នៅវេលាម៉ោង៩ និង៤៥នាទីយប់ ថ្ងៃទី១៣ខែ សីហា ឆ្នាំ២០១៥ មានករណីគ្រោះថ្នាក់ចរាចរណ៍មួយ បង្ក​ដោយ​រថយន្តម៉ាក Ford ពាក់ស្លាកលេខ ភ្នំពេញ ២W-២១០០ ពណ៍ខ្មៅ បើកបរក្នុងទិសដៅ ពីកើតទៅលិច​តាម​បណ្តោយ​ផ្លូវ សហពន្ធ័រុស្ស៊ី ស្ថិតនៅសង្កាត់ស្រះចក ខណ្ឌដូនពេញ រាធានីភ្នំពេញ។ ហេតុការណ៍នេះ បង្កឡើង​ដោយបុរសអ្នកបើកបរ ជាជនជាតិចិនម្នាក់ មិនស្គាល់អត្តសញ្ញណ បានបើកបររថយន្តរបស់ខ្លួន បានបុករនាំង​ដែកចែកផ្លូវ បាក់អស់ចំនួន០៨ផ្ទាំង ទល់មុខក្រសួងការពារជាតិ។

តាមប្រសាសន៍របស់សាក្សី ដែលបានឃើញហេតុការណ៍នេះ លោក ចាន់ រស្មី អាយុ៣៥ឆ្នាំ រស់នៅសង្កាត់​ទឹកថ្លា បានប្រាប់មកទស្សនាវដ្ដីមនោរម្យ.អាំងហ្វូឲ្យដឹងថា រូបលោកបានធ្វើដំណើរ ពីក្រោយរថយន្តនេះ ហើយ​គាត់ឃើញរថយន្តខាងលើ បើកបរមានលក្ខណៈរេរា ទំនងជាស្រវឹង។ មុនដំបូងរថយន្តបង្ករេចង្កូត ចង់បុក​ម៉ូតូ​លោកម្តងហើយ ស្រាប់តែបន្តិចក្រោយមក ខណៈគាត់ជិះម៉ូតូមកដល់ ទល់មុខក្រសួងការពារជាតិ ក៏ស្រាប់តែ​ឃើញរថយន្តដដែល បុករនាំងដែកចែកទ្រូងផ្លូវ ខ្ទេច០៨ផ្ទាំង។

ក្រោយពីបង្កបញ្ហាទាំងយប់ហើយ ម្ចាស់ឡានមិនបានចុះ មកដោះស្រាយនោះទេ។ បុរសជនជាតិចិនខាងលើ ព្យាយាមបើករថយន្តគេចខ្លួន ប៉ុន្តែកំលាំងសមត្តកិច្ច ជិះម៉ូតូដើរល្បាត ឃើញហេតុការណ៍ដូច្នេះ ក៍ចាប់ផ្តើម​ធ្វើការ​ឃាត់ខ្លូន ម្ចាស់រថយន្តបង្កនោះ ភ្លាមៗតែម្តង។ បច្ចុប្បន្នរថយន្ត និងអ្នកបើកបរ ត្រូវបានញ្ចួន​ចររាចរណ៍​រាជធានីភ្នំពេញ ដើម្បីរងចាំដោះស្រាយតាមច្បាប់៕