បន្ទាប់បម្រើការ ជាទាហាតលោតឆ័ត្រយោង អស់រយៈកាល៤ឆ្នាំ លោក ម៉ាតជូ តាធើស័ល (Matthew Tattersall) ចង់​ឲ្យ​ការលោតឆ័ត្រយោង របស់ខ្លួនជាលើកចុងក្រោយ ទទួលបាននូវការកត់សម្គាល់ ដ៏ពិសេសមួយ។ ឆ្លៀតឱកាស នៃការ​លោត​ឆ័ត្រយោង ចុងក្រោយបំផុត ទាហានដ៏ចំណាន បាននាំ វីល្លី ម៉ាខេត (Willy Makelt) មិត្រចាស់របស់លោកម្នាក់ ទៅ​លោត​ជា​មួយ... តែមិត្រចាស់នោះ មិនមែនជាមនុស្សទេ តែជាត្រីមួយក្បាល នៅក្នុងដបដែលមានទឹក ឲ្យមិត្តចាស់នេះ អាច​ហែល​លេងបាន។

មិត្រចាស់​របស់លោក ម៉ាតជូ បានចុះមកដល់ដី ដូចលោកដែរ ដោយគ្មានកើតហេតុភេទ អ្វីចម្លែកនោះទេ។ ក្នុងរយៈ​ពេល​នោះ លោក ម៉ាតជូ មិនបានភ្លេច ថតរូបដោយខ្លួនឯង ពីគំនិតដែលនាំមិត្តចាស់ មកលោតជាមួយនេះ ហើយថែមទាំង​បាន​យកទៅបង្ហោះ នៅលើជញ្ជាំងហ្វេសប៊ុក របស់លោកទៀត។ លោកបានថ្លែងប្រាប់ «New York Daily News» ថា៖ «រូប​ថត​នេះ បានក្លាយជារូបដ៏ពេញនិយម ដែលខ្ញុំមិននឹកស្មានដល់»។

បើសិនជាប្រិយមិត្តរបស់លោក ម៉ាតជូ បានសប្បាយរីករាយ និងបានធ្វើការចែករំលែក រូបថតនេះ យ៉ាងច្រើន​ផុលផុស​ក៏​ដោយនោះ តែសម្រាប់ថ្នាក់លើ នៃជួរកងទ័ពឆ័ត្រយោងវិញ មិនបានសប្បាយចិត្តទាល់តែសោះ។

ថ្នាក់លើរបស់លោក ម៉ាតជូ បានបញ្ជាឲ្យទាហានឆ័ត្រយោងរូបនេះ សរសេរឡើងវិញ ឲ្យបាន១០០០ពាក្យ នូវចំណុច​សំខាន់ៗ​ទាំងប៉ុន្មាន ដែលនិយាយពីសុវត្ថិភាព និងពីជំនាញ ដែលត្រូវអនុវត្តន៍ នៅក្នុងពេលលោតឆ័ត្រយោង។ ប៉ុន្តែ​លោក ម៉ាតជូ ហាក់ដូចជាយកបញ្ជានេះ មកធ្វើជាការលេងសើច... ដូច្នេះ ទណ្ឌកម្មបានកើនឡើង ថែមទៀត ដោយលោក​ត្រូវ​ធ្វើការបោសជូត ចំនួន ១២ថ្ងៃ។

លោក ម៉ាតជូ បានរៀបរាប់ថា៖ «ទណ្ឌកម្មអាចនឹងមានកម្រិតធ្ងន់ធ្ងរជាងនេះ តែខ្ញុំមិនខឹងអ្វីទេ។» តែទាហានឆ័ត្រ​យោង​រូបនេះ បានកំប្លែង លេងសើច ពីការសោកស្ដាយរបស់ខ្លួន ដែលត្រីក្រឹម មិនត្រូវបានរងនូវទណ្ឌកម្ម ដូចគ្នា។ ទាហាន​លេង​សើចយើងនេះ នឹងបញ្ចប់អាជីព ជាអ្នកលោតឆ័ត្រយោង នៅថ្ងៃ២០ឧសភាខាងមុខ៕