បន្ទាប់ពីការសម្រេចរបស់តុលាការ ក្នុងការតំកល់ពាក្យបណ្ដឹងលោក មិនចាត់ការនោះមក លោកសួង សុភ័ណ្ឌ ប្រធាន​ចលនាយុវជនគណបក្សសមរង្សី បានថ្លែងប្រាប់មនោរម្យព័ងអាំងហ្វូថា លោកបានប្ដូរចិត្ត «មិនប្តឹងបន្ត»ទៅ​ឧទ្ធរណ៍​ទេ។ លោកថា លោកអស់សង្ឈឹម នឹងប្រពន្ធ័តុលាការនៅកម្ពុជា ដោយលោកបានដឹងជាមុនថា ទោះជាយ៉ាងណាក៏ដោយ ក៏​លោកនឹងនៅតែមិនមានជ័យជំនះដែរ។ តែផ្ទុយទៅវិញ លោកជឿជាក់លើ«តុលាការប្រជាពលរដ្ឋ»។

លោកសួង សុភ័ណ្ឌ ប្រធានចលនាយុវជន គណបក្សសមរង្សី កាលពីខែមិនាឆ្នាំ២០១២កន្លងទៅ។
រូបថត samrainsypartyyouth.blogspot.com។

តុលាការក្រុងភ្នំពេញ បានចេញដីកាបង្គាប់លោកសួង សុភ័ណ្ឌ ឲ្យចូលខ្លួនដើម្បីបង្ហាញភស្តុតាង លើពាក្យបណ្តឹងនៅ​ថ្ងៃ​សុក្រទី០៧ធ្នូម្ដង និងបន្ថែមភស្តុតាងម្ដងទៀត នៅថ្ងៃសុក្រទី១៤ធ្នូកន្លងមកនេះ។ តែនៅ​ថ្ងៃ​ទី​១៩ ខែ​ធ្នូ ឆ្នាំ​២០១២ លិខិត​មួយច្បាប់ ចុះហត្ថលេខាដោយ ព្រះរាជអាជ្ញារង អម​សាលាដំបូង​រាជធានី​ភ្នំពេញ លោក មាស ច័ន្ទ​ពិសិដ្ឋ បានប្រគល់ទៅ​ដល់ដៃដើមបណ្ដឹង លោក សួង សុភ័ណ្ឌ ដោយបញ្ជាក់ពី ការសម្រេច«តម្កល់​សំណុំរឿង» មិន​ចាត់កា​រលើ​ពាក្យបណ្តឹង​ប្រឆាំង នាយករដ្ឋមន្ត្រីលោក ហ៊ុន សែន​។ ប្រធានចលនាយុវជន គណបក្សសមរង្សីរូបនេះ  បានចាត់ទុកការតម្កល់ទុក ឥតចាត់ការរបស់តុលាការ ជា«រឿងនយោបាយ» ហើយលោកមិនមានសង្ឃឹមថា នឹងឈ្នះក្ដីទេ បើទោះលោកបន្តប្ដឹង​ឧទ្ធរណ៍សារទុក្ខ ដល់ណាក៏ដោយ។

អ្នកវិភាគជាច្រើន បានលើកឡើងពី បណ្ដឹងប្ដឹងចោទលោកនាយករដ្ឋមន្ត្រី របស់លោក សួង សុភ័ណ្ឌនេះ ថាមានចរិក​នយោបាយច្រើនជាង ចង់រកយុត្តិធម៌ជូនជនរងគ្រោះ។ ប្រធានសភាសម្ពន្ធ័សហជីបជាតិកម្ពុជា (NACC)  លោក សោម អូន បានវាយតម្លៃពីពាក្យបណ្ដឹងនេះ ថាមានលក្ខណៈបុគ្គល គ្មានពាក់ពន្ធ័ជាមួយគណបក្ស ឬជាមួយក្រុមគ្រួសារជន​រងគ្រោះ ដែលធ្វើអោយដើមបណ្ដឹងគ្មាននិតិភាពគ្រប់គ្រាន់ ជាតំណាងអោយជនរងគ្រោះ តែផ្ទុយមកវិញ វាជាពាក្យ​បណ្ដឹង​ដើម្បី«ភាពល្បីល្បាញ»មួយ។

គួររំលឹកថា កាលពីថ្ងៃទី ៣០ ខែវិច្ឆិកា ឆ្នំា ២០១២ លោក សួង សុភ័ណ្ឌ បានដាក់ពាក្យ បណ្តឹង ទៅសាលាដំបូង​រាជធានី​ភ្នំពេញ ប្តឹងចោទលោក ហ៊ុន សែន នាយករដ្ឋមន្ត្រីកម្ពុជា ពីបទមនុស្សឃាត «គិតទុកជាមុន» ក្នុងពិធីបុណ្យអ៊ុំទូក យប់​ថ្ងៃទី២២ ខែ វិច្ឆិកា ឆ្នំា ២០១០ ដែលបណ្តាលឲ្យពលរដ្ឋខែ្មរស្លាប់៣៥៣នាក់ និងរបួសជាង៤០០នាក់ នៅលើស្ពាន​កោះ​ពេជ្រ លើទន្លេបាសាក់ ក្រុងភ្នំពេញ ។

ប្រធានក្រុមអ្នកស្រាវជ្រាវឯករាជ្យជាន់ខ្ពល់ (ART) លោក កែម ឡី បានយល់ថា បណ្ដឹងប្ដឹងពីឃាតកម្មគិតទុជាមុន វា​ជារឿងមួយហូសហេតុបន្តិច ហើយការផ្អឹបសំណុំរឿងនេះមិនចាត់ការ វាជាការសមស្របមួយ។ លោកថា ដើម​បណ្ដឹង​គួរធ្វើជាញ្ញតិ ឬសេចក្តីថ្លែងការណ៍ ឲ្យរដ្ឋាភិបាលស្រាវជ្រាវបន្ថែម ឬតវ៉ាកុំឲ្យវាយស្ពានបំបាត់ភស្តុតាង វាប្រសើរជាង​ការប្តឹងផ្ដល់បែបនេះ។ លោកបន្តអោយយោបល់យ៉ាងដូច្នេះថា «ក្នុងនាមជាគណបក្សប្រឆាំង ជាសក្មជនណាមួយ គួរ​ស្វែងរកមូលនិធិ ដើម្បីធ្វើការសិក្សាស្រាវជ្រាវបន្ថែម ឲ្យមានលក្ខណៈសកល ហើយដាក់របកគំហើញថ្មី ទៅរដ្ឋាភិបាល​ប្រសើរជាង»។

ទាក់ទងនិតិវិធីរបស់តុលាការ លោកសួង សុភ័ណ្ឌ  បានបន្តការកើតទុក្ខមិនសុខចិត្តទៀតថា អ្នកកាន់សំនុំរឿងដំបូង ជាព្រះរាជអាជ្ញារងលោក សុខ រឿង តែដល់ពេលមកសាកសួរ បែរទៅព្រះរាជអាជ្ញារងលោក មាស ចន្ទ័ពិសិទ្ធិទៅវិញ ហើយតុលាការមិនបានធ្វើការស៊ើបអង្កេតអ្វីទេ គឺរងចាំតែតម្កល់រឿងទុក ឥតចាត់ការប៉ុណ្ណោះ ។

លោក កែម ឡី ដែលទំនងជាយល់ស្រប បានពន្យល់ថា ទោះរឿងពិត ឬមិនពិតយ៉ាងណាក៏ដោយ តុលាការត្រូវធ្វើការ​សិក្សាស្រាវជ្រាវបន្ថែម ឲ្យបានគ្រប់ជ្រុងជ្រោយ ដើម្បឲ្យដើមបណ្តឹងអស់ចិត្ត ទាំងក្នុងប្រព័ន្ធតុលាការ ទាំងក្រៅ​ប្រព័ន្ធ​តុលាការ ធ្វើយ៉ាងណា​ឲ្យមានតម្លាភាព។ «ការធ្វើឲ្យមានតម្លាភាព ត្រូវមានការសាកសួរ ឆ្លើយ ទាំងដើមចោទ ចុង​ចោទ សាក្សី ត្រូវមាន​មេធាវីទាំងសងខាង (...)។» លោកថា ចំណាត់ការតែម្ខាង មិនត្រឹមតែផ្តល់ផលវិបាក ទៅអ្នកដើម​បណ្ដឹងប៉ុណ្ណោះទេ តែវាផ្តល់ផលវិបាកទៅដល់សង្គមទាំងមូល ធ្វើឲ្យមានមន្ទិល និងបាត់បង់ជំនឿ ពីសាធារណៈជន  ហើយក៏ជា​មេរៀនមិនល្អសំរាប់សិស្ស និស្សិត និងកូនចៅជំនាន់ក្រោយដែរ ។

រីឯលោក ហ៊ុន សែន នាយករដ្ឋមន្ត្រីកម្ពុជាវិញ បានប្រកាសកាលពីថ្ងៃទី២ធ្នូ នៅខេត្តព្រះសីហនុ ថាលោកនឹង«ប្តឹងបក» ក្នុងនាមជាពលរដ្ឋម្នាក់ បើតុលាការរកមិនឃើញកំហុស ដូចការចោទប្រកាន់ ដើម្បីជាការរក្សាកិត្តិយស សេចក្តីថ្លៃថ្នូរ របស់លោក និងរដ្ឋាភិបាល។ យល់ច្បាស់ពីបញ្ហាបណ្ដឹងបកជាយថាហេតុ របស់លោកនាយករដ្ឋមន្ត្រីនេះ លោកសួង សុភ័ណ្ឌ បានបន្ថែមថា «បើរមើលរូបភាពខាងក្រៅ មិនមែនជាការគំរាមកំហែង។ តែបើមើលរូមភាពខាងក្នុង គឺជាការ​គំរាមកំហែងជាក់ច្បាស់ណាស់ ថាឲ្យតុលាការតម្កល់រឿងទុកឥតចាត់ការ (...)»។

សកម្មជនរូបនេះ របស់គណបក្សប្រឆាំង​ធំ​ជាង​គេនៅកម្ពុជា បានបង្ហាញនូវភាពអង់អាចរបស់លោក ថាមិនខ្លាច​ចំពោះ​ការប្រឈមមុខតទល់ នឹងលោក​នាយក​រដ្ឋមន្ត្រី​ហ៊ុនសែន តាមផ្លូវតុលាការទេ។ តែលោកជឿថា ប្រមុខរដ្ឋាភិបាលនឹង​គិត​ត្រិះរិះពិចារណា ក្នុងនាមជាថ្នាក់​ដឹកនាំ​ប្រទេស​ម្នាក់។ ហើយ «បើលោក (ហ៊ុន សែន) ចង់ប្តឹងមកលើជន​សាមញ្ញ​ម្នាក់ ត្រូវយកគំរូតាមប្រធានាធិបតី​ប្រទេស​អ៊ីស្រាអ៊ែល ដែលបានចុះពីតំណែង (ជាមុនសិន) ដើម្បីប្តឹងលើនារីយោធា ជាជន​សាមញ្ញម្នាក់»។ លោកបន្តថា «ធ្វើដូច្នេះ​ដើម្បីឲ្យមានសិទ្ធិស្មើគ្នា ទើបដឹងថាតុលាការឯករាជ្យ» ។

ទាក់ទងឯករាជ្យភាព របស់តុលាការកម្ពុជា ដែលកំពុងរងនូវការរិះគន់ យ៉ាងចាស់ដៃ ថាតែងតែនៅក្រោមឥទ្ធិពល​នយោបាយនោះ លោកកែម ឡី ខ្លួនលោកផ្ទាល់ ក៏ពុំសូវមានជំនឿពេញលេញ ទៅលើប្រព័ន្ធយុត្តិធម៌កម្ពុជានេះដែរ។ លោកអះអាងថា ទាំងចៅក្រម ទាំងព្រះរាជអាជ្ញា សុទ្ធតែមានជំនាញត្រឹមត្រូវ និងបទពិសោធន៍ច្រើន តែលោកមិនយល់ និងបានចោទ​ជាសំនួរមកវិញថា តើចៅក្រម និងព្រះរាជអាជ្ញាទាំងនោះ ជាសមាជិករបស់គណបក្ស ឬយ៉ាងណា? លោក​ថែមទាំងបាន​សួរបន្ថែមទៀតថា «តើសមាជិកឧត្តមក្រុមប្រឹក្សានៃអង្គចៅក្រម ជាអ្នកណា? ជាសមាជិកចេញពីបក្សណា ហើយជារួម ក្រោមការបញ្ជាពីក្រុមណា ?»

ខុសពីចម្ងល់ខាងលើ លោក សោម អូន បកស្រាយយ៉ាងដូច្នេះថា តុលាការជាស្ថាប័នឯករាជ្យ និងបានដោះស្រាយ​សំណុំ​រឿង ដោយឈរលើ«គោលការណ៍ច្បាប់»។ «ការងារដែលពាក់ពន្ធ័ជាមួយតុលាការ ទុកឲ្យតុលាការជាអ្នក​សម្រេច​ទៅ។ អ្នកចាញ់ក្តី តែងតែលើកឡើងពីភាពអយុត្តិធម៌ នេះជារឿងធម្មតា (...)៕»

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី២០ ខែធ្នូ ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ