ដំណឹងនៃការការស្លាប់ របស់ស្ត្រីម្នាក់នេះ បានបង្កការតក់ស្លុត ដល់ពិភពលោក រហូតដល់ប្រព័ន្ធផ្សព្វផ្សាយ​នានា នៅអ៊ឺរ៉ុប និងនៅអាមេរិក ក៏បានយកមករាយការណ៍ ជាបន្តបន្ទាប់គ្នា។ រូបភាពវីដេអូសុវត្ថិភាព (នៅខាង​ក្រោម​អត្ថបទនេះ តែហាមអ្នកមានបញ្ហា ផ្នែកអារម្មណ៍ និងបេះដូងទស្សនា) មានលក្ខណៈពិបាកទ្រាំណាស់ នៅ​ពេល​ដែលគេឃើញ ម្ដាយវ័យក្មេងរូបនេះ បានប្រមូលកម្លាំងរបស់ខ្លួនចុងក្រោយ ដើម្បីលើកកូនប្រុស ឲ្យ​ផុត​ពី​គ្រោះ​ថ្នាក់ ខណៈខ្លួនកំពុងជាប់ នៅក្នុងជណ្ដើរយន្ដនេះទៅហើយ។

នាង ឆាង លីវជ័ន (Xiang Liujuan,) អាយុ៣០ឆ្នាំ ត្រូវបានចាត់ទុក ជាវីរនារីដោយសារនាង បានសង្គ្រោះកូន​របស់នាង ពីគ្រោះថ្នាក់ដល់ជីវិត ដោយសារសន្ទះជណ្ដើរយន្ដ ដែលមិនបានចាប់ខ្ចៅ ឲ្យជាប់ល្អ។ បណ្ដាជនចិន ជាច្រើនលាននាក់ បានចូលរួមមរណៈទុក្ខ តាមបណ្ដាញសង្គម ជាមួយគ្រួសាររបស់នាង និងបានចោទសួរ​ឡើង​ថា ហេតុអ្វីក៏បុគ្គលិកស្ត្រីបីនាក់ របស់មជ្ឈមណ្ឌលពាណិជ្ជកម្ម មិនបានធ្វើអ្វីមួយ ដើម្បីបញ្ឈប់ជណ្ដើរយន្ដនេះ?

ដូចនៅក្នុងវីដេអូសុវត្ថិភាព បានបង្ហាញ និងត្រូវបានសារព័ត៌មានចិនជាច្រើន យកមកអះអាងនោះ គឺបុគ្គលិក​ទាំងបីនាក់ របស់មជ្ឈមណ្ឌល បានដឹងតាំងពីប្រាំនាទីមុនហើយ ថាសន្ទះបិទជណ្ដើរយន្ដ បានជួបនឹងបញ្ហា ប៉ុន្តែ​គ្មាននរណាម្នាក់ ចាប់អារម្មណ៍ ពីគ្រោះថ្នាក់ ដែលអាចកើតឡើង ហើយចាត់វិធានការ ឲ្យជណ្ដើរនោះ​ផ្អាក​ដំណើរ​ការ សិននោះទេ។

ក្រុមអ្នកជួយសង្គ្រោះ បានមកដល់ក្រោយ មរណៈភាពរបស់នាង ឆាង លីវជ័ន និងបានប្រើពេលដល់ទៅ ៤​ម៉ោង ដើម្បីគាស់ជណ្ដើរនោះ យកសាកសពរបស់នាង ចេញមកបាន។

អាជ្ញាធរខេត្ត ហ៊ុយបី (Hubei) របស់ប្រទេសចិន បានប្រកាសឲ្យផ្អាក រាល់ការប្រើប្រាស់ជណ្ដើរយន្ដ ក្នុង​ប្រភេទ​ខាងលើ ដែលផលិតដោយក្រុមហ៊ុន «Suzhou Shenlong Elevator Co Ltd» រហូតដល់ពេល មានធានា​អះអាង​ថា សុវត្ថិភាពរបស់វា ត្រូវបានត្រួតពិនិត្យច្បាស់លាស់។

ហេតុការណ៍ដ៏អាណោចអាធម ប្រហាក់ប្រហែលគ្នានេះ បានកើតឡើងម្ដងហើយ កាលពីឆ្នាំ២០១១។ កុមារា​អាយុ៤ឆ្នាំម្នាក់ បានស្លាប់ បន្ទាប់ពីបានជាប់គាំងខ្លួន នៅក្នុងជណ្ដើរយន្ដ ផលិតដោយក្រុមហ៊ុនដដែលនេះ ក្នុង​ផ្សារទំនើបមួយ នៃខេត្ត ហ៊ួរណាន (Hunan)៕