នាព្រឹកថ្ងៃទី៨ ខែកក្កដា ឆ្នាំ២០១៥នេះ រដ្ឋសភាកម្ពុជា បានបើកសិក្ខាសាលា ពិគ្រោះយោបល់ ស្តីពីសេចក្តី​ព្រាងច្បាប់ ស្តីពីសមាគម និងអង្គការ មិនមែនរដ្ឋាភិបាល ក្រោមអធិបតីភាពលោក ហេង សំរិន ប្រធាន​រដ្ឋសភា។ ប៉ុន្តែសិក្ខាសាលានេះ មិនសម្រាប់បុគ្គលិកអង្គការសង្គមស៊ីវិល និងអ្នកកាសែតមួយចំនួន ដែល​មិន​បាន​ចុះ​ឈ្មោះ​ទាន់ពេល ឬមិនមានកាតពិសេសនោះឡើយ។ ផ្ទុយទៅវិញ តំណាងរាស្ត្រមួយចំនួន មកពី​គណបក្ស​សង្គ្រោះ​ជាតិ ក៏កំពុងដើរចេញ ពីអង្គសិក្ខាសាលានោះ ជាបណ្តើរៗដែរ។

លោក ព្រាប កុល នាយកប្រតិបត្តិ អង្គការតម្លាភាពកម្ពុជា ដែលសន្តិសុខរដ្ឋសភា មិនអនុញ្ញាតឲ្យចូល និងឲ្យ​ឈរ នៅក្រៅរបងសភានោះ បានថ្លែងប្រាប់ អ្នកសារព័ត៌មានថា លោកមានការសោកស្តាយណាស់  ដែល​រដ្ឋសភាបានរៀបចំ សិក្ខាសាលាថ្នាក់ជាតិនេះ តែបែរជាមានលក្ខណៈ រិតត្បិត ចង្អៀត ហើយមិនអនុញ្ញាត ឲ្យអង្កការសង្គមស៊ីវិល មួយចំនួនធំចូលរួម។ លោកបានបន្តថា មិនមែនលោក មិនបានចុះឈ្មោះចូលរួមទេ លោកបានព្យាយាម ទៅចុះឈ្មោះ មុនពេលកំណត់ទៅទៀត តែដូចជាចង់បង្ហាញថា ឱកាសសម្រាប់​អង្កការ​លោក ត្រូវបានគេបិទ ដោយអះអាងត្រឹមពាក្យថា «កន្លែងពេញ»អស់ហើយ។ លោក ព្រាប កុល បានថ្លែង​ឡើង​ថា៖ «ខ្ញុំមានការសោកស្តាយ ដែលអង្គការតម្លាភាព មិនទទួលបានការអញ្ជើញ (ពីរដ្ឋសភា)។ ខ្ញុំមានឱកាស បានត្រឹមតែ មកឈរនៅខាងក្រៅរបងរដ្ឋសភា។»

រីឯអវត្តមាន នៃអ្នកសារព័ត៌មានមួយចំនួន ដែលមិនបានចូលវិញ ត្រូវបានលោក ព្រាប កុល ពន្យល់ថា៖ «ខ្ញុំក៏​សោកស្តាយ ចំពោះអ្នកសារព័ត៌មាន ព្រោះពួកគាត់ជាអ្នក ដែលពាំនាំដំណឹង ជាកញ្ចក់សម្រាប់សង្គម​ទាំង​មូល។ យ៉ាងណា ត្រូវសម្រួលដល់ពួកគាត់ គាត់មានកាតអ្នកសារព័ត៌មាន គាត់ត្រូវតែមានឱកាសចូលទៅ ដើម្បីផ្សព្វផ្សាយព័ត៌មាន ដល់ប្រជាពលរដ្ឋដឹងលឺ បានទូលំទូលាយ។»

ចំពោះកញ្ញា ជា ម៉ាលីនី អ្នកអង្កេតការណ៍សភា មកពីអង្គការខុមហ្វ្រែល ដែលត្រូវបានមន្ត្រីយាមរដ្ឋសភា ឃាត់​មិនឲ្យចូលក្នុងសភានោះ បានសម្ដែងការហួសចិត្តដូចគ្នា ដោយហេតុថា កញ្ញាជាអ្នកយកព័ត៌មាន ប្រចាំនៅ​រដ្ឋសភានេះ ដោយមានលិខិតសហប្រតិបត្តិការ រវាងស្ថាប័នកញ្ញា ជាមួយនិងសភា ព្រមទាំងមានកាត សម្រាប់​ចូលសភាគ្រប់ពេលទៀត។ ផ្ទុយទៅវិញ កាតនោះបែជាគ្មានសុពលភាព និងមិនអាចចូលរដ្ឋសភា ក្នុងពេល​ដែល​រដ្ឋសភា មានការរៀបចំសិក្ខាសាលាថ្ងៃនេះ។

កញ្ញា ម៉ាលីនី បានថ្លែងឡើងថា៖ «គេថាកាតហ្នឹង (ចេញដោយរដ្ឋសភាខ្លួនឯង) មិនអនុញ្ញាតឲ្យចូលបានទេ ព្រោះ​ថ្ងៃនេះជាថ្ងៃសំខាន់។ ដូចជារិតត្បិតសិទ្ធិសេរីភាព ខ្ញុំមានការអន់ចិត្តដែរ...។ (...) មានការរិតត្បិត​សេរីភាព ខាង​ព័ត៌មាន ពិសេសសម្រាប់អ្នកការសែត។ ជាទូទៅ នៅពេលមានព័ត៌មានចឹង យើង (រដ្ឋសភា) ត្រូវ​អនុញ្ញាត ឲ្យអ្នកកាសែតចូលរួម ព្រោះគាត់មិនមានធ្វើអ្វីខុសទេ។»

សន្តិសុខម្នាក់ ក្នុងចំណោម១០នាក់ នៃជ្រុងមួយរបស់រដ្ឋសភា បានថ្លែងប្រាប់អ្នកសារព័ត៌មាន ថា៖ «បើមិន​មាន​កាតហ្នឹង (ពិសេស) មិនអនុញ្ញាតឲ្យចូលទេ។ បើទោះជាអ្នកសារព័ត៌មាន ប្រចាំរដ្ឋសភា ឬស្គាល់គ្នាក៏ដោយ។ (...) នេះជាបទបញ្ជារបស់ថ្នាក់លើ។»

ទស្សនាវដ្តីមនោរម្យ.អាំងហ្វូមិនអាចសុំ ការបញ្ជាក់ពីលោក ប៉ែន បូណា ប្រធានក្លិបអ្នកកាសែតកម្ពុជាបានទេ នាព្រឹកនេះ ដោយគ្មានអ្នកទទួលទូរស័ព្ទ។ នៅសប្ដាហ៍មុន ក្នុងរវាងតែ២ថ្ងៃប៉ុណ្ណោះ ក្រុមអ្នកសារព័ត៌មាន ត្រូវ​បានស្ថាប័នរដ្ឋចំនួនពីរ (រដ្ឋសភា និងទីស្ដីការគណៈរដ្ឋមន្ត្រី) បណ្ដេញចេញ ខណៈពួកគេកំពុងមានវត្តមាន និង​ធ្វើការងារ នៅក្នុងស្ថាប័នទាំងនោះ រួចស្រេចហើយ។ ចំពោះការបណ្ដេញអ្នកសារព័ត៌មាន ចេញពីរដ្ឋសភា ដោយ​លោក ឈាង វុន កាលពីថ្ងៃទី១ ខែកក្កដានោះ ត្រូវបានក្លិបអ្នកកាសែត បរិហារថា ជា​ការរំលោភបំពាន​សិទ្ធិ​ធ្ងន់ធ្ងរ ដោយ​​​អំពាវនាវ​ឲ្យ​ស្ថាប័ន​រដ្ឋ និង​តំណាងរាស្រ្ត​ក្នុង​រដ្ឋសភា គោរពសិទ្ធិសេរីភាព​របស់​អ្នក​​​សារព័​ត៌​មាន៕