សង្គ្រាមពាក្យសម្ដី បានចាប់ផ្ដើមផ្ទុះសារជាថ្មី។ បើរដ្ឋាភិបាលកម្ពុជា បានថ្លែងការពារខ្លួន និងការទទួលខុសត្រូវ​របស់ខ្លួន ក្នុងបញ្ហាទឹកដី និងការគ្រប់គ្រងប្រទេសនោះ តែសម្រាប់សមាជិកព្រះញាតិវង្សមួយរូប គឺព្រះអង្គម្ចាស់ ស៊ីសុវត្ថិ ធម្មិកោ វិញ បានអះអាងថា ប្រទេសកម្ពុជាសព្វថ្ងៃ កំពុងតែក្លាយខ្លួន ទៅជាកម្ពុជាក្រោមទីពីរហើយ។ ជាអតីតជំនួយការផ្ទាល់ របស់អតីតព្រះមហាក្សត្រ នរោត្តម សីហនុ រូបនេះ បានថ្លែងយ៉ាងដូច្នេះ នៅក្នុងពិធី​រំលឹក​ខួបលើកទី ៦៦ នៃការបាត់បង់ទឹកដីកម្ពុជាក្រោម កាលពីថ្ងៃទី២ ខែមិថុនា ឆ្នាំ២០១៥កន្លងទៅនេះ ក្នុងវត្ត​ចាស់ រាជធានីភ្នំពេញ។

ព្រះអង្គម្ចាស់ ធម្មិកោ បានលើកយកពី កំហុសចំនួន៤ ដែលជាការទទួលខុសត្រូវរបស់រដ្ឋាភិបាល ក្នុងនោះ៖

• ទីមួយ «ប្រព័ន្ធអងប់រំ»៖ ដែលប្រព័ន្ធមួយនេះ បាននឹងកំពុងបំផ្លាញ ការចេះដឹងរបស់ប្រជាពលរដ្ឋ តាម​រយៈការផ្តល់សញ្ញាបត្រ ដែលគ្មានតម្លៃ។ ជាពិសេស រដ្ឋាភិបាលមិនបានយកថ្ងៃ ដែលបាត់បង់​ទឹកដី​កម្ពុជា​ក្រោម យកធ្វើជាថ្ងៃរំលឹកខួបប្រចាំឆ្នាំ ដើម្បីឲ្យពលរដ្ឋខ្មែរទាំងមូលបានដឹង។ រីឯក្រសួងអប់រំវិញ ក៏​មិន​បានដាក់កម្មវិធី សិក្សាប្រវត្តិសាស្រ្ត «ទឹកដីកម្ពុជាក្រោម» ទៅឲ្យពលរដ្ឋខ្មែរបានរៀនសូត្រដែរ។
• ទីពីរ «ប្រព័ន្ធសុខភាព» ដែលប្រព័ន្ធមួយនេះ មិនត្រូវបានរដ្ឋាភិបាល យកមកគិតគូរ និងយកចិត្តទុកដាក់ លើបញ្ហាសុខភាព​របស់​ប្រជាជនកម្ពុជាឡើយ។
• ទីបី«ប្រព័ន្ធច្បាប់» ដែលប្រព័ន្ធនេះ ត្រូវបានរំលោភបំពានច្បាប់ ដោយអាជ្ញាធរសាធារណៈខ្លួនឯង។
• និងទីបួន «ប្រព័ន្ធសាសនា» ដែលរដ្ឋាភិបាលខ្លួន មិនបានគោរព ឬប្រតិបត្តិតាមវិន័យ របស់ព្រះពុទ្ធ​សាសនា​នោះទេ។

សមាជិកព្រះញាតិវង្សអង្គនេះ បានស្នើឡើងថា៖ «ដើម្បីកុំឲ្យទឹកដីកម្ពុជាកណ្តាល ធ្លាក់ក្នុងកណ្តាប់ដៃយួន និង​ដើម្បីទាមទារ យកទឹកដីកម្ពុជាក្រោមមកវិញ យើងជាប្រជាពលរដ្ឋខ្មែរទាំងមូល មិនថាខ្មែរកម្ពុជាក្រោម ខ្មែរ​កណ្តាល ខ្មែរលើ ត្រូវតែរួបរួមសាមគ្គីគ្នា ឯកភាពគ្នាជាធ្លុងមួយ ដើម្បីកសាងជាតិមាតុភូមិរបស់យើង ដែលតាម​រាជបន្ទូល របស់ព្រះមហាក្សត្រយើង មានព្រះបន្ទូលថា ប្រជារាស្ត្រកម្ពុជាក្រោម កម្ពុជាកណ្តាល កម្ពុជាលើ សុទ្ធ​តែ​ជាកូនចៅព្រះអង្គទាំងអស់»។

ព្រះអង្គម្ចាស់ ស៊ីសុវត្ថិ ធម្មិកោ បានស្រង់យកនូវបន្ទូលអះអាង របស់ព្រះរាជាខ្មែរ មកថ្លែងទៀតថា៖ «ព្រះ​មហាក្សត្រ នៅតែទុកដី​កម្ពុជា​ក្រោមជាដីខ្មែរ និងប្រជារាស្រ្ត ដែលរស់នៅលើ ទឹកដីកម្ពុជាក្រោម ជាប្រជា​នុរាស្រ្ត​របស់​ព្រះអង្គ»៕