ហេតុការណ៍ភ្ញាក់ផ្អើលនេះ បានកើតឡើង នៅវេលាម៉ោង៨ និង៣០នាទីយប់ ថ្ងៃទី០៧ ខែកញ្ញាឆ្នាំ២០១៥ នៅ​តាមបណ្តោយផ្លូវជាតិលេខ២ ក្នុងភូមិរការ២ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។ ក្លិប​ដែល​រងការខូចខាត មានឈ្មោះ«ឃីក្លិប» ជាកន្លែងសម្រាប់រាំច្រៀង ពេលរាត្រី របស់អ្នកត្រូវការសេវា​សប្បាយ។ ប្រភពព័ត៌មាន បានប្រាប់ឱ្យដឹងថា អ្នកស្លាប់និងរបួស០៧នាក់នោះ ស្រី៥នាក់(ស្លាប់) និងប្រុស​ពីរនាក់ របួស​ធ្ងន់ ត្រូវបានបញ្ជូនទៅសង្គ្រោះ នៅមន្ទីពេទ្យកាល់ម៉ែត។

រីឯការខូចខាត ក្នុងឃីក្លឹបអស់ប្រមាណ៨០ភាគរយ។ នេះបើតាមការបញ្ជាក់ របស់អ្នកគ្រប់គ្រង​ផ្នែកពន្លត់​អគ្គីភ័យ។ ក្នុងនោះ គេនៅមិនទាន់ដឹង ពីមូលហេតុនៃការឆាបឆេះ ពិតប្រាកដនៅឡើយ។ ដោយឡែក សម្រាប់​រថយន្តពន្លត់អគ្គីភ័យវិញ ត្រូវបានប្រើប្រាស់ យកមកពន្លត់​អស់ចំនួន២៤គ្រឿង ទើបភ្លើងរលត់ បាន១០០​ភាគរយ។ យ៉ាងណាក៏ដោយ ប្រធានផ្នែកពន្លត់អគ្គីភ័យ បានឱ្យទស្សនាវដ្តីមនោរម្យ.អាំងហ្វូដឹងថា ទីតាំងក្លិប​ខាងលើ មានផ្លូវចូលតែមួយប៉ុណ្ណោះ ដែលបង្កលក្ខណៈ ឲ្យក្រុមការងារអ្នកពន្លត់អគ្គិភ័យ ចូលទៅទាំង​ប្រថុយ​គ្រោះថ្នាក់ ដោយហេតុថាដាច់ភ្លើងអស់ ងងិតសូន្យឈឹង។ ម្យ៉ាងវិញទៀត ការបាញ់ទឹក ក៏មិន​អាចចូល​ទៅ​ក្នុង​បានភ្លាមៗដែរ ព្រោះទីនោះគ្មានខ្យល់ចេញចូល អ្នកចូលទៅសង្គ្រោះ ស្ទើរដកដង្ហើមមិនបានដែរ។ លោកថា រហូតដល់ម៉ោងប្រមាណជាង២១ យប់ថ្ងៃដដែល ទើបពន្លត់បានជោគជ័យ។

តាមសំដី របស់កម្មករកម្មការនីរោងចក្រ នៅកន្លែងកើតហេតុ បានប្រាប់ឱ្យដឹងថា «ឃីក្លិប»នេះ ច្រើនតែបង​ប្អូន​កម្មករកម្មការនីរោងចក្រ ចូលកំសាន្តរាំលេង ប៉ុន្តែសំណាងល្អ ដែលម៉ោង៨នេះ នៅមិនទាន់មានអ្នកចូល​ច្រើន ប្រសិនចាប់ពីម៉ោង១០យប់ ទៅម៉ោង១១យប់ នោះទើបមានភ្ញៀវចូលរាំលេងកំសាន្តច្រើន។ អ្នកទាំងនោះ បាន​សម្ដែងក្ដីបារម្ភថា បើឆេះនៅម៉ោង១០ ទៅ១១យប់វិញ មិនដឹងជាចំនួនជនរងគ្រោះ នឹងត្រូវឡើងដល់ ចំនួន​ប៉ុន្មាន​នាក់នោះទេ៕