មនុស្សចំនួន២២៤នាក់ រួមមានទាំងអ្នកដំណើរ អ្នកទេសចរណ៍ និងបុគ្គិលបម្រើការ នៅលើយន្ដហោះផង បានស្លាប់គ្មានសល់ម្នាក់ នៅក្នុងហេតុការណ៍ធ្លាក់យន្ដហោះមួយ កាលពីព្រឹកថ្ងៃសៅរ៍ ទី៣១ ខែតុលា ឆ្នាំ​២០១៥​នេះ នៅលើឧបទ្វីប ស៊ីណៃ ភាគខាងកើតនៃប្រទេសអេហ្សីប។ ការស៊ើបអង្កេតជំហ៊ានដំបូង បាន​ឲ្យដឹង​ថា គ្រោះថ្នាក់នេះទំនងជាបណ្ដាល មកពីបញ្ហាបច្ចេកទេស តែក្រុមសមាជិកសាខា នៃរដ្ឋអ៊ីស្លាម (បារាំង​ហៅ EI និង​អង់គ្លេស​ហៅ ISIS) បានអះអាងថា ពួកខ្លួនទើបនឹងបានបាញ់ទម្លាក់យន្ដហោះនេះ ដែល​ទើប​នឹង​ហោះចេញ ពី​ព្រលាន​យន្ដហោះ ក្រុង«Charm el-Cheikh»។

យន្ដហោះអ៊ែរប៊ូស របស់ក្រុមហ៊ុន «Metrojet» ដែលបម្រើសេវាកម្មធូរថ្លៃ នៅក្នុងប្រទេសរ៉ូស្សី បានហោះ​ងើបខ្លួនពីដី នៅព្រឹកវេលាម៉ោង៥និង៥១នាទី (ម៉ោងក្នុងស្រុក) ពីក្រុងទេសចរណ៍ «Charm el-Cheikh»​ ដែល​ស្ថិត​នៅ​មាត់​សមុទ្រ​ក្រហម ដើម្បីហោះឆ្ពោះមកកាន់ក្រុង «Saint-Pétersbourg» របស់​​ប្រទេស​រ៉ូស្ស៊ី។ បន្តិច​ក្រោយ​មក យន្ដហោះបានធ្លាក់នៅក្នុងតំបន់ «Hassana» ដែលសម្បូរទៅ​ដោយ​ភ្នំ ស្ថិត​នៅ​ភាគ​កណ្ដាល​នៃ​ឧបទ្វីប របស់​ប្រទេស​អេហ្សីប។ នេះបើតាមការសេចក្ដីប្រកាសព័ត៌មាន របស់​ក្រសួង​អាកាសចរណ៍​ស៊ីវិល​អេហ្សីប។

ក្រុមរដ្ឋអ៊ីស្លាម ចេញមុខទទួលខុសត្រូវ...

តួនិងបំណែកយន្ដហោះ ដែលរាយប៉ាយនៅទីកន្លែងធ្លាក់នោះ ត្រូវបានរកឃើញ ដោយកងទ័ពអេហ្សីប នា​វេលា​ថ្ងៃត្រង់។ អាជ្ញាធរអេហ្សីប បានឲ្យដឹងថា ពីក្នុងចំណោមមនុស្សទាំង២២៤នាក់ នៅលើយន្ដហោះ មាន​២១៧​នាក់​ជាអ្នកដំណើរ ក្នុងនោះ២១៤នាក់ជាជនជាតិរ៉ូស្ស៊ី និង៣នាក់ជាជនជាតិអ៊ុយក្រែន។ ទាំង​ប្រទេស​អេហ្សីប ទាំងប្រទេសរ៉ូស្ស៊ី សុទ្ធតែបានប្រកាសដូចគ្នា និងភ្លាមៗថា មិនមាននរណាម្នាក់ នៅរស់រាន​មាន​ជីវិត បន្ទាប់​ពីគ្រោះថ្នាក់យន្ដហោះនេះទេ។

ផ្នែកសាខាមួយ ប្រចាំនៅប្រទេសអេហ្សីប របស់ក្រុមរដ្ឋអ៊ីស្លាម បានអះអាងនៅលើបណ្ដាញសង្គម ទ្វីសធើរ ទទួលខុសត្រូវពីការធ្លាក់យន្ដហោះនេះ ដោយបានបញ្ជាក់មូលហេតុថា ដើម្បីជាការឆ្លើយតប ទៅនឹង​អន្តរាគមន៍​យោធា របស់កងទ័ពរ៉ូស្ស៊ី នៅក្នុងប្រទេសស៊ីរី។ ប៉ុន្តែរដ្ឋមន្ត្រីដឹកជញ្ជូនរ៉ូស្ស៊ី លោក «Maxime Sokolov» បាន​វាយតម្លៃការទទួលខ្លួន​របស់ក្រុមរដ្ឋអ៊ីស្លាម ថាមិនអាចចាត់ទុក ជាការពិតបានឡើយ។

អ្នកបើកបរយន្ដហោះ បានសុំដូរផ្លូវ...

យន្ដហោះរបស់ក្រុមហ៊ុន «Metrojet» បានបាត់ការទាក់ទង មកការិយាល័យត្រួតពិនិត្យការហោះហើរ ដែល​ស្ថិតនៅលើដី នៅប្រមាណជា២៣នាទី ក្រោយការហោះចេញ ពីព្រលានយន្ដហោះ នៅក្រុង «Charm el-Cheikh»។ នៅវេលានោះ យន្ដហោះបានហោះ នៅកំពស់ប្រមាណជាង ៩ពាន់ម៉ែត្រពីដី។ បើតាម​ទីភ្នាក់ងារ​សារព័ត៌មានរ៉ូស្ស៊ី «RIA» បានឲ្យដឹងថា អ្នកបើកបរយន្ដហោះ បានទាក់ទងមកអ្នក​គ្រប់គ្រង​ផ្លូវ​ហោះហើរ​នៅ​លើ​ដី ដើម្បីនិយាយប្រាប់ពីបញ្ហាបច្ចេកទេស ដែលយន្ដហោះខ្លួនមាន ហើយបានស្នើសុំដូរផ្លូវ​ហោះហើរ ទៅចុះចតជាបន្ទាន់ នៅព្រលានយន្ដហោះនៃរដ្ឋធានី គែរ ប្រទេសអេហ្សីប។ បន្ទាប់ពីនោះមក ការ​ទាក់ទងបានបាត់ដំណឹង សូន្យឈឹងតែម្ដង។

ប្រភពមួយ ស្និតនឹងការិយាល័យសុវត្ថិភាពផ្លូវអាកាស របស់ប្រទេសអេហ្សីប បានឲ្យដឹងថា ការពិនិត្យមើល តួនិងបំណែកយន្ដហោះ នៅនឹងកន្លែងធ្លាក់ បានបង្ហាញថា បញ្ហាបច្ចេកទេស គឺជាមូលហេតុនៃការធ្លាក់នេះ។ រហូត​មកដល់ពេលនេះ គេមិនបានរកឃើញថា យន្ដហោះត្រូវបានបាញ់ទម្លាក់ ឬមានស្លាកស្នាមបំផ្ទុះ នៅលើ​អាកាសនោះឡើយ។ ប្រអប់«ខ្មៅ»មួយ ពីក្នុងចំណោមប្រអប់ខ្មៅទាំងពីរ របស់យន្ដហោះ ត្រូវបានរក​ឃើញ​ភ្លាមៗ​ ខណៈ​កងកម្លាំងរបស់អាជ្ញាធរអេហ្សីប បានប្រមូលសាកសព របស់ជនរងគ្រោះ បាន១២០នាក់ ដែល​នៅ​​មាន​សភាពល្អ ដើម្បីទុកធ្វើកោសលវិច្ឆ័យ។

ថ្ងៃអាទិត្យនេះ ជាថ្ងៃកាន់ទុក្ខរបស់ប្រទេសរ៉ូស្ស៊ី...

ប្រធានាធិបតីរ៉ូស្ស៊ី លោក វ្លាឌីមៀរ ពូទីន (Vladimir Poutine) បានចេញបញ្ជាភ្លាមៗ ឲ្យបញ្ជូនក្រុម​ជួយ​សង្គ្រោះ និងរដ្ឋមន្ត្រីដឹកជញ្ជូនរបស់លោក ទៅកាន់តំបន់ដែលយន្ដហោះធ្លាក់។ លោក ពូទីន បានចូលរួម​សម្ដែង​មរណៈទុក្ខ ជាមួយនឹងគ្រួសារនៃជនរងគ្រោះ និងបានកំណត់យកថ្ងៃអាទិត្យនេះ ជាថ្ងៃកាន់ទុក្ខ​របស់​ប្រទេសរ៉ូស្ស៊ីទាំងមូល។ បើតាមសេចក្ដីប្រកាសព័ត៌មានមួយ របស់វិមានក្រឹមឡាំង បានឲ្យដឹងថា លោក ពូទីន បានជួបជជែកតាមទូរស័ព្ទ ជាមួយប្រធានាធិបតី នៃប្រទេសអេហ្សីប លោក អាបដែល ហ្វាតា អាល់ ស៊ីស៊ី (Abdel Fattah al-Sissi) និងទទួលបានការសន្យា ពីប្រទេសអេហ្សីប ថានឹងបង្កនូវលក្ខខណ្ឌដ៏ប្រសើរ សម្រាប់​ការចូលរួម ពីសំណាក់អ្នកជំនាញ របស់ប្រទេសរ៉ូស្ស៊ី ដើម្បីការស៊ើបអង្កេត រកពីមូលហេតុ​នៃ​គ្រោះថ្នាក់​ដ៏រន្ធត់នេះ៕