ស៊ីលវីយ៉ូ ប៊ែរលូស្កូនី ភ្ជាប់​ពាក្យ​ជា​មួយ​នារី​អាយុ​ ២៧ឆ្នាំ

លោក ស៊ីលវីយ៉ូ ប៊ែរលូស្កូនី (Silvio Berlusconi) អតីតនាយករដ្ឋមន្ត្រីអ៊ីតាលី នៅមិនទាន់លែងលះជាផ្លូវការជាមួយ នឹងភរិយាទីពីរ​របស់លោកនាង វ៉ែរ៉ូនីកា ឡារីយ៉ូ (Veronica Lario) នៅឡើយ តែឥឡូវនេះ លោកបានប្រកាសភ្ជាប់ពាក្យជាមួយ នឹងនារីម្នាក់ទៀត។ កាលពីយប់ថ្ងៃអាទិត្យ ក្នុងកម្មវិធី «ដូមីនិកា លៃហ្វ (Domenica Live) នៅលើប៉ុស្ត៍លេខប្រាំក្នុងប្រទេសអ៊ីតាលី បុរសដែលមាន​អាយុ​៧៦ឆ្នាំរូបនេះ បានអោយដឹងថាលោកនឹងរៀបអាពាហ៍ពិពាហ៍ក្នុងពេលខាងមុខនេះ។ ស្ត្រីដែលលោកបានជ្រើសរើស មានឈ្មោះថា ហ្វ្រង់សេស្កា ប៉ាស្កាល់ (Francesca Pascale)។
Loading...
  • ដោយ: សេក មនោរកុមារ
  • កែប្រែចុងក្រោយ: December 18, 2012
  • ប្រធានបទ:
  • អត្ថបទ: មានបញ្ហា?
  • មតិ-យោបល់

លោក ស៊ីលវីយ៉ូ ប៊ែរលូស្កូនី អតីតនាយករដ្ឋមន្ត្រីអ៊ីតាលី អាយុ៧៦ឆ្នាំ បានប្រកាសកាលពីថ្ងៃអាទិត្យទី១៦ធ្នូកន្លងមកនេះ តាមកញ្ចក់ ទូរទស្សន៍ នូវពិធីភ្ជាប់ពាក្យរបស់លោក ជាមួយនាងកញ្ញាពិធីការិនីទូរទស្សន៍ម្នាក់ នាងហ្វ្រង់សេស្កា ប៉ាស្កាល់ អាយុ២៧ឆ្នាំ។


នាង ហ្វ្រង់សេស្កា ប៉ាស្កាល់ និងលោក ស៊ីលវីយ៉ូ ប៊ែរលូស្កូនី។ រូបថត AGN/INFOPHOTO។

លោក ស៊ីលវីយ៉ូ ប៊ែរលូស្កូនី (Silvio Berlusconi) អតីតនាយករដ្ឋមន្ត្រីអ៊ីតាលី នៅមិនទាន់លែងលះជាផ្លូវការជាមួយ នឹងភរិយាទីពីរ​របស់លោកនាង វ៉ែរ៉ូនីកា ឡារីយ៉ូ (Veronica Lario) នៅឡើយ តែឥឡូវនេះ លោកបានប្រកាសភ្ជាប់ពាក្យជាមួយ នឹងនារីម្នាក់ទៀត។ កាលពីយប់ថ្ងៃអាទិត្យ ក្នុងកម្មវិធី «ដូមីនិកា លៃហ្វ (Domenica Live) នៅលើប៉ុស្ត៍លេខប្រាំក្នុងប្រទេសអ៊ីតាលី បុរសដែលមាន​អាយុ​៧៦ឆ្នាំរូបនេះ បានអោយដឹងថា លោកនឹងរៀបអាពាហ៍ពិពាហ៍ក្នុងពេលខាងមុខនេះ។ ស្ត្រីដែលលោកបានជ្រើសរើសនោះ មាន​ឈ្មោះថា ហ្វ្រង់សេស្កា ប៉ាស្កាល់ (Francesca Pascale)។

«សម្រេចសម្រួលទៅ ខ្ញុំមានអារម្មណ៍ថាមិនសូវឯកោទៀតទេ។ ខ្ញុំបានភ្ជាប់ពាក្យជាមួយស្ត្រីម្នាក់ អាយុ២៧ឆ្នាំ (...) ជាស្ត្រីម្នាក់ដែល​មានតម្លៃពិតប្រាកដ។ នាងមានរូបរាងស្អាត តែនៅខាងក្នុងចិត្តរបស់នាង មានរឿងល្អជាច្រើនទៀត។» លោក ប៊ែរលូស្កូនី បាន​និយាយយ៉ាងដូច្នេះ។ លោកបានបន្ថែមថា កូនស្រីរបស់លោក ម៉ារីណា (Marina) ក៏បានយល់ព្រមនឹងចំណងទាក់ទង់នេះដែរ។ «អនាគតភរិយារបស់ខ្ញុំនេះ​ ជាមិត្តភ័ក្រជិតដិតជាទីបំផុត ជាមួយនឹងម៉ារីណា» លោកបានធានាអះអាងបន្ថែមថា «រវាងយើងមាន​គម្លាតអាយុ ៤៩ឆ្នាំ តែយើងបានស្គាល់គ្នាមានរយះពេល៧ឆ្នាំរួចហើយ។ នាងជានាយិការក្រុម “ស៊ីលវីយ៉ូ យើងនឹកអ្នក” នៅទីក្រុង​ណាប្ល៍ (Naples) (...) ហើយបន្តិចម្ដងៗ នាងបានចាប់ផ្ដើមធ្វើការជាមួយខ្ញុំ។»

កាលពីថ្ងៃពុធសប្ដាហ៍មុន កាសែតក្នុងស្រុក «ឡារឺពីប្លីកា (La Repubblica)» ធ្លាប់បានស្រង់សម្ដីលោកស្រី ដានីញ៉ែឡា សាតានឆែ (Daniela Santanchè) អតីតរដ្ឋលេខាធិការពីខែមិនា ២០១០ មកដល់វិច្ឆិកា២០១១ នៃរដ្ឋាភិបាល ប៊ែរលូស្កូនី ក៏បានបង្ហើបអោយ​ដឹងដែរ  ពីទំនាក់ទំនងរវាងគូរស្នេហាទាំងពីរ។ លោកស្រីនិយាយថា «តើពិតជា ហ្វ្រង់សេស្កា ប៉ាស្កាល់នោះមែនទេ? ប៊ែរលូស្កូនី បានឆ្លើយថា ជាសង្សារបស់គាត់។ តែសម្រាប់ខ្ញុំ វាជារឿងមួយល្អបំផុត។» តែបើទោះជាអ្នកទាំងពីរ មិនដែលប្រកាសជាផ្លូវការ​ពី​មុនមក ពីទំនាក់ទំនងរបស់គេទាំងពីរ ក៏អ្នកផងធ្លាប់បានឃើញ អ្នកទាំងពីរចេញដើរជាមួយគ្នាជាញយដង ជាពិសេសនៅតាម​ភោជ-​នីយដ្ឋាន និងនៅពហុកីឡាដ្ឋាន ពេលមានប្រកួតកីឡាបាល់ទាត់។ ពីខែមករាមុន លោកបានបង្ហាញតម្រុយពាក្យ តាមរយះ​ខ្សែរ វីដេអូមួយ ដែលផលិតសម្រាប់អ្នកបោះឆ្នោតជូនលោក អះអាងពីទំនាក់ទំនងមួយ «ស្ថិតស្ថេរ និងស្នេហាជាមួយមនុស្សម្នាក់»។

លែងលះពីរដង ... រឿងអាស្រូវស្នេហា ... បុរសសម្បូរស្នេហ៍ ...

កាសែតក្នុងស្រុកមួយទៀតឈ្មោះ តេលេហ្គ្រាហ្វ (Telegraph) បាននិយាយថា ជីវិតអតីតនាយករដ្ឋមន្ត្រីរូបនេះ មានរឿងបីសំខាន់៖ «គ្រួសារ នយោបាយ និងរឿងផ្ទាល់ខ្លួនរបស់គាត់»។ កាសែតបានដកស្រង់សម្តីរបស់តំណាងរាស្ត្រម្នាក់ទៀត មកនិយាយថា «នាង​ហ្វ្រង់សេស្កា ប៉ាស្កាល់ ធ្លាប់ជាអ្នកជិតស្និតបំផុតជាមួយនឹង លោកប៊ែរលូស្កូនី គឺជិតជាងអ្វី​ ដែលគ្រាន់តែជាទំនាក់ទំនង​មិត្តភ័ក្រ​ធម្មតា»។ ស្ត្រីវ័យក្មេង អាយុ២៧ឆ្នាំនេះ ទំនងបានត្រៀមខ្លួនរួចជាស្រេចហើយ ក្នុងការក្លាយជាស្ត្រីទីមួយ នៃប្រទេសអ៊ីតាលី ដោយ​ហេតុថា លោកប៊ែរលូស្កូនី ក៏ងាកត្រឡប់មកឈរឈ្មោះ សម្រាប់ការបោះឆ្នោតជាទូទៅនៅប៉ុន្មានខែខាងមុខ។

​នាង ហ្វ្រង់សេស្កា ក៏ត្រូវបានកាសែតនិយាយផងដែរ ថាបានលាងជម្រះ នូវមន្ទិលបេះដូងខ្លះៗ ឬសត្រូវស្នេហា ដែលមាន​ជាប់​ទាក់​ទង នឹងគូរស្នេហ៍​វ័យចំណាស់របស់នាង ថែមទៀតផង។ នៅក្នុង​ហេតុផលប្រច័ណ្ឌ នាងធ្លាប់​បានហាមលោក ប៊ែរលូស្កូនី មិនអោយ​ជួប នាងម៉ារ៉ា កាហ្វាញ៉ា (Mara Carfagna) អតីតអ្នកបង្ហាញម៉ូត តែក្លាយជារដ្ឋមន្ត្រីក្រសួងសមភាពនៃភ័ពវាសនាម្នាក់ ដែលជ្រើស​តាំងដោយ លោកប៊ែរលូស្កូនី ខ្លួនឯងពីមុន។ លោកប៊ែរលូស្កូនី ក៏ត្រូវនាង​ហ្វ្រង់សេស្កា សុំអោយផ្ដាច់ទំនាក់ទនងជាមួយ នឹងនាង​នីកូល មីណេទី (Nicole Minetti) ដែរ ដោយហេតុតែនាងនីកូល ធ្លាប់ញញឹម​ដាក់លោក ប៊ែរលូស្កូនី និងក៏ដូចជានាង សាប៊ីណា ប៊ើហ្គេន (Sabina Began) ដែលធ្លាប់ប្រកាសថា មានផ្ទៃពោះដោយ​ចៃដន្យមួយ មុននឹងកូននោះត្រូវរលូតមក។

លោក ស៊ីលវីយ៉ូ ប៊ែរលូស្កូនី ធ្លាប់រៀបការពីរដងរួចមកហើយ នៅឆ្នាំ១៩៦៥ ជាមួយនឹងអ្នកស្រី កាឡា ម៉ារីយ៉ា​ អេវីរ៉ា ដែល អូគ្លីយ៉ូ (Carla Maria Elvira Dell’Oglio) មានបុត្រចំនួន ២នាក់ នៅឆ្នាំ ១៩៨០ លោកបានជួបនឹងអ្នកស្រី វែរ៉ូនីកា ឡារីយ៉ូ (Veronica Lario) ម្នាក់ទៀត ហើយលោកបានលែងលះភរិយាទីមួយ មុននឹងរៀបការជាមួយអ្នកស្រី វែរ៉ូនីកា ជាមួយនឹងកូនពីរនាក់ទៀត។ ដោយទ្រាំ​មិនបាននឹងអត្តចរិករបស់ប្ដី អ្នកស្រី វែរ៉ូនីកា ឡារីយ៉ូ ក៏បានសុំលែងស្វាមីអ្នកស្រីនេះ នៅឆ្នាំ២០០៩ទៀត ហើយបានទាមទាររហូត​មកទល់បច្ចុប្បន្ន នូវទឹកប្រាក់ ៣០០ ០០០អ៊ឺរ៉ូក្នុងមួយខែ សម្រាប់ចិញ្ចឹមជីវិត។

គ្រប់ៗគ្នា សង្ឃឹមយ៉ាងមុតមាំថា ជាមួយនឹងនាង ហ្វ្រង់សេស្កា អាយុ២៧ឆ្នាំ លោក ប៊ែរលូស្កូនី រកបាននូវគូរជីវិត ជាទីគាប់ចិត្ត​របស់​លោក ហើយនឹងផ្អាកនូវរាល់សកម្មភាព «ប្រលោមស្នេហ៍»របស់លោក នៅក្នុងជីវិតចុងក្រោយនេះ៕

------------------------------------------------
ដោយ៖ សេក មនោរកុមារ - ប៉ារីស ថ្ងៃទី១៦ ខែធ្នូ ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...