ដោយសាររវល់ តែការពារទឹកដី នៅតាមព្រំដែនកម្ពុជា លុះត្រឡប់មកស្រុកកំណើតវិញ ស្រាប់ដីធ្លី និង​ផ្ទះ​សម្បែង ត្រូវបានក្រុមហ៊ុន អឹម.ឌី.អេស (MDS) របស់លោក ទ្រី ភាព រំលោភយក។ នេះជាការលើកឡើង របស់​លោក ទឹម ធឿន ដែលអះអាងថា ខ្លួនលោកជានាយទាហាន កងការពារព្រំដែនគោក លេខ១៤៥ ឈរ​ជើងនៅតបន់ឃុំថ្មដា ស្រុកវាលវែង ខេត្តពោធិសាត់។

លោក ទឹម ធឿន ដែលជាអ្នកស្រុកវាលវែង ខេត្តពោធិសាត់ បានរៀបរាប់ថា លោកជាទាហានម្នាក់ ក្នុង​ចំណោម​ទាហានជាច្រើនទៀត ចូលបំរើ និង​ការពារ​ជាតិ ទឹកដីតាំងពីឆ្នាំ១៩៩៧។ តែផ្ទុយពីកម្លាំងកាយ​ចិត្ត ដែល​បានបូជាជូនមាតុភូមិ លោករួមទាំង​ប្រជាពលរដ្ឋជាច្រើនទៀត បែរជាបានរងគ្រោះ នឹងការរំលោភ​បំពាន​ដីធ្លី ផ្ទះ​សម្បែង ពីសំណាក់ក្រុមហ៊ុន របស់ឧកញ៉ាដ៏ល្បីឈ្មោះ លោក ទ្រី ភាព។

លោកថា ក្នុងឆ្នាំ២០១០ ក្រុមហ៊ុននេះបានចូលខ្លួន មកអះអាងថា ធ្វើការអភិវឌ្ឍន៍ តំបន់មូលដ្ឋានស្រុក​វាល​វែង ដែលជាស្រុកកំណើរ ឬទីលំនៅរបស់ខ្លួននេះ។ បើតាមតំណាងក្រុមហ៊ុន ដែលស្រង់សម្ដីដោយ​លោក ទឹម ធឿន នោះ បានឲ្យដឹងថា ប្រជាពលរដ្ឋទាំងអស់ រួមទាំងគ្រួសាររបស់លោក ទឹម ធឿន ផង បាន​​រស់​នៅ​លើដីខ្លួនឯង ដោយ«ខុសច្បាប់»។ ហើយ ក្រុមហ៊ុននេះ មិនអនុញ្ញាតឲ្យពួកលោក ចូលដាំដុះបន្លែបង្ការ ក្នុង​ដីធ្លីដែលពួកលោក ធ្លាប់កាន់កាប់នោះឡើយ។

ដីធ្លីដែលលោក ទឹម ធឿន អះអាងថាបានកាន់កាប់ តាំងពីយូរមកហើយនោះ មានប្រវែងទទឹង ប្រមាណ​១០០ម៉ែត្រ និងបណ្ដោយ៣០០ម៉ែត្រ ស្ថិតនៅភូមិសង្គមថ្មី ស្រុកវាលវែង ខេត្តពោធិសាត់។ លោកធ្លាប់​ត្រូវ​បានសាលាដំបូង ខេត្តពោធិ៍សាត់ កោះហៅទៅសាកសួរ ពាក់ព័ន្ធនឹងរឿងដីនេះដែរ បន្ទាប់ពីប្រពន្ធ​របស់​លោក មានការឈ្លោះប្រកែក ដោយពាក្យសំដីជាមួយនឹងមន្ត្រីបរិស្ថាន និងតំណាងក្រុមហ៊ុន ព្រោះតែចង់​ការពារដីលំនៅដ្ឋានរបស់ខ្លួន។

លោកបញ្ជាក់ថា ដីផ្ទះរបស់លោក និងដីរបស់អ្នកភូមិជាង ២០គ្រួសារផ្សេងទៀត ដែលកំពុងរស់នៅ​សព្វថ្ងៃ​នោះ គឺជាតំបន់វាលស្រឡះ ហើយពួកគាត់បានមកកាន់កាប់ និងដាំដំណាំតាំងពីឆ្នាំ២០០៦ មក ទើបតែនៅ​ក្នុងឆ្នាំ២០១០ ខណៈដែលក្រុមហ៊ុនចូលមក ទើបមន្ត្រីបរិស្ថានប្រាប់ថា ពួកគាត់កាន់កាប់ដី នៅលើតំបន់​ដី​ព្រៃអភិរក្ស។

ទាហានអាយុ៣៨ឆ្នាំរូបនេះ បានលើកឡើងថា ព្រោះតែមានបញ្ហាវិវាទ ជាមួយក្រុមហ៊ុននោះ ប្រជាពលរដ្ឋ​ដែលរងផលប៉ះពាល់ទាំងអស់ មិនត្រូវបានក្រុមនិស្សិតស្ម័គ្រចិត្ត ធ្វើការវាស់វែងដីធ្លី ឲ្យនោះទេ ដោយពួក​គេ​អះអាងថា ត្រូវរង់ចាំវិធានការ និងការដោះស្រាយ ពីទីស្តីការគណរដ្ឋមន្រ្តី ពីក្រសួងដែនដី​នគរោបនីយ​កម្ម។ល។ តែរហូតមកដល់ពេលនេះ នៅតែគ្មានដំណោះស្រាយ ហើយដីធ្លី ផ្ទះសម្បែងពលរដ្ឋ ក៏នៅបន្តមាន​ជំលោះ ដោយគ្មានការវាស់វែង ឬការដោះស្រាយអ្វីសោះ។

«ខ្ញុំការពារដី ប្រពន្ធ និងកូនខ្ញុំមិនបាន...»

តែនៅថ្ងៃទី២២ ខែវិច្ឆិកា ឆ្នាំ២០១៤ ស្រាប់តែខាងក្រុមហ៊ុន បានប្រើប្រាស់នូវគ្រឿងចក្រ មកឈូសឆាយដី និងផ្ទះប្រចាឡរដ្ឋ គ្មានសេសសល់អ្វីឡើយ។

ស្រដីក្នុងសភាពឈឺចាប់ រកអ្វីថ្លែងពុំបាន លោក ទឹម ធឿន បានឲ្យដឹងទៀតថា៖ «ខំការពារទឹកដី ខំការពារ​ព្រំដែន។ ជាក់ស្តែងប្រពន្ធកូនខ្ញុំ ជាប្រជាពលរដ្ឋ ឯខ្ញុំជាទាហាន... អ្វីដែលខ្ញុំឈឺចិត្តនោះ គឺខ្ញុំការពារទឹកដី​បាន តែខ្ញុំអន់ចិត្តណាស់ ដែលខ្ញុំការពារដី ប្រពន្ធ និងកូនខ្ញុំមិនបាន។ ខ្ញុំអន់ចិត្តជាខ្លាំង។»

ទស្សនាវដ្តីមនោរម្យ.អាំងហ្វូ មិនអាចសុំការបញ្ជាក់ ពីលោក ព្រុំ ង៉ុន មេឃុំថ្មដា ជុំវិញការចោទប្រកាន់​ខាង​លើ នាព្រឹកថ្ងៃទី១៩ ខែកញ្ញា ឆ្នាំ២០១៥នេះ បានឡើយ។ តែអភិបាលខេត្តពោធិ៍សាត់ លោក ខូយ សុខា ធ្លាប់​បាន​អះអាង ក្នុងរយៈកាលកន្លងមកថា គណៈកម្មការចម្រុះខេត្ត សហការជាមួយនឹងស្រុកវាលវែង បានចុះ​ពិនិត្យ​ដល់មូលដ្ឋានផ្ទាល់ បន្ទាប់ពីក្រុមនិសិ្សតវាស់វែងដីធ្លី របស់លោកនាយករដ្ឋមន្ត្រី ហ៊ុន សែន បាន​បញ្ចប់​សកម្មភាព​របស់ខ្លួន ក្នុងការវាស់វែងដីធ្លី នៅតំបន់នោះរួច៕