កងកម្លាំងនគរបាល របស់ប្រទេសកុម្មុយនីស វៀតណាម បានបំបែកជួរអ្នកធ្វើបាតុកម្ម ប្រឆាំងចិន នៅក្នុងទីក្រុងពីរនៃប្រទេសនេះ ដោយបានឃាត់ខ្លួនបាតុករទាំងនោះ ចំនួនជាង២០នាក់។ បាតុកម្មដែលមានរូបរាងឡើង នៅក្នុងប្រទេសវៀតណាម ក្រោយពេល ដែលភាពតានតឹង បានកើតមានឡើងវិញ ជុំវិញជម្លោះដែនសមុទ្រចិនខាងត្បូង ដែលទីក្រុងប៉េកាំង បានប្រកាសអធិបតេយ្យភាព។

 
ក្បួនដង្ហែរបស់ក្រុមអ្នកតវ៉ាវៀតណាម ប្រមាណជា២០០នាក់ តាមដងផ្លូវរបស់ទីក្រុងហាណូយ។
រូបថត beijingshots.com។

ភាពខឹងសម្បារប្រឆាំងប្រទេសចិនបែបនេះ ជាសំនុំរឿងរសើបយ៉ាងខ្លាំងមួយ សម្រាប់ក្រុមមេដឹកនាំនៃប្រទេសវៀតណាម ព្រោះពួក បាតុករអាចនឹងបំបែរទិសដៅរបស់ពួកគេ ដែលកំពុងធ្វើប្រឆាំងទីក្រុងប៉េកាំង អោយមកប្រឆាំងទល់នឹង របបកុម្មុយនីសវៀតណាម​វិញ។

នគរបាលបានអនុញ្ញាតិអោយមនុស្សអ្នកតវ៉ា ប្រមាណជា ២០០នាក់ ដើរជាក្បួននៅតាមដងផ្លូវ ចាប់ផ្ដើមពីរោងល្ខោនរបស់ទីក្រុង​ហាណូយ តែបានបញ្ជានៅទីបំផុត អោយបំបែកជួរបាតុកម្មនេះ នៅ៣០នាទីក្រោយមក។ ខណៈដែលអ្នកតវ៉ាជាច្រើននៅតែបន្ត អាជ្ញាធរបានរុញពួកគេ និងបោះចូលក្នុងរថយន្ដក្រុងដ៏ធំមួយ ហើយបានបើកចាកចេញពីទីកន្លែងនោះភ្លាម។

ប្រទេសវៀតណាម និងចិន ជាប្រទេសប្រកាន់ប្រព័ន្ធនយោបាយកុម្មុយនីសពីរ ដែលមិនដែលបើកទូលាយខាងសិទ្ធរបស់ពលរដ្ឋ ក្នុងការចុះដើរធ្វើបាតុកម្មនោះទេ។ ប្រទេសទាំងពីរ មានទំនាស់នឹងគ្នាតាំងពីយូយាណាស់មកហើយ ស្ដីពីសិទ្ធគ្រប់គ្រង ដែនទឹក​សមុទ្រចិនខាងត្បូង។ បញ្ហានេះ បានកើតមាន រហូតទាក់ទាញអោយអាមេរិក លូកដៃចូលមកធ្វើដឹងលឺ ក្នុងក្របខ័ណ្ឌនៃសន្តិសុខ​តំបន់អាស៊ីប៉ែកអាគ្នេយ៍។

ទីក្រុងហាណូយ បានអះអាងថា នាវាចម្បាំងជាច្រើនរបស់ប្រទេសចិន បានកម្ទេចនាវាមួយ ក្នុងចំណោមនាវាជាច្រើនរបស់ខ្លួន ដែលកំពុងធ្វើការ ក្នុងផ្នែកឧត្តុនិយម និងវាស់វែងផែនទី។

តែប្រទេសចិនបានតម្រូវអោយមាន ការសុំទិដ្ឋការនៅក្នុងលិខិតឆ្លងដែន ដោយលើកពីផែនទីដែនទឹកសមុទ្រខាងត្បូង ថាស្ថិតក្នុង​អធិបតេយ្យរបស់ខ្លួន។ ជាការលើកឡើង ដែលបានបញ្ឆេះកំហឹង របស់ប្រទេសវៀតណាមអោយផ្ទុះឡើង៕

-------------------------------------------------
ដោយ ៖ កេសរកូល - ភ្នំពេញ ថ្ងៃទី៩ ខែធ្នូ ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ