ជាថ្មីម្ដងទៀត អ្នកភូមិប៉ោយប៉ែត ប្រមាណជាង៤០នាក់ បាននាំគ្នាធ្វើការតវ៉ា នៅព្រឹកថ្ងៃទី២០ ខែមេសា ឆ្នាំ២០១៥នេះ សុំ​អន្តរាគមន៍ ពីចៅសង្កាត់ប៉ោយប៉ែត ជុំវិញពាក្យបណ្ដឹង របស់មេភូមិរបស់ពួកគេ ដែលបានប្តឹងអ្នកភូមិ ពីបទបរិហារ​កេរ្តិ៍។ អ្នកភូមិទាំងនោះបានសម្ដែងការខឹងសម្បារថា ក្នុងនាមជាមេភូមិ មិនបានធ្វើតាមតួនាទី ជួយអ្នកភូមិរងគ្រោះទេ តែ​បែរ​ជា​ដាក់​ពាក្យ ប្តឹងអ្នកភូមិទៅវិញ។

ប្រជាពលរដ្ឋនៅក្នុងភូមិខាងលើ បានរៀបរាប់ ពីដំណើររឿង ដែលឈានទៅដល់ ការប្ដឹងផ្ដល់បរិហារកេរ្តិ៍នេះថា នៅ​ពេល​ដែលអ្នកភូមិមានរឿង កាលពីថ្ងៃទី១៩ ខែមេសា ឆ្នាំ២០១៥ មានមន្ត្រីរាជអាវុធហត្ថម្នាក់ បានជិះម៉ូតូទាំងស្រវឹង ទៅ​ទាត់​ធាក់យុវជនម្នាក់ឈ្នោះ ដូច អាយុប្រមាណជា១៩ឆ្នាំ ឲ្យមានរបួស ដោយគ្មានមូលហេតុ។ ភ្លាមៗ នៅពេលមាន​ហេតុ​ការណ៍នេះ ប្រធានក្រុមនៅក្នុងភូមិ លោក ជិន ខ្លី បានប្រាប់ឲ្យដឹងថា លោកបានទូរស័ព្ទ ទៅសុំការអន្តរាគមន៍ជាបន្ទាន់ ពីមេភូមិប៉ោយប៉ែត លោក ឃិន ណាំយ៉ុង។

តែមេភូមិរូបនេះ បានបដិសេធមិនជួយដោះស្រាយទេ តែបែរជា​ជួយឲ្យជន​ល្មើស ដែលមានសម្លៀកបំពាក់ ជាមន្ត្រីរាជ​អាវុធ​ហត្ថខាងលើ បានរួចខ្លួនទៀត។ ម្យ៉ាងវិញទៀត នៅពេលដែលអ្នកភូមិ​ជាច្រើននាក់ បានឃើញពីទង្វើ និងភាព​ព្រងើយ​កន្តើយ របស់មេភូមិរូបនេះ អ្នកខ្លះបានបញ្ចេញកំហឹង ដោយប្រើពាក្យសម្តី​មួយចំនួន ទៅកាន់មេភូមិថា ជា​មេភូមិ​មិនល្អ មិន​រក​យុត្តិធម៌ជាដើម។

ប្រធានក្រុម លោក ជិន ខ្លី បានបន្តថា ក្រោយពីមានសង្គ្រាមពាក្យសម្តី រវាងពលរដ្ឋអ្នកឃើញហេតុការណ៍ និងលោក​មេភូមិ រួចមួយថ្ងៃ មកដល់ថ្ងៃទី២០ ខែមេសា ឆ្នាំ២០១៥ មេភូមិប៉ោយប៉ែត បានដាក់ពាក្យប្តឹងទៅសង្កាត់ថា អ្នកភូមិ​នាំគ្នា​បរិហារកេរ្តិ៍គាត់ កាលពីថ្ងៃទី១៩ ខែមេសា កន្លងទៅ។ តែអ្នកភូមិទាំងអស់ បាននិយាយថា ពួកគាត់មិនសុខចិត្តទេ ព្រោះ​មេភូមិពិតជាលំអៀង ទៅជួយជនល្មើស ដោយមិនបានខ្វល់ខ្វាយ ពីជនរងគ្រោះ និងត្រឡប់ជា មកប្តឹងអ្នកភូមិទៅវិញ។

មិនអាចសុំការបញ្ជាក់ ពីលោកមេភូមិ ឃិត ណាំយ៉ុង បានទេ ជុំវិញការចោទប្រកាន់ របស់អ្នកភូមិប៉ោយប៉ែតខាងលើ។ ដោយឡែកលោក ចៅ វាសនា ចៅសង្កាត់រងប៉ោយប៉ែត បានចេញមុខបំភ្លឺថា លោកជាអ្នកដោះស្រាយជំនួស ចៅ​សង្កាត់​លោក នុន លី។ លោកបានទទួលស្គាល់ថា អ្នកភូមិពិតជាទទួលភាពអយុត្តិធម៌ ពីមេភូមិ ពីរករណី៖ ទីមួយ ដោយជន​រង​គ្រោះ មិនបានទទួលសំណង តែបែរជាមេភូមិ ធ្វើដោះលែងជនល្មើស ដែលជាមន្ត្រីប៉េអិមទៅវិញ។ ទីពីរ រងការចោទពី​បទបរិហារកេរ្តិ៍ ព្រោះតែអ្នកភូមិ ចង់ជួយជនរងគ្រោះ។ ចៅសង្កាត់រង បានប្រាប់ថា លោកនឹងធ្វើការដោះស្រាយ ជួនភាគី​ទាំង​សង​ខាង ក្នុងនាមជាអាជ្ញាធរសង្កាត់ របស់ប្រជាពលរដ្ឋ ឲ្យបានឆាប់៕