អាជ្ញាធរនៃប្រទេសម៉ាឡេស៊ី បានស្នើសុំជំនួយពីសំណាក់អេហ្វប៊ីអាយ (FBI) ដើម្បីធ្វើការពិនិត្យវិភាគ ទៅលើ​ទិន្នន័យក្នុងកំព្យូទ័រ ដែលត្រូវបានរៀបផ្គុំឡើង ជាឧបករណ៍ហ្វឹកហាត់បើកបរ របស់មេបញ្ជាការកាន់ចង្កូតយន្ដហោះ ប៊ូអ៊ីង ៧៧៧ នៃក្រុមហ៊ុនអាកាសចរណ៍ម៉ាឡេស៊ីអ៊ែរឡាញ ដែលបានបាត់ខ្លួនតាំងពីជាង១០ថ្ងៃមកហើយ។

ឧបករណ៍ហ្វឹកហាត់របស់ លោក ហ្សាហារី អាមេដ សាដ៍ មេបញ្ជាការបើកបរយន្ដហោះ។ (រូបថត ហ្វេសប៊ុក)

បាត់យន្ដហោះ - មន្ត្រីអ្នកទទួលខុសត្រូវមួយរូបរបស់អាមេរិក ក្នុងលក្ខខ័ណ្ឌមិនបញ្ចេញឈ្មោះ បានថ្លែង​ប្រាប់​ទីភ្នាក់ងារសារព័ត៌មានបារាំង (AFP) ឲ្យដឹង នៅថ្ងៃពុធទី១៩ ខែមីនានេះថា រដ្ឋាភិបាលនៃប្រទេសម៉ាឡេស៊ី បាន​ស្នើ​សុំឲ្យភ្នាក់ងារ នៃការិយាល័យសហព័ន្ធស៊ើបអង្កេតរបស់អាមេរិក ហៅកាត់ថា អេហ្វប៊ីអាយ ធ្វើការពិនិត្យអង្កេត ទៅលើសំនុំឯកសារព័ត៌មាន ដែលត្រូវបានលប់ចេញពីអង្គផ្ទុកក្នុងកំព្យូទ័រ ដែលផ្គុំរៀបចំធ្វើជាឧបករណ៍​ហ្វឹកហាត់​បើកបរ របស់លោក ហ្សាហារី អាមេដ សាដ៍ (Zaharie Ah-mad Shad) មេបញ្ជាការបើកបរយន្ដហោះប៊ូអីង។

អាជ្ញាធរម៉ាឡេស៊ី សង្ឃឹមថាអ្នកជំនាញអាមេរិក នឹងអាចរកឃើញត្រឡប់មកវិញ នូវទិន្នន័យដែលត្រូវបាន​លប់​ចោល​ទាំងនោះ ដើម្បីដឹងថាជាអ្វីឲ្យពិតប្រាកដ។

ឧបករណ៍ហ្វឹកហាត់របស់ លោក ហ្សាហារី អាមេដ សាដ៍ មេបញ្ជាការបើកបរយន្ដហោះ ជាប្រព័ន្ធកំព្យូទ័រមួយ​ដែល​លោក បានតម្លើងវានៅក្នុងផ្ទះរបស់លោក ដើម្បីធ្វើការសាកល្បងការហោះហើរនានា ជាពិសេសការហោះហើរ​ដែលអ្នកស៊ើបអង្កេតរកឃើញថា លោកបានហ្វឹកហាត់សាកល្បងចុះចតយន្ដហោះប្រភេទប៊ូអ៊ីង ៧៧៧ នេះ នៅលើ​ចម្ងាយផ្លូវតែ១០០០ម៉ែត្រ ជៀសជាងចម្ងាយផ្លូវចុះចត ដែលត្រូវធ្វើជាធម្មតា រហូតដល់១៥០០ម៉ែត្រយ៉ាងតិច។ នៅ​ក្នុងកំព្យូទ័រនោះ ក្រុមអ្នកស៊ើបអង្កេតម៉ាឡេស៊ី បានរកឃើញទៀតថា ផ្នែកមួយនៃទិន្នន័យនៅក្នុងអង្គផ្ទុក ត្រូវបាន​លប់ចេញកាលពីដើមខែកុម្ភះ។

លោក ហ្សាហារី អាមេដ សាដ៍  អាយុ៥៣ឆ្នាំ បានបញ្ជាបើកយន្ដហោះនេះ ចេញពីរដ្ឋធានីកូឡាឡំពួរ តែបានបាត់​ខ្លួន​ពីកញ្ចាក់ប្រព័ន្ធចាប់រលកអាកាស ហើយត្រូវបានអ្នកស៊ើបអង្កេតរកឃើញថា យន្ដហោះត្រូវបានប្ដូរទិស ជាមួយ​នឹង​បំណងដ៏ច្បាស់លាស់មួយ ចេញពីផ្លូវដើមរបស់វា។

កាលពីព្រឹកថ្ងៃពុធដដែល រដ្ឋមន្ត្រីក្រសួងយុត្តិធម៌អាមេរិក លោក អេរិក ហូដ័រ បានថ្លែងឡើងថា «សហរដ្ឋអាមេរិក បានផ្ដល់នូវគ្រប់មធ្យោបាយ ដែលខ្លួនមាន ទៅអាជ្ញាធរម៉ាឡេស៊ី ប៉ុន្តែនៅពេលនេះ ខ្ញុំមិនទាន់ជឿជាក់ថា យើងអាច​លើកបង្ហាញ ពីសេចក្ដីសន្និដ្ឋានអ្វីមួយបានទេ»។

លោកបានបញ្ជាក់ទៅកាន់អ្នកសារព័ត៌មាន ថាមានពិតមែន ពីទំនាក់ទំនងរវាងអេហ្វប៊ីអាយ និងអ្នកស៊ើបអង្កេត​ម៉ាឡេស៊ី។ លោកបានពន្យល់ទៀតថា «យើងកំពុងតែចង់រកឲ្យឃើញ ថាតើមានរឿងហេតុអ្វី។ យើងបានជជែកគ្នា នៅលើអ្វីមួយដែលយើងអាចជួយបាន ហើយយើងក៏បានផ្ដល់នូវលទ្ធភាព និងអ្នកជំនាញរបស់យើង។»

រីឯអ្នកនាំពាក្យសេតវិមាន លោក ជេ កាណី (Jay Carney) ឯណោះវិញ បានលើកឡើង ពី«ទំនាក់ទំនង​ល្អនៃកិច្ច​សហប្រតិបត្តិការ ជាមួយអាជ្ញាធរម៉ាឡេស៊ី ដែលបាននឹងកំពុងបាញ់ឆ្ពោះទិសដៅរបស់ខ្លួន ក្នុងការស៊ើបអង្កេត និង​ការរុករកយន្ដហោះបាត់ខ្លួន»។

លោក កាណី បានបន្ថែមឲ្យដឹងទៀតថា មន្ទីរប៉ង់តាហ្គោន ការិយាល័យសុវត្តិភាពអាកាសចរណ៍ (FAA) និង​សុវត្តិភាព​ដឹកជញ្ជូន ព្រមទាំងអេហ្វប៊ីអាយផង បានផ្ដល់ជំនួយការរបស់ខ្លួន ទៅតាមលទ្ធភាព និងទៅ​តាមការស្នើ​សុំរបស់អាជ្ញាធរម៉ាឡេស៊ី៕

------------------------------------
ដោយ សេក មនោរកុមារ (ទំនាក់ទំនង៖ [email protected]) - ប៉ារីស​ ថ្ងៃទី១៩ មីនា ២០១៤