លោក សួន សេរីរដ្ឋា ប្រធានគណបក្សអំណាចខ្មែរ ដែលនឹងចូលរួម ការបោះឆ្នោតថ្នាក់ជាតិ នាឆ្នាំ២០១៨ ខាងមុខនេះ បានសរសេររិះគន់ ក្នុងបណ្តាញព័ត៌មាន យ៉ាងខ្លាំងៗ ទៅលើបេក្ខភាពទី៩ របស់ គ.ជ.ប ថ្មី ដែលចេញពី​អង្គការ​សង្គម​ស៊ីវិល ថាជាបេក្ខភាពមួយគ្មានន័យ និងគ្មានតម្លៃ សម្រាប់ធ្វើឲ្យ គ.ជ.ប មួយនេះ មានឯករាជ្យភាព និងតុល្យភាព ព្រោះ​តែ​ខ្លួន បានធ្វើត្រឹមតែជាអ្នកនាំពាក្យ ប៉ុណ្ណោះ។

ប្រធានគណបក្សអំណាចខ្មែររូបនេះ បានធ្វើការប្រៀបប្រដូច អ្នកនាំពាក្យ គ.ជ.ប ថ្មីនេះ ទៅនឹង«សត្វសេក»មួយ របស់ គ.ជ.ប ដែលមានសិទ្ធ និងអំណាច ត្រឹមតែពាំនាំពាក្យនានា របស់ស្ថាប័នថ្មីប៉ុណ្ណោះ។ លោកបានសរសេរថា៖ «បើ​បេក្ខជន​ទី៩ ដែលរើស មកពីខាងអង្គការសង្គមស៊ីវិល បានធ្វើត្រឹមតែជា "សត្វសេក" របស់ គ.ជ.ប ថ្មីនោះ តើបេក្ខភាព​នេះ​មាន​តំលៃ​អ្វី ?»

ប្រធានគណបក្ស ដែលសម្បូរវោហារស័ព្ទរូបនេះ បានចាត់ទុកថា គ.ជ.ប មិនមានភាពឯករាជ្យនៅឡើយ តែគឺជា​ឧបករណ៍​នយោបាយសម្រាប់ គណបក្សសង្គ្រោះជាតិ និងគណបក្សប្រជាជនកម្ពុជាប៉ុណ្ណោះ។ លោកបាន​សរសេរ​បន្ត​ថា៖ «គ.ជ.ប ថ្មីនេះ គ្រាន់តែជាឧបករណ៍ រៀបចំការបោះឆ្នោតឲ្យ CPP & CNRP សម្រាប់ការបោះឆ្នោតបង្គ្រប់កិច្ច នាឆ្នាំ ២០១៨។ ដូច្នោះ គណបក្សអំណាចខ្មែរ និងពលរដ្ឋខ្មែរ ដែលចង់បានការ បោះឆ្នោតដោយសេរី និងយុត្តិធម៌ និងចង់បាន គ.ជ.ប ឯករាជ្យនោះ យើងនៅមានការងារច្រើនទៀត ដើម្បីតស៊ូគោលនយោបាយ និងធ្វើការតស៊ូមតិ ទាមទារំលាយ គ.ជ.ប របស់ CPP & CNRP នេះចេញ ហើយបង្កើត គ.ជ.ប ដែលឯករាជ្យពិតប្រាកដ មិនចំណុះឲ្យ គណបក្ស​នយោបាយ!»

ទស្សនាវដ្តីមនោរម្យ.អាំងហ្វូ មិនអាចសុំប្រតិកម្មតប ពីលោក ហង្ស ពុទ្ធា អ្នកនាំពាក្យថ្មី របស់ គ.ជ.ប បានទេ ដោយ​លោកពុំទទួលទូរស័ព្ទ។ តែលោកធ្លាប់បានអះអាង បន្ទាប់ពីលោកបានជាប់ជាបេក្ខភាពទី៩ ថ្មីៗថា លោកនឹង​ព្យាយាម​ធ្វើយ៉ាងណា ជម្រុញឲ្យ គ.ជ.ប ថ្មីមួយនេះ មានភាពឯករាជ្យ។ លោកបានថ្លែងនាពេលនោះថា លោកក៏នឹងជម្រុញ ឲ្យ​ការ​បោះឆ្នោត ក្នុងឆ្នាំ ២០១៨ ខាងមុខ ប្រកបដោយសេរី និងយុត្តិធម៌ ដែលធ្វើឲ្យគ្រប់គណបក្សនយោបាយ ចូលរួម​ទាំង​អស់ អាចទទួលយកបាន។

ដោយឡែកលោក យ៉ង់ គឹមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព ធ្លាប់បានបង្ហាញ​ប្រាប់​ទស្សនាវដ្តីថា លោកគាំទ្រនូវបេក្ខភាពលោក ហង្ស ពុទ្ធា ថាជាមនុស្សដែលអាចទុកចិត្តបាន។ លោកបានបន្តថា ព្រោះ​ក្នុង​ពេលកន្លងមក និងបច្ចុប្បន្ននេះ លោក ហង្ស ពុទ្ធា តែងតែចូលរួម ធ្វើសេចក្តីថ្លែងការណ៍ជាប្រចាំ ជាមួយ​នឹងសម្ព័ន្ធ​កំណែទម្រង់ការបោះឆ្នោត ក្នុងការប្រឆាំង នឹងអ្វីដែលគណបក្ស នយោបាយ ទាំងពីរ តាក់តែងឡើង ដែលមិនស្របនឹង​តម្រូវការចាំបាច់ របស់ច្បាប់ និងស្របតាមឆន្ទៈ របស់ប្រជាពលរដ្ឋនោះ។

តែ លោក យ៉ង់ គឹមអេង ហាក់ដូចជាមិនបានផ្តល់ ការទុកចិត្តមួយរយភាគរយ ទៅលើបេក្ខភាពនេះ សម្រាប់ពេល​អនាគត ថានឹងឈរក្នុងជំហរអព្យាក្រិត្យនោះឡើយ។ លោកបានបញ្ជាក់ថា៖ «សម្រាប់ទៅអនាគតយ៉ាងណា គ្មាន​នរណា​ម្នាក់​ទស្សន៍ទាយដឹងទេ»៕