាការបង្កការលំបាកគ្រប់បែបយ៉ាង ក្នុងចេតនាដាក់សម្ពាធលើរដ្ឋាភិបាល និងទាមទារឲ្យមានការ​បោះឆ្នោត​ឡើងវិញ មុនបញ្ចប់អាណត្តិ ដែលទង្វើបែបនេះ គឺជាការបំពានយ៉ាងធ្ងន់ធ្ងរលើរដ្ឋធម្មនុញ្ញកម្ពុជា និងគោលការណ៍​លិទ្ធិ​ប្រជាធិបតេយ្យ។

បើទោះជាលោក ខៀវ កាញារីទ្ធ បានចោទប្រកាន់យ៉ាងនេះក៏ដោយ ក៏លោក សម រង្ស៊ី ប្រធានគណបក្សសង្រ្គោះជាតិ ដែលជាគណបក្សជំទាស់ នៅថ្ងៃទី២៦ ខែកុម្ភៈ បានថ្លែងទៅកាន់សកម្មជនគាំទ្រ នៅខេត្តកណ្តាល ថា គណបក្ស​សង្រ្គោះជាតិ និងអ្នកគាំទ្រ នៅតែប្រកាន់គោលជំហរដដែល នោះគឺការទាមទារឲ្យមានការផ្លាស់ប្តូរនៅកម្ពុជា ឲ្យ​បាន​ដាច់ខាត តាមរយៈគោលការណ៍អហិង្សា គឺការបោះឆ្នោតឡើងវិញមុនបញ្ចប់អាណត្តិ។ ប្រធានគណបក្សជំទាស់ រូប​នេះបញ្ជាក់៖ «មិនយូរទេ នឹងមានការផ្លាស់ប្តូរនៅកម្ពុជា ដោយសន្តិវិធី»។

គួរកត់សម្គាល់ថា ប្រទេសកម្ពុជា មានភាពជាប់គាំងផ្នែក នយោបាយជាង៦ ខែមកហើយ តាំងពីក្រោយការបោះឆ្នោត​ជាតិខែកក្កដា ឆ្នាំ២០១៣។ ការអូសបន្លាយវិបត្តិនយោបាយនេះ ក៏ព្រោះតែគណបក្សសង្រ្គោះជាតិ ដែលជា​គណបក្ស​ជំទាស់ បដិសេធលទ្ធផលបោះឆ្នោត ដ៏ចម្រូងចម្រាសនោះ ថាមានភាពមិនប្រក្រតីធ្ងន់ធ្ងរ និងមិនបានទទួលស្គាល់​រដ្ឋសភា និងរដ្ឋាភិបាល បច្ចុប្បន្ននោះទេ ហើយទាមទារឲ្យមានការបោះឆ្នោតឡើងវិញ មុនបញ្ចប់អាណត្តិ ក្រោយ​ការ​ធ្វើកំណែទម្រង់គណៈកម្មាធិការជាតិរៀបចំការបោះឆ្នោត(គ.ជ.ប)៕