ការឆាបឆេះ ជាព្រះអគ្គិឡើងនេះ ត្រូវបានក្រុមពន្លត់អគ្គិភ័យ រាជធានីភ្នំពេញ ចេញមកជួយពន្លត់ទាន់ពេល ប៉ុន្តែអ្នកនៅក្នុងហេតុការណ៍ នៅមិនទាន់បញ្ជាក់បានថា គ្រោះអគ្គិភ័យនេះ ខូចខាតសរុបអស់ប៉ុន្មាននោះទេ។ ប៉ុន្តែសាក្សី ដែលបានឃើញមុនគេ បាននិយាយថា អគ្គិភ័យបានកើតឡើង នៅវេលាម៉ោង ៤ ល្ងាចថ្ងៃទី ១២ ខែកក្កដា ឆ្នាំ ២០១៥ នៅខាងក្រោយក្រុមហ៊ុន ថៃ ប៊ុនរ៉ុង ស្ថិតក្នុងទីតាំង ផ្ទះលេខ ៦C1 ផ្លូវ ២០៩ សង្កាត់​ទំនប់​ទឹក ខណ្ឌចំការមន រាជធានីភ្នំពេញ។

សាក្សីនៅកន្លែងកើតហេតុ បានប្រាប់ឲ្យដឹងថា គេហដ្ឋាននោះ ជារបស់លោក សោម សុផាត អភិបាល​រង​ខេត្ត​កំពង់ធំ ដែលសព្វថ្ងៃកូនរបស់លោក ជាអ្នកស្នាក់នៅ សម្រាប់បន្តការសិក្សានៅភ្នំពេញ។

បើតាមប្រសាន៍ របស់លោក ហ៊ាន ណារ៉ា មេភូមិ០៤ សង្កាត់ទំនប់ទឹក ខណ្ឌចំការមន បានបញ្ជាក់ឲ្យដឹងថា លោក​មិនទាន់ទទួលបានទិន្នន័យ នៃការខូចខាតច្បាស់លាស់នោះទេ។ ប៉ុន្តែអ្នកនៅក្នុងហេតុការណ៍ បាន​ថ្លែង​ឲ្យដឹងថា អគ្គិភ័យ បានឆេះបំផ្លាញ នូវសម្ភារៈមួយចំនួន។

ក្នុងហេតុការណ៍នេះដែរ លោក ព្រំ យ៉ុន អ្នកទទួលខុសត្រូវម្នាក់ របស់អង្គភាពពន្លត់អគ្គីភ័យ រាជធានីភ្នំពេញ បានប្រាប់ទស្សនាវដ្តីមនោរម្យ.អាំងហ្វូឲ្យដឹងថា ក្រុមការងាររបស់លោក បានធ្វើការសង្គ្រោះបានជោគជ័យ ដោយប្រើឡានទឹកអស់ចំនួន០៥គ្រឿង។ លោកបញ្ជាក់ទៀតថា អគ្គិភ័យបានឆេះ នៅជាន់ទី២ ដែលជា​ហេតុ ធ្វើឲ្យមានការលំបាកមួយចំនួន នៅក្នុងការសង្គ្រោះ៕