ស្ថាបនិកគេហទំព័រវីគីលីគ្ស បានថ្លែងកាលពីយប់ ថ្ងៃព្រហស្បត្តិ៍សប្ដាហ៍មុន នៅខាងមុខរានហាល​ នៃស្ថានទូតរបស់​ប្រទេសអេក្វាទ័រ ប្រចាំរាជាណាចក្រអង់គ្លេស ពីគម្រោងការរបស់លោក ដែលនឹងចេញផ្សាយ សំនុំឯកសាររាប់សិប​លានសន្លឹកទៀត ក្នុងឆ្នាំ២០១៣ខាងមុខ។ លោក ជូលៀន អាសហ្ស ដែលលាក់ខ្លួនក្នុង ស្ថានទូតរបស់ប្រទេសអេក្វាទ័រ ជាលក្ខណៈជនភៀសខ្លួននយោបាយ តាំងពីរ៦ខែមកហើយ។

លោកជូលៀន អាសហ្ស នៅពេលធ្វើសេចក្ដីថ្លែងការណ៍ នៅយប់ថ្ងៃព្រហស្បត្តិ៍ទី១៨ធ្នូ។ រូបថត AP។

លោកជូលៀន អាសហ្ស (Julian Assange) បាននិយាយសន្យាថា «ឆ្នាំក្រោយ នឹងមានកិច្ចការជាច្រើនរងចាំ មិនខុស​ប៉ុន្មានពីឆ្នាំ២០១២នេះទេ» ដោយលោកប្រកាសថា គេហទំព័រវីគីលីគ្ស (WikiLeaks) របស់លោក នឹងផ្សព្វផ្សាយ នាពេល​ខាងមុខ នូវសំនុំឯកសារ មិនតិចជាងមួយលានទំព័រ។ ជាមួយនឹងការធានាអះអាងថា លោកផ្ទាល់មានសន្តិសុខធម្មតា បើទោះមិនសូវមានសេរីភាពក៏ដោយ លោក អាសហ្ស បានឆ្លៀតឱកាសនេះ ជាដំបូងឧទ្ទិសទៅដល់ «អ្នកកាសែត​ជុំវិញ​ពិភពលោក ប្រមាណជា ២៣២នាក់ ដែលជាប់ក្នុងពន្ធនាគារ ក្នុងយប់នេះ» នៅចំពោះមុខហ្វូងមនុស្សជាងមួយរយនាក់ រួមមានទាំងអ្នកកាសែតយ៉ាងច្រើននាក់នោះផង។

សំនុំឯកសារ នៃពិភពលោកទាំងមូល

លោកជូលៀន អាសហ្ស បានបង្ហាញខ្លួន នៅខាងមុខអាគារស្ថានទូតអេក្វាទ័រ នៅលើរានហាល  ទីកន្លែងដែលបាន​ការពាររូបលោក តាំងពីខែមិថុនាឆ្នាំ ២០១២ ពីការចាប់ខ្លួនរបស់អាជ្ញាធរអង់គ្លេស បញ្ជូនចេញទៅអោយ​ប្រទេស​ស៊ុយអែដ។ ក្រោមការឃ្លាំមើលពីនគរបាល ក្រុមអ្នកគាំទ្រលោកអសហ្ស បាននាំគ្នីគ្នាមកកាន់ទីនោះ ដោយមាន​លើក​ជាបដាដាក់ថា «កុំសម្លាប់អ្នកនាំសារ» ឬ«សូមអ្នកកុំទុកចិត្ត ស៊ុយអែដអោយសោះ» នោះជាដើម។

ទាក់ទងនឹងសំនុំឯកសារ លោកអាសហ្ស បានបញ្ជាក់ថា «វីគីលីគ្ស កំពុងតែរៀបចំផ្សាយ ជាង១លានឯកសារ ដែល​នឹងប៉ះពាល់គ្រប់ប្រទេសទាំងអស់ ក្នុងពិភពលោក»។ លោកអាសហ្ស ថែមទាំងបានចោទប្រកាន់ ទីក្រុងវ៉ាស៊ីនតោន ថាបានលូកដៃចូលក្នុងសេដ្ឋកិច្ច​របស់ប្រទេសអេក្វាទ័រ និងការបោះឆ្នោតប្រធានាធិបតី នៅក្នុងប្រទេសនេះ ក្នុងខែកុម្ភះ ឆ្នាំ២០១៣ខាងមុខ។  «ប្រជាធិបតេយ្យពិតប្រាកដ មិននៅសេតវិមានអាមេរិកនោះទេ តែគឺជាការតស៊ូរបស់បណ្ដាជន ដែលបំពាក់ទៅដោយការពិត ប្រឆាំងនឹងភាពភូតកុហក ទាំងនេះ (...)» លោកលើកឡើងយ៉ាងដូច្នេះ មុននឹងបញ្ចប់​សុន្ទរកថា​របស់លោក ដោយនៅស្ងៀម និងបានលើកកណ្ដាប់ដៃឡើងលើ បញ្ជាក់ពី«សេរីភាពនៃការនិយាយស្ដី»។

«ទ្វានៅតែបើកចំហរ...»

ទាក់ទងនឹង បញ្ហាចាប់បញ្ជូនខ្លួនរបស់លោក ទៅអោយប្រព័ន្ធយុត្តិធម៌នៃប្រទេសស៊ុយអែដ កាត់ទោសពីបទរំលោភ​សេពសន្ធវះនោះ លោកនិយាយថា លោកនឹងនៅក្នុងស្ថានទូតអេក្វាទ័រនេះ ដរាបណានៅតែមាន ការគម្រាមចាប់ខ្លួន​លោកបញ្ជូនចេញ របស់អាជ្ញាធរអង់គ្លេស។ លោកបានប្រកាសថា «៦ខែកន្លងទៅហើយ ត្រូវជា១៨៦ថ្ងៃ ដែលខ្ញុំបាន​ចូលមកក្នុងអាគារនេះ។ ឥឡូវវាបានក្លាយជាផ្ទះរបស់ខ្ញុំ ការិយាល័យដែលខ្ញុំធ្វើការ និងជម្រកសម្រាប់ការពារខ្ញុំផង។»

លោកអាសហ្ស បារម្ភថា លោកនឹងត្រូវចាប់បញ្ជូនខ្លួនបន្តដោយសហរដ្ឋអាមេរិក និងចាប់អោយទទួលទោសជាទម្ងន់ (ប្រហាជីវិត ពីបទធ្វើចារកម្មប្រឆាំងអាមេរិក) នៅទីនោះ នៅក្រោយបន្ទាប់ពីចាប់បញ្ជូនខ្លួនលោក មកដល់ប្រទេស​ស៊ុយអែដ។ លោកបន្តថា «ដោយសារគោលជំហររបស់រដ្ឋាភិបាល និងប្រជាជនអេក្វាទ័រ ខ្ញុំរស់នៅដោយមានសុវត្ថិភាព នៅក្នុងអាគារស្ថានទូតនេះ និងមានសិទ្ធិសេរីភាពបរិបូណ៍ ក្នុងការនិយាយស្ដី»។

ទំនងជាចង់ដោះស្រាយស្ថានភាពរបស់ខ្លួនលោកផង លោកបានអះអាងយ៉ាងដូច្នេះថា «ទ្វានៅតែបើកចំហរ ហើយ​វាធ្លាប់បានបើកចំហររហូតមក សម្រាប់អ្នកណាក៏ដោយ ដែលចង់និយាយមករកខ្ញុំ»។ ចំណែកឯស្ថានទូតអេក្វាទ័រ នៅទីក្រុងឡុងដ៍នេះដដែល ក៏បានបញ្ជាក់អះអាងឡើងវិញជាថ្មីទៀត ពីជំហររបស់ខ្លួន ក្នុងការគាំទ្រលោក ជូលៀន អាសហ្ស៕

------------------------------------------------
ដោយ៖ សេក មនោរកុមារ - ប៉ារីស ថ្ងៃទី២១ ខែធ្នូ ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ