នៅនឹងឆ្នេរ ជាពិសេសនៅក្នុងរដូវកាល នៃវិស្សមកាលបែបនេះ គេត្រូវមានភ្នែករវាសបន្តិច ជាពិសេស​ចំពោះ​ឪពុកម្ដាយ ដែលមានកូនតូច ទៅជាមួយច្រើន។ ធ្វើយ៉ាងណា ត្រូវបញ្ជៀសនូវករណីនេះ ដែលអាចធ្វើ​ឲ្យ​ឪពុកម្ដាយ សោកស្ដាយអស់មួយជីវិតបាន។ ទារកអាយុ១០ខែមួយរូប បានអណ្ដែតចេញទៅកណ្ដាលសមុទ្រ ជាមួយនឹងពោងផ្លុំខ្យល់ រហូតចំងាយ១គីឡូម៉ែត្រ ពីឆ្នេរ។

សំណាងល្អ ដែលទារកត្រូវបាន ក្រុមឆ្មាំឆ្នេរ នៃក្រុង«Kucukkuyu» របស់ប្រទេសតួរគី រកឃើញទាន់ និងជួយ​សង្គ្រោះមកវិញ។ ទារកបានអណ្ដែតចេញទៅ ឆ្ពោះទៅកាន់កោះមួយ ឈ្មោះ «Lesbos» ដែលជាទឹកដី​របស់​ប្រទេសក្រិច។

បើតាមសារព័ត៌មានក្នុងស្រុក «BGN News» បានឲ្យស្រង់សម្ដីសារភាព របស់ឪពុកម្ដាយ មកបញ្ជាក់ថា ពួក​គេបានភ្លេចថា ពួកគេបានដាក់ទារក នៅលើពោងផ្លុំខ្យល់នោះ ហើយដាក់វានៅលើទឹក។ ហើយឪពុក​ម្ដាយ​រូប​នោះ មិននឹកស្មានថា ពោងអណ្ដែត បានរកិលខ្លួនតាមរលក និងតាមចន្លោះអ្នកហែលទឹក ដែលមានចំនួន​យ៉ាង​ច្រើននោះ ចេញទៅ។ ប៉ុន្តែនៅពេលពួកគេដឹងខ្លួន ពោងទារក ត្រូវបានរលកសមុទ្រ នាំយកទៅកណ្ដាល​សមុទ្រ​យ៉ាងលឿន ដែលធ្វើឲ្យអ្នកហែលទឹកធម្មតា មិនអាចហែល ទៅតាមទាន់។

ហេតុដូច្នេះហើយ ទើបពួកគេបានហៅ សុំជំនួយជាបន្ទាន់ ពីក្រុមឆ្មាំសមុទ្រ ដែលមានវត្តមាន នៅមិនឆ្ងាយ​ពី​ទីនោះ៕