ករណីចុះចាប់ខ្លួនមេខ្លាឃ្លោក បានធ្វើឡើងនៅថ្ងៃទី២៤ ខែកញ្ញា ឆ្នាំ២០១៥ វេលាម៉ោង១២ និង៣០នាទី​ថ្ងៃ​ត្រង់ ស្ថិតនៅក្នុងអាគារបុរីកីឡា ជាន់ទី៤ ក្នុងសង្កាត់វាលវង់ ខណ្ឌ៧មករា រាជធានីភ្នំពេញ។ កិច្ច​អន្តាគមន៍​របស់​មន្ត្រី​អាជ្ញាធរ បានឃាត់ខ្លួនជនសង្ស័យ ជាមេចាក់ខ្លាឃ្លោក និងវត្ថុតាងនៅនឹងកន្លែង។

បើតាមសំដីរបស់លោក នេត ស៊ីថុន អធិការនរគបាល ខណ្ឌ៧មករា បានប្រាប់ឲ្យដឹងថា ក្រោយពេល បាន​ទទួល​ពាក្យបណ្តឹង ពីប្រជាពលរដ្ឋ លោកបានចាត់កម្លាំង នរគបាលព្រហ្មទណ្ឌ ចុះធ្វើការបង្រ្កាប់និង ឈាន​ដល់ការចាប់ខ្លួន ស្រ្តីជាមេខ្លាឃ្លោក ព្រមទាំងវត្ថុតាង ខណះពេលដែលកំពង់អង្គុយលេង ជាក់ស្តែងតែម្តង។ លោកបានបន្តទៀតថា ជាមួយគ្នានេះ កងកម្លាំងនគរបាល ថែមទាំងបានរឹបអូស ក្រដាសខ្លាឃ្លោក និង​ប្រាក់​ដុល្លារចំនួន ១០១០ដុល្លា ប្រាក់រៀលចំនួន ៤០ ម៉ឺនរៀលនោះទៀត។

ស្រ្តីដែលត្រូវបានឃាត់ខ្លួននោះ មានឈ្មោះ ចាន់ ណា មានអាយុ ៥៤ ឆ្នាំ ស្នាក់នៅក្នុងបុរីកីឡាទី៤​ជាន់ទី៤ ហើយត្រូវបានគេស្គាល់ថា ជាអ្នកក្រឡុកខ្លាឃ្លោក យ៉ាងល្បីល្បាញ នៅតំបន់នោះ។

បច្ចុប្បន្ននេះ ស្ត្រីដែលជាជនសង្ស័យ និងវត្ថុតាង ត្រូវបានបញ្ជូនទៅកាន់អធិការដ្ឋាន នរគបាលខណ្ឌ៧មករា ដើម្បីចាត់ការ តាមនិតិវីធីច្បាប់៕