លោក ហេង សំរិន ប្រធានរដ្ឋសភា បានថ្លែងអំពាវនាវ ឲ្យគ្រប់សាសនាទាំងអស់ នៅប្រទេសកម្ពុជា ត្រូវរួម​សាមគ្គីគ្នា ដើម្បីភាពសុខដុមរមនា នៃជាតិកម្ពុជាទាំងមូល។ សេចក្ដីអំពាវនាវរបស់លោក បានធ្វើឡើង​នា​វិមាន​រដ្ឋសភា កាលពីថ្ងៃទី៣០ ខែកក្កដា នេះ ក្នុងសិក្ខាសាលាមួយ ក្រោមប្រធានបទ «សុខដុមរមណីកម្ម ក្នុង​វិស័យ​សាសនានៅកម្ពុជា»។

ថ្លែងនៅចំពោះសមាជិក នៃគណកម្មការទី៧ នៃរដ្ឋសភា រដ្ឋមន្ត្រីក្រសួងធម្មការ និងកិច្ចការសាសនា តំណាង​ព្រះសង្ឃនៃព្រះពុទ្ធសាសនា តំណាងសាសនាឥស្លាម និងសាសនាគ្រិស្ទ៍ ប្រមាណជាង២០០នាក់ លោក ហេង សំរិន បានថ្លែងឡើងថា ការលើកឡើងនេះ ក៏ដើម្បីឆ្លើយតបទៅនឹងការកំហែងនៃភាពជ្រុលនិយម ផ្នែក​សាសនា បង្កឲ្យមានសង្គ្រាម នៃក្រុម«រដ្ឋអ៊ីស្លាម (ISIS)» នៅមជ្ឈិមបូព៌ា និងនៅទ្វីអាហ្វ្រិកខាងជើង។

ប្រធានរដ្ឋសភារូបនេះបានបន្តថា ជាតិកម្ពុជា មិនមានការរើសអើង ផ្នែកសាសនាណាមួយឡើយ តែផ្ទុយ​ទៅ​វិញ សាសនា បានក្លាយជាចំណុច ដែលកម្ពុជាបានយកចិត្តទុកដាក់ រហូតដាក់បញ្ចូល ក្នុងបាវចនារបស់ជាតិ «ជាតិ សាសនា និងព្រះមហាក្សត្រ» នោះថែមទៀត។ លោក សំរិន បានថ្លែងឲ្យដឹងថា សិទ្ធិទទួលបាន​ការ​គោរព និងប្រតិបត្តិសាសនានានា របស់ប្រជាពលរដ្ឋកម្ពុជា ត្រូវបានចែងក្នុងមាត្រា៤៣​នៃរដ្ឋធម្មនុញ្ញស្រាប់។

ដើម្បី«លើកកម្ពស់» ភាពសុខដុមរមនានៃសាសនា ប្រធានរដ្ឋសភាកម្ពុជា បានណែនាំ ទៅកាន់​សាសនិក​ជន​ថា៖ «មួយ- ត្រូវគោរព និងសាមគ្គីគ្នាជិតស្និទ្ធិ និងស្មោះត្រង់ ដោយឈរលើ គោលការណ៍​អធ្យាស្រ័យ និង​យោគយល់គ្នា ក្នុងគ្រប់កាលៈទេសៈ ដើម្បីភាពសុខដុមរមនានៃសង្គមជាតិ។ ពីរ- គោរពប្រតិបត្តិធម៌វិន័យ​របស់ខ្លួន ដោយផ្សារភ្ជាប់ ការគោរពសិទ្ធិអ្នកកាន់សាសនដទៃ និងប្រកាន់ខ្ជាប់ នូវមាគ៌ាអហិង្សា មេត្តា ករុណា និងសណ្តោសប្រណី។ បី-គោរពសិទ្ធិសេរីភាពជំនឿសាសនា ផ្សារភ្ជាប់នូវការគោរពច្បាប់ និងលិខិតបទដ្ឋាន គតិយុត្តនានា ដើម្បីធានា បានសុខសន្តិភាព ស្ថិរភាព និងវិបុលភាពរបស់សង្គមជាតិ។»

ដោយឡែក លោក យ៉ែម បុញ្ញឫទ្ធិ ប្រធានគណៈកម្មការទី៧ នៃរដ្ឋសភា (គណៈកម្មការអប់រំយុវជននិងកីឡា ធម្មការ កិច្ចការ សាសនា វប្បធម៌ និងទេសចរណ៍) និងជាតំណាងរាស្ត្រ មកពីគណបក្សសង្គ្រោះជាតិ បាន​ថ្លែង​ឡើងថា ការធ្វើទេសចរណ៍មកកម្ពុជា នៃសាសនាដទៃ ហាក់ដូចជា បានកើតឡើង យ៉ាងអនាធិបតេយ្យ ដែល​បានបង្កឲ្យមានភាពពិបាក ក្នុងការគ្រប់គ្រង ជាមួយនឹងការរក្សាបាន នូវសណ្តាប់ធ្លាប់ល្អ លើផ្នែកសាសនា​នេះ។ លោក បុញ្ញឬទ្ធិ មិនបានថ្លែងបញ្ជាក់ថា តើទេសចរណ៍សាសនានេះ ជាសាសនាណាទេ។

នៅកម្ពុជា មានសាសនាធំចំនួនបី ដែលបានទាក់ទាញឲ្យពលរដ្ឋកម្ពុជា មានការជឿជាក់ និងប្រតិបត្តិតាម។ សាសនាទាំងបីនោះ រួមមាន សាសនាព្រះពុទ្ធិ, សាសនាគ្រឹស្ទ៍ និងសាសនាឥស្លាម។ នាពេលកន្លងមក មាន​ជនជាតិវៀតណាម ច្រើនសិបនាក់ បានចូលមកតាំងទី នៅកម្ពុជា និងថែមទាំងធ្វើការសាងសង់ ទីកន្លែង​គោរព​បូជាសាសនា របស់ពួកគេ ដោយគ្មានច្បាប់ទម្លាប់នោះទៀត៕