ពលរដ្ឋចំនួនជាង៣ពាន់នាក់ បើតាមតួលេខផ្ដល់ដោយ លោក រៀល ខេមរិន្ទ្រ ឬជាង២ពាន់នាក់ បើតាមតួ​លេខ​ផ្ដល់ដោយអ្នកសង្កេតការណ៍ បានធ្វើដំណើរក្នុងថ្ងៃទី១៩ ខែកក្កដានេះ ដើម្បីចុះទៅពិនិត្យមើលបង្គោល​ព្រំដែន លេខ២០៣ ដែលស្ថិតនៅនេះ ​ត្រង់​ចំណុច​ភូមិ​ធ្លក ឃុំ​ត្នោត ស្រុក​កំពង់រោទិ៍ ខេត្ត​ស្វាយរៀង។ ប៉ុន្តែ​ដំណើរ​របស់​ក្រុមពលរដ្ឋទាំងនោះ បានជួបនឹងភាពលំបាកជាច្រើន ក្នុងនោះមានដូចជា ការរៀបចំជួបជុំគ្នា និង​ដំណើរ​កាត់​តាម ដងផ្លូវដែលសម្បូរដោយភក់ជ្រាំ នារដូវវស្សាជាដើម។

លោក រៀល ខេមរិន្ទ្រ តំណាងរាស្រ្តមណ្ឌលស្វាយរៀង មកពីគណបក្សសង្រ្គោះជាតិ បានថ្លែងរៀបរាប់ ការ​ណាត់ពេលជួបជុំគ្នា នៅទីលានប្រជាធិបតេយ្យ រាជធានីភ្នំពេញ បានធ្វើឡើងតាំងពីម៉ោង៥ព្រឹក តែទម្រាំ​បាន​ជួបជុំគ្នា និងចេះតែមានពលរដ្ឋ មកចូលរួមកាន់តែច្រើននោះ ទើបការចាកចេញ ពីទីណាត់ជួប ត្រូវ​អូស​បន្លាយ​ពេលដល់ម៉ោង៦។ លោក បានថ្លែងឲ្យដឹងទៀតថា គម្រោងដំបូងថា មានមនុស្សចូលរួមតែ១ពាន់នាក់ទេ តែ​ចំនួន​បានកើនរហូតជាង៣ពាន់នាក់ ហើយត្រូវប្រើប្រាស់រថយន្ដជួល ចំនួនប្រមាណជា១០០គ្រឿង រួមទាំង​រថយន្ដផ្ទាល់ខ្លួន ជាច្រើនគ្រឿងនោះផង។

យុវតី រ័ត្ន ចន្ទដានី ដែលជាសកម្មជនមួយរូប ដែលតែងចុះ ទៅពិនិត្យបង្គោលព្រំដែន ជាច្រើនដងនោះ បាន​ថ្លែងឲ្យដឹងថា ដំណើរចេញពីផ្លូវជាតិ ដែលក្រាលកៅស៊ូ ត្រូវឆ្លងកាត់ផ្លូវលំ ប្រមាណជាង១០គីឡូម៉ែត្រ ដែល​គ្របដណ្ដប់ដោយភក់ល្បប់ នារដូវវស្សា។ យុវតីបានបង្ហោះរូបភាពជាច្រើន បង្ហាញពីដំណើរដោយថ្មើរជើង របស់ក្រុមពលរដ្ឋ និងព្រះសង្ឃទាំងនោះ ដៃកាន់ទង់ជាតិកម្ពុជា និងកាបូបស្ពាយ ដែលកំពុងដើរកាត់​វាល​ស្រែ សម្បូរទៅដោយឈ្លើង។

សូម​រម្លឹកជូនថា អាជ្ញាធរខេត្ត​ស្វាយរៀង បាន​ជួបប្រជុំ​ជាមួយ​ក្រុម​លោក រៀល ខេ​ម​រិ​ន្ទ្រ កាលពី​ថ្ងៃទី​១៥​ ខែ​កក្កដា ដើម្បីនិយាយ​ពី​គម្រោង​ចុះ ទៅ​កាន់​តំបន់​ព្រំដែន​ខេត្តស្វាយរៀងនេះ ដោយស​ម្រេច«អនុញ្ញាត»​​ឲ្យ​​មាន​ពលរដ្ឋចូលរួម យ៉ាងច្រើន​ត្រឹមតែ ១០០នាក់ ប៉ុណ្ណោះ។ ប៉ុន្តែ​ក្រុម​អ្នកតំណាងរាស្ត្រ បាន​ស្នើសុំ​ដឹកនាំ​​មនុស្ស ២០០០ នាក់ ដែលលើសពីចំនួន ដែលអាជ្ញាធរខេត្ត បានគ្រោងទុក។ យ៉ាងណាក៏ដោយ ​អាជ្ញាធរ​ខេត្ត បាន​អះអាងថា ខ្លួនក៏បាន​ត្រៀម​រៀបចំ ​ផែនការ​ការពារ សន្តិសុខ សុវត្ថិភាព សណ្តាប់​ធ្នាប់ និង​បង្កលក្ខណៈ​ងាយ​ស្រួល ​ដល់​ដំណើរការ​ត្រួតពិនិត្យ​បង្គោល​ព្រំដែន របស់ពលរដ្ឋ និងតំណាងរាស្ត្រទាំងនេះ អាចប្រព្រឹត្ត​ទៅ​ដោយ​​​រលូន បញ្ចៀស​បាន​នូវ​អំពើហិង្សា ដែល​អាច​កើតមានឡើង​។​

កាល​ពី​ថ្ងៃ​ទី​២៨ ខែ​មិថុនា កន្លងមកនេះ អំពើហិង្សាមួយ បានផ្ទុះឡើង រវាងក្រុមពលរដ្ឋកម្ពុជា ដែលប៉ុនប៉ង​ចូល​ទៅមើល បង្គោលព្រំដែនខាងលើ ជាមួយនឹងពលរដ្ឋ-កងទ័ពវៀតណាម ដែល​ប្រដាប់​ដោយ​អាវុធ និង​ដំបង​សឹង​តែគ្រប់ដៃ។ ការ​ប៉ះ​ទង្គិច​គ្នានាពេលនោះ បានបណ្ដាលឲ្យពលរដ្ឋ​កម្ពុជា​រង​របួស​ជាង ១០​នាក់ និង​​វៀតណាម របួស ៥​នាក់។

លោក ផៃ ស៊ីផាន និងក្រុមជ្រុលនិយម!

ការចុះទៅពិនិត្យមើលបង្គោលព្រំដែន របស់ក្រុមពលរដ្ឋ និងតំណាងរាស្ត្រ មិនត្រូវបានស្វាគមន៍ ដោយ​រដ្ឋាភិបាល​កម្ពុជានោះទេ។ លោក ផៃ ស៊ីផាន រដ្ឋលេខាធិការ និងជាអ្នកនាំពាក្យ ឲ្យទីស្ដីការគណៈរដ្ឋមន្ត្រី បាន​ចាត់ទុកសកម្មភាព របស់ក្រុមពលរដ្ឋ និងតំណាងរាស្ត្រខាងលើ ថាជាសកម្មភាពជ្រុលនិយម ហើយលោក​បាន​ថ្លែង ឲ្យពលរដ្ឋដទៃទៀត កុំចូលរួម និងចៀសវាងក្រុមមនុស្សមួយក្រុមនេះ។ លោកបានសរសេរ នៅលើ​គណ​នេយ្យ «អង្គភាពប្រតិកម្មរហ័ស» ថា៖ «លោក រៀល ខេមរិន្ទ្រ (...) មិនសាកសម ធ្វើជាតំណាងរាស្រ្ត។ លោក សម​នឹងធ្វើជាមេដឹកនាំបោះបោរ អនាធិបតេយ្យ និងក្រុមចលនាជ្រុលនិយម។»៕

--------------