«ក្រសួងអប់រំ យុវជន និងកីឡា ស្នើ​សុំឲ្យវិទ្យាល័យដំដែក ​បង្កើតក្រុមប្រឹក្សាវិន័យ ​​ដើម្បីមានវិធានការ​អប់រំ ចំពោះ​អ្នក​ប្រព្រឹត្ត ​ស្របតាម​ប្រការ១១​នៃប្រកាស ​ស្តីពីបទបញ្ជាផ្ទៃក្នុង​ សម្រាប់គ្រឹះស្ថានសិក្សា​សាធារណៈ​» នេះជាអ្វី ដែលគេ​អាច​អានបាន នៅក្នុងសេចក្ដីប្រកាសព័ត៌មាន របស់ក្រសួងអប់រំកម្ពុជា ឆ្លើយតបទៅនឹងវីដេអូឃ្លីបមួយ ដែលត្រូវបានគេយក​មក​បង្ហោះ យ៉ាងព្រោងព្រាត នៅលើបណ្ដាញសង្គម។

វីដេអូ ដែលបានបណ្ដាល ឲ្យមានចំណាប់អារម្មណ៍ ពីក្រសួងអប់រំនោះ បានបង្ហាញឲ្យឃើញ នូវអំពើហិង្សាមួយ បង្កឡើង​ដោយសិស្សប្រុសមួយរូប បានប្រើកណ្ដាប់ដៃ ជាច្រើនដាល់ ទៅលើក្បាល របស់សិស្សស្រីម្នាក់ទៀត ដែលអង្គុយក្នុងតុ​រួម​ថ្នាក់តែ​មួយ។ បើតាមក្រសួងអប់រំ ឃ្លីបវីដេអូនេះ ត្រូវបានថតចេញ ពីថ្នាក់​ទី៩ខ ​នៃវិទ្យាល័យដំដែក ​ស្រុកសូទ្រនិគម ​ខេត្ត​សៀមរាប។

ក្នុងសេចក្ដីប្រកាស របស់ក្រសួងចុះថ្ងៃទី ២៤ ​ខែឧសភា​ ​ឆ្នាំ២០១៥ ដែលត្រូវបានយកមកបង្ហោះ ទៅលើគណនីហ្វេសប៊ុក របស់លោក ហង្ស ជួនណារ៉ុង រដ្ឋមន្ត្រីអប់រំ យុវជន និងកីឡានោះ បានសរសេរទៀតថា ត្រូវមានវិធានការ«អប់រំ» ទៅតាម​កម្រិតនៃកំហុស​ ដោយអប់រំណែនំា ស្តីបន្ទោស ​ដោយចុះក្នុងសៀវភៅ​សិក្ខាគារិក​ ព្រមាន ជាលាយលក្ខណ៍​អក្សរ និង​តម្រូវ​ឲ្យសិស្ស ដែលប្រព្រឹត្តកំហុស ​ធ្វើការងារពលកម្ម ​បម្រើសហគមន៍ ​​នៅ​ក្នុង​វិទ្យាល័យដំដែក ​ក្នុងគោលដៅ កុំឲ្យ​ទង្វើបែប​នេះ កើត​ឡើងនៅពេលក្រោយទៀត និងចៀសវាង​សិស្សដទៃទៀត យកតម្រាប់តាម។

ប្រតិកម្មភ្លាមៗ របស់ក្រសួង តាមរយៈសេចក្ដីប្រកាសព័ត៌មាននេះ ត្រូវបានទទួលស្វាមគមន៍ ជាទូទៅ ពីបណ្ដាជនអ្នក​ប្រើ​ប្រាស់ បណ្ដាញសង្គម។ សេចក្ដីប្រកាស ដែលបានបង្ហោះ នៅលើគណនីហ្វេសប៊ុក របស់លោករដ្ឋមន្ត្រី ត្រូវបានគេយក​ទៅ​ចែករំលែក ជិត៥០០នាក់ គ្រាន់តែក្នុងរយៈពេលបីម៉ោងប៉ុណ្ណោះ។

ប៉ុន្តែសម្រាប់អ្នកប្រើប្រាស់បណ្ដាញសង្គម មួយចំនួនទៀត យល់ថា ការអប់រំដែលមាននៅ តែតាមសាលារៀន មិនគ្រប់​គ្រាន់​ទេ។ គេគប្បីត្រូវធ្វើដូចគ្នាដែរ តាមរយៈគ្រួសារ និងតាមរយៈសង្គម។ អ្នកប្រើប្រាស់បណ្ដាញសង្គមមួយរូប បាន​លើក​ឡើងថា សាលារៀនជាផ្នែកមួយ តែបើចេញមកខាងក្រៅ សម្បូរទៅដោយការកាប់ចាក់ វាយដុំទៅលើស្ត្រី ហើយមិនដែល​ឃើញ មានអាជ្ញាធរណា យកច្បាប់មកអនុវត្តន៍នោះ ទង្វើនេះ នឹងដិតជាប់ក្នុងអារម្មណ៍កុមារ និងឈានទៅយក​ករណី​ហិង្សា​​នោះ មកអនុវត្តន៍ដោយខ្លួនឯង នៅថ្ងៃណាមួយ ដូចវីដេអូនេះ ជាឧទាហរណ៍ស្រាប់៕

» វីដេអូហិង្សារបស់សិស្សប្រុស ដែលត្រូវបានយកមកបង្ហោះ លើបណ្ដាញសង្គម៖

» សេចក្ដីប្រកាសព័ត៌មាន របស់ក្រសួងអប់រំ យុវជន និងកីឡា