អង្គការសហប្រជាជាតិ បានប្រកាសកាលពីថ្ងៃពុធទី០២ ខែមករានេះថា ចំនួនមនុស្សច្រើនជាង ៦០ពាន់នាក់ បានស្លាប់​នៅក្នុងជម្លោះផ្ទៃក្នុងនៃប្រទេសស៊ីរី តាំងពី២១ខែកន្លងមកហើយ។ មនុស្សទាំងនោះ បានបាត់បង់ជីវិត​ ដោយសារការវាយ​សម្រុកយ៉ាងរន្ថើន ពីសំណាក់ក្រុមអ្នកប្រមាញ់នៃរបបសព្វថ្ងៃ រួមមានទាំងការបាញ់ផ្លោង ការទម្លាក់គ្រាប់បែក និងរងគ្រោះ​ដោយសារការប្រយុទ្ធគ្នា យ៉ាងស៊ីសាច់ហុតឈាម។

ឈាមហូរក្លាយជាស្ទឹង ក្នុងសង្គ្រាមស៊ីវិលស៊ីរី ដែលគេមិនដឹងថា នឹងចប់នៅពេលណា។ រូបថត printemps-syrien.com។

ស្នងការជាន់ខ្ពស់ របស់អង្គការសហប្រជាជាតិ ទទួលបន្ទុកសិទ្ធិមនុស្ស បានអះអាងនៅទីក្រុងហ្សែណែវ ពីស្ថិតិនៃចំនួន​មនុស្សប្រមាណជា ៥៩ ៦៤៨នាក់ ត្រូវបានសម្លាប់ នៅក្នុងប្រទេសនេះ រវាងពីមហាបាតុកម្មជាលើកដំបូង ថ្ងៃទី១៥ ខែមិនា ឆ្នាំ២០១១ រហូតមកទល់នឹងចុងខែវិច្ឆិការ ឆ្នាំ២០១២កន្លងមកនេះ។

លោកស្រី ណាវី ពីឡៃ (Navi Pillay) បានថ្លែង នៅក្នុងសេចក្ដីប្រកាសមួយថា «ដោយសារជាជម្លោះ​ដែលកើតបន្ត​ គ្មាន​លោះតាំងពីចុងខែវិច្ឆិការមកនោះ យើងអាចនិយាយបានថា ចំនួនមនុស្សច្រើនជាង ៦០ពាន់នាក់ ត្រូវបានសម្លាប់ បើគិត​រហូតមកទល់នឹងដើមឆ្នាំ២០១៣នេះ»។ លោកស្រីគិតថា តួលេខនេះ អាចមានចំនួនច្រើនជាង ដែលមិនអាចស្មានដល់ និងយ៉ាងរន្ធត់ជាទីបំផុត។

លោកស្រីបានបរិហាថា «គេបានដឹងពីការប្រព្រឹត្តិ មួយហើយមួយទៀត នៃឧក្រិដ្ឋកម្មដ៏រង្គាល ពីសំណាក់ភាគីទាំងសង​ខាង ដោយរាប់ទាំងឧក្រិដ្ឋកម្មសង្គ្រាម និងវាច្បាស់ណាស់ ឧក្រិដ្ឋកម្មប្រឆាំងនឹងមនុស្សជាតិផង»។

ប្រទេសស៊ីរី បានធ្លាក់ខ្លួន ចូលក្នុងសង្គ្រាមស៊ីវិល នៅក្រោយការងើបបះបោររបស់ប្រជាជន តែត្រូវរងការបង្ក្រាបយ៉ាង​ហឹង្សា ពីសំណាក់របបសព្វថ្ងៃ ដោយមានការប្រឈមមុខរវាងកងទ័ពទាំងសងខាង និងងើបឡើងប្រយុទ្ធតបវិញ របស់​ក្រុមទាហ៊ានរត់ចោលជួរ ក្រោយការជួយឧបត្ថម្ភពីប្រជាជនស៊ីវិល។

តុល្យភាពចុងក្រោយ របស់អង្គការសហប្រជាជាតិ មានចំនួនខ្ពស់ជាង ក្រុមអ្នកឃ្លាំមើលសិទ្ធិមនុស្សស៊ីរី (OSDH) ដែល​ជាអង្គការមួយមានបណ្ដាញយ៉ាងធំ និងមានក្រុមគ្រូពេទ្យនៅជុំវិញប្រទេស។ អង្គការសិទ្ធិមនុស្សនេះ បានបញ្ចេញតួលេខ​របស់ខ្លួនថា មានមនុស្សតែជាង ៤៦ពាន់នាក់ប៉ុណ្ណោះ ដែលបានស្លាប់ក្នុងរយះពេល២១ខែមកនេះ ប៉ុន្តែថាមិនបាន​រាប់​ជនរាប់ពាន់នាក់ផ្សេងទៀត​ ដែលបានបាត់ខ្លួន និងនៅជាប់ឃុំ  ឬការស្លាប់នៃសមាជិកក្រុមអត្ថឃាត «chabbihas» របស់​ប្រធានាធិបតីលោក បាឆារ អាល់-អាសាធ (Bachar al-Assad) ឬកងទ័ពមកពីបរទេសផងនោះទេ។

មិនត្រឹមតែប៉ុណ្ណោះ «ទាំងខាងអ្នកបះបោរ និងទាំងខាងកងទ័ព មិនដែលបានបញ្ចេញតួលេខពិត នៃការស្លាប់នៅក្នុងជួរ​របស់ពួកគេទេ ដើម្បីកុំឲ្យមានការធ្លាក់ទឹកចិត្ត ក្នុងកងពល»។ នេះជាការបញ្ជាក់របស់ លោក រ៉ាមី អាបដែល រ៉ាម៉ាន (Rami Abdel Rahmane) នាយកអង្គការឃ្លាំមើលសិទ្ធិមនុស្សនៅស៊ីរីនេះ ហើយលោកបានគិតថា បើនិយាយពីការបូកសរុប​តួលេខទាំងអស់ចូលគ្នា មនុស្សស្លាប់អាចមានច្រើនជាង «១០០ពាន់នាក់»៕

--------------------------------------------------
ដោយ៖ សេក មនោរកុមារ - ប៉ារីស ថ្ងៃទី ០៤ ខែមករា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ