ដោយមានជំនួយពីកងទ័ពផង នគរបាលអាល្លឺម៉ង់ បានរឹបអូសយក​ បាន​សម្រេចជាស្ថាពរ នូវសព្វាវុធធុនធ្ងន់​មួយសម្រាប់ ពីក្នុងផ្ទះរបស់បុរស ចំណាស់៧៨ឆ្នាំម្នាក់។ នេះបើតាមការផ្សាយឲ្យដឹង របស់សារព័ត៌មាន​អាល្លឺម៉ង់ «Deutsche Welle» ចេញកាលពីម្សិលម៉ិញ។ ក្រៅពីរថក្រោះ គេនៅរកឃើញកាំភ្លើងធំ សម្រាប់បាញ់ ការពារដែនអាកាស ទំងន់៥តោនមួយគ្រឿង និងកាំជ្រួចបាញ់ក្នុងទឹក មួយគ្រាប់ទៀត ពីគេហដ្ឋាន របស់​បុរស​ដដែលនេះ។

សារព័ត៌មានបានសរសេរទៀតថា ទាហានចំនួន២០នាក់ បានចំណាយពេលដល់ទៅ៩ម៉ោង ដើម្បីយក​រថ​ក្រោះនេះ ចេញមកបាន កាលពីថ្ងៃទី២ ខែកក្កដាកន្លងមក។ ចំងល់បានចោទសួរឡើង ថាធ្វើយ៉ាងណា ទើប​បែកធ្លាយ ករណីលាក់សព្វាវុធ ធុនធ្ងន់បែបនេះ ទៅដល់អាជ្ញាធរ?

កាលពីប៉ុន្មានខែមុន បុរសចំណាស់ ដែលជាអ្នកដើរ​ប្រមែប្រមូលវត្ថុទាំងនេះ បានថ្លែងអួតអាង​ប្រាប់សារ​ព័ត៌មានមួយចំនួន ថាខ្លួនបានរក្សាទុក នូវគ្រឿងសម្ភារៈកងទ័ព នៅក្នុងបន្ទប់ក្រោមដី នៃផ្ទះរបស់គាត់។ បុរស​ម្នាក់នេះ បានបង្ហើបទៀតថា គាត់មានរូបចម្លាក់ធ្វើពីស្ពាន់ជាច្រើន ដែលបន្សល់ទុកពីសម័យហ៊ីត្លែ នៅកាន់​អំណាច។ ការលើកឡើងនេះ ជៀសមិនផុត ពីការស្ដាប់ឭ របស់នគរបាលអាល្លឺម៉ង់នោះទេ ដែលបង្កឲ្យ​ការ​ស៊ើបអង្កេតមួយ ត្រូវបានបើកធ្វើ រហូតឈានមកដល់ ការឆែកឆេរក្នុងផ្ទះ របស់បុរសអ្នកប្រមែប្រមូល។ នៅ​ក្នុងពេលនោះហើយ ដែលនគរបាល បានរកឃើញនូវសព្វាវុធទាំងនេះ។

សព្វាវុធគ្រប់ប្រដាប់ ត្រូវបានសម្រេចឲ្យរឹបអូស ដោយរដ្ឋអាជ្ញាអាល្លឺម៉ង់ ប្រចាំក្រុង «Kiel» ហើយត្រូវបាន​ដឹក​ចេញទៅ ដោយយានយន្ដដ៏ធំ របស់កងទ័ព។

បើតាមមេធាវីរបស់បុរសចំណាស់ បានឲ្យដឹងថា អ្នកប្រមូលទុករូបនេះ មិនបានធ្វើខុសច្បាប់អ្វីទាំងអស់ ដោយ​សារសព្វាវុធដែលត្រូវបានរឹបអូស មិនមានសកម្មភាព បាញ់ចេញអ្វីឡើយ។ ដោយឡែកមេភូមិ ក្នុង​តំបន់​នោះ​បានរំលឹកឡើងវិញថា អ្នកភូមិនេះពីមុន សុទ្ធតែបានដឹង ពីវត្តមានរបស់រថក្រោះ។ លោកមេភូមិ បាន​ថ្លែង​ឡើង​ថា៖ «ពួកគេបានបានជិះរថក្រោះនេះ ដើរកំសាន្ដ នៅតាមផ្លូវ កាលពីមានខ្យល់ព្យុះទឹកកក ក្នុង​ឆ្នាំ​១៩៧៨។ មនុស្ស​យើង មានសព្វគ្រប់ទាំងអស់ ព្រោះអ្នកខ្លះ ចូលចិត្តជិះរថភ្លើង តែអ្នកខ្លះទៀត ចូលចិត្ត​ជិះ​រថក្រោះ ទុក​ដូចជាយាន្ដជំនិះ។»៕