មេដឹកនាំគណបក្សសង្គ្រោះជាតិ លោក សម រង្ស៊ី បានសម្ដែងសុទិដ្ឋិនិយមថា ស្ថានភាពតានតឹង ផ្នែក​នយោបាយលើក«ទីបី»នេះ អាចនឹងមានច្រកសម្រាប់ទម្លាយ បន្ទាប់ពីស្ថានការតានតឹង នៃនយោបាយ ក្នុង​ឆ្នាំ២០១៤ ទាំង«ពីរ» ត្រូវបានទម្លាយដោយស្របច្បាប់ និងដោយជោគជ័យ ក្រោមកិច្ចអន្តរាគមន៍ របស់លោក​នាយករដ្ឋមន្រ្តី ហ៊ុន សែន។ ការថ្លែងរបស់លោក សម រង្ស៊ី បានធ្វើឡើង ទៅកាន់អ្នកសារព័ត៌មាន បន្ទាប់​ពី​លោកបានជួប និងសួរសុខទុកសកម្មជន ទាំង១១រូប នៅមុខមន្ទីរអប់រំកែប្រែទី១ ព្រៃស ដោយលោក បាន​អះ​អាងទៀតថា លោកនឹងព្យាយាមចរចា ជាមួយលោក ហ៊ុន សែន នាយរដ្ឋមន្ត្រីកម្ពុជា ក្នុងពេលឆាប់ៗខាងមុខ ទៅតាមស្ថានភាព និងស្ថានការជាក់ស្តែង។។

លោកបន្តថា ទាំងរូបលោកផ្ទាល់ ទាំងលោកនាយករដ្ឋមន្រ្តី ហ៊ុន សែន មានគោលដៅ និងគំនិតតែមួយដូចគ្នា ក្នុងការបង្រួបបង្រួមជាតិ និងប្រមូលអ្នកមានចំណេះដឹង ដើម្បីការពារបូរណភាពទឹកដី តែមួយដូចគ្នា។

ប៉ុន្តែលោក សម រង្ស៊ី ហាក់បានទម្លាក់ការទទួលខុសត្រូវ ទៅកាន់មន្រ្តីជាន់ខ្ពស់ នៃគណបក្សប្រជាជន​កម្ពុជា​ទៅវិញ។ លោក បានថ្លែងឡើងថា៖ «បើមានស្មារតីបង្រួបបង្រួមជាតិ យើងច្បាស់ជាចេះអនុគ្រោះ ឲ្យគ្នា​ទៅ​វិញទៅមក។ (...) យើងរួមគ្នា ដើម្បីការពារផលប្រយោជន៍ ប្រទេសជាតិ ពិសេសបូរណៈភាពទឹកដី នៃប្រទេស​កម្ពុជា របស់យើងទាំងងស់គ្នា។ មិនអាចគណបក្សណាតែមួយ ធ្វើអ្វីបានសម្រេចទេ។ មានគណបក្សពីរធំ​ជាង​គេ នៅប្រទេសកម្ពុជា ហើយគណបក្សនីមួយៗ តំណាងឲ្យ (ប្រជាពលរដ្ឋ) ពាក់កណ្តាលនគរ។ មិនអាច​គ្រាន់​តែ​តំណាង ពាក់កណ្តាលនគរ អាចធ្វើអ្វីបានតាមចិត្តនោះទេ។ ទាល់តែតំណាងពាក់កណ្តាលពីរដង តំណាង​ប្រទេសជាតិ របស់យើងទាំងអស់គ្នា រួមគ្នាបាន យើងអាចធ្វើការអ្វីមានប្រសិទ្ធិភាព។»

លោកថា ធ្វើជាមនុស្ស តែងតែមានកំហុសឆ្គង មិនដែលមានមនុស្សណា ដែលគ្មានកំហុសសឆ្គងនោះ​ឡើយ។ សំខាន់មនុស្សធ្វើខុស ចេះទទួលកំហុស និងការអត់អោនឲ្យគ្នា ទៅវិញទៅមក ធ្វើការរួមគ្នា រួមកម្លាំងគ្នា ដើម្បី​ការពារផលប្រយោជន៍ប្រទេសជាតិ តែមួយដូចគ្នា ប្រកបដោយភាពជោគជ័យ។ ការដោះស្រាយបញ្ហានេះ អាច​នឹងធ្វើការដោះស្រាយបាន ដោយរលូន តាមរូបមន្តថ្មី និងស្របតាមនីតិវិធីច្បាប់ទៀត។

លោកបានរំលឹកថា ភាពតានតឹងនយោបាយ កាលពីលើកទី១ គឺការប៉ះទង្គិចគ្នានៅស្ពានកាគ កាលពីថ្ងៃទី១៥ ខែកក្កដា ឆ្នាំ២០១៤ ដែលនាំឲ្យមានការចាប់ខ្លួនតំណាងរាស្រ្តចំនួន៧នាក់។ និងលើកទីពីរកាលពីខែវិច្ចិកា ឆ្នាំ​២០១៤ដដែល ក៏មានការចាប់ឃុំឃាំងសកម្មជន ក៏ដូចជាមន្រ្តីគណបក្សសង្គ្រោះជាតិ អស់រយៈពេល​ជាង​ប្រាំ​ខែ ហើយត្រូវបានដោះលែង ឲ្យមានសេរីភាព មុនចូលឆ្នាំខ្មែរ ឆ្នាំ២០១៥។

«អញ្ចឹងពីរដងហើយ បានរកដំណោះស្រាយ។ ឥឡូវគឺលើកទីបី ទើបតែចាប់ផ្តើមមួយខែចុងក្រោយ ហើយ (លោក) ហុង សុខហួរ ទើបតែចាប់ផ្តើមប៉ុន្មានថ្ងៃមុននេះ។ អញ្ចឹងលើកទីបី នៅខែសីហា ឆ្នាំ២០១៥នេះ ខ្ញុំ​ជឿ​ជាក់ថា នឹងមានដំណោះស្រាយដូចគ្នាអញ្ចឹង។ ពីព្រោះបញ្ហាហ្នឹង វាបញ្ហាប្រហាក់ប្រហែលគ្នា ដំណោះ​ស្រាយ គឺច្បាស់ជាមានដំណោះស្រាយ ប្រហាក់ប្រហែលនឹងគ្នាអញ្ចឹងដែរ។ ខ្ញុំមានសុទិដ្ឋិនិយម ខ្ញុំមានសេចក្តី​សង្ឃឹម ខ្ញុំមានជំនឿថា បើយើងប្រកាន់សារតីហ្នឹង រក្សាស្មារតីហ្នឹង ដូចលើកទី១ ដូចលើកទី២ យើងនឹងរកដំណោះ​ស្រាយ​បាន ចំពោះលើកទី៣ នេះ។»

លោក សម រង្ស៊ី បានថ្លែងទៀតថា៖ «បើយើងដឹងថា គេរសើប យើងកុំចាក់ក្រឡេចគេទៅ! យើងរក​មធ្យោបាយ​និយាយគ្នាទៅ ដឹងថាគេរសើប គឺយើងត្រូវចេះប្រុងប្រយ័ត្នថ្នាក់ថ្នមគេ»។ (...) សំខាន់ គឺលទ្ធផល ហើយ​លទ្ធផល គឺសម្រាប់ជាតិ មិនមែនសម្រាប់គណបក្សប្រជាជនកម្ពុជា មិនមែនសម្រាប់គណបក្ស​សង្គ្រោះជាតិ​នោះ​ទេ។»

លោក សម រង្ស៊ី សារភាព... បើតាមមន្ត្រីរដ្ឋាភិបាល

ប៉ុន្តែការលើកឡើង របស់លោក សម រង្ស៊ី មិនទំនងជាទទួលបានការស្វាគមន៍ ពីរដ្ឋាភិបាលលោក ហ៊ុន សែន នោះទេ។ លោក ផៃ ស៊ីផាន អ្នកនាំពាក្យទីស្តីការគណរដ្ឋមន្រ្តីបានសរសេរ ទៅបណ្ដាញសង្គមថា៖ «ការឈប់​ចាក់ក្រឡេក រាជរដ្ឋាភិបាល ឬ CPP ដែលជាពាក្យរបស់ ឯ.ឧ សម សង្ស៊ី ផ្តល់ដល់អ្នកសារព័ត៌មាន គឺជាការ​សារភាព របស់ថ្នាក់ដឹកនាំរូបនេះ ក្នុងយុទ្ធនាការនិយាយល្អផង និងសកម្មភាពផ្ទុយ គឺញុះញ៉ង់ បំផុសបំផុល ប្រឌិត និងវាយប្រហារ បង្កើតឲ្យមានកំហឹង ឬចលនាប្រឆាំងនិងស្ថាប័ន ឬនីតិរដ្ឋ។ នីតិរដ្ឋដាច់ខាត មិន​អនុញ្ញាត​ឲ្យយករឿងប្រទេសជាតិ មកជាការចំអកឡកឡើយនោះទេ។»

អ្ន​កនាំពាក្យទីស្ដីការគណៈរដ្ឋមន្ត្រី បានបន្តទៀតថា៖ «តើមានជនប៉ុន្មាននាក់ ដែលរងគ្រោះ ពីនយោបាយ​ដ៏​ស្មោគគ្រោកនេះ ទាំងនៅក្នុងគុក ទាំងរត់ចោលស្រុក? រាជរដ្ឋាភិបាល និង CPP មិនគ្រាន់តែជាមូលដ្ឋាន នៃការ​រស់រានមានជីវិត របស់ប្រជាពលរដ្ឋ និងប្រជាជាតិតែប៉ុណ្ណោះទេ ក៏ប៉ុន្តែសណ្តាប់ធ្នាប់នយោបាយ សន្តិភាព និង​ការអភិឌ្ឍន៍ ស្ថិតនៅក្នុងចីរភាព គឺជាកាតព្វកិច្ចរបស់យើង។»៕